ސްޓެލްކޯގެ އިންޖީނިއަރިންގ ޓީމުގެ އެހީތެރިކަމާއެކު، މިއަދު ހެނދުނު 6:30 ހާއިރު ރ. ދުވާފަރުގެ ކަރަންޓުގެ މައްސަލަ ހައްލުކޮށް އެ ރަށަށް ވަނީ ކަރަންޓުދީފައިވާކަން އެ ކުންފުނިން ކަށަވަރުކޮށްދީފިއެވެ.

ރ. އަތޮޅުގެ އާބާދީ އެންމެ ބޮޑު ރަށް، ދުވާފަރުގެ ބޮޑު ސަރަހައްދަކުން އިއްޔެ ހެނދުނުން ފެށިގެން ކަރަންޓު ކެނޑުމުގެ ސަބަބުން ދަތިތަކާ ކުރިމަތިވެފައިވަނިކޮށް، ސްޓެލްކޯގެ އެހީތެރިކަމާއެކު އެމްޑަބްލިއުއެސްސީ އިން އެ މައްސަލަ ހައްލުކޮށްދީފައިވާކަން ސްޓެލްކޯގެ މެނޭޖިންގ ޑިރެކްޓަރ، ހުސެއިން ފަހުމީ އެކްސްގައި މިއަދު ކުރެއްވި ޕޯސްޓެއްގައިވެއެވެ.

 

"ރައްޔިތުންނަށް އަޅުގަނޑުމެންގެ ބޭނުން ޖެހޭ މިފަދަ ކޮންމެ ދަނޑިވަޅެއްގައި، އެއީ ޤައުމީ މަސައްކަތެއް ކަމުގައި ދެކި، ކުންފުނީގެ މުވައްޒަފުން ކުރައްވަމުންގެންދަވާ އިޚްލާސްތެރި މަސައްކަތްތަކަށް ފަޚުރުވެރިކަމާއި ސާބަހާއިއެކު ޝުކުރުދަންނަވަން." ފަހުމީ ކުރެއްވި ޕޯސްޓްގައިވެއެވެ.

މީގެއިތުރުން، ސްޓެލްކޯ ވާނީ އަބަދުވެސް ރައްޔިތުންނާއެކު، އެ ރައްޔިތުންގެ ޚިދުމަތުގައި ކަމަށް ވެސް އެމްޑީ ފަހުމީ ކުރެއްވި ޕޯސްޓްގައިވެއެވެ.

ދުވާފަރުގައި ފެނާއި ނަރުދަމާ އަދި ކަރަންޓުގެ ހިދުމަތް ފޯރުކޮށްދެނީ އެމްޑަބްލިޔުއެސްސީ އިންނެވެ.