ސެންޓްރަލް ރީޖަންގެ ރަށްތަކުގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން ތިން ރަށެއްގައި މިވަގުތު ހިނގަމުންދާ މަސައްކަތްތަކުގެ ތަފްޞީލް އާރްޑީސީ އިން އާންމުކޮށްފިއެވެ.
އެގޮތުން، ސެންޓްރަލް ރީޖަންގައި ހިމެނޭ ނ. ހޮޅުދޫ، ޅ. ހިންނަވަރު އަދި ދ. ކުޑަހުވަދޫގައި މިހާރު ކުރިއަށްދާ މަސައްކަތްތަކުގެ ތަފްޞީލް އާރްޑީސީ އިން ވަނީ ދީފައެވެ.
ނ. ހޮޅުދޫގައި މިވަގުތު ކުރަމުންދަނީ، ޓިއުލިޕް ހިނގުމުގައި ކާރބް ސްޓޯން ޖެހުމުގެ މަސައްކަތާއި، މުޙައްމަދު ރާޝިދު ހިނގުމުގައި ޖަންކްޝަން ރިންގ ކާސްޓް ކުރުމުގެ މަސައްކަތުގެ އިތުރުން އެ މަގުގެ ހިނގުމުގައި ދުވާރުގެ މަސައްކަތެވެ.
ހޮޅުދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މި މަސައްކަތަކީ 71 މިލިއަން ރުފިޔާގެ މަޝްރޫޢެކެވެ. މި މަސައްކަތް ކުރުމަށް އާރްޑީސީ ހަވާލުކުރީ 2022 ވަނަ އަހަރުގެ އޮކްޓޫބަރު މަހު އެވެ.
ޅ. ހިންނަވަރުގައި މިހާރު ކުރަމުންދަނީ ނޫރާނީ މަގުގައި ސީބީޖޭ އެލެވޭޝަންގެ މަސައްކަތާއި، މަދަރުސީ މަގުގައި ސްޓޯރމް ވޯޓަރ ކެޗްޕިޓް ކާސްޓް ކުރުމުގެ މަސައްކަތުގެ އިތުރުން ނޫރާނީ މަގުގައި ޕޭވް ކުރުމުގެ މަސައްކަތާއި އެ މަގުގެ ޓްރީ ޕިޓް އެޅުމުގެ މަސައްކަތެވެ.
ހިންނަވަރުގެ މަގުތައް ހެދުމުގެ މަސައްކަތްކުރުމަށް އާރްޑީސީއާ ހަވާލުކޮށްފައިވަނީ 2021 ވަނަ އަހަރުގެ އޭޕްރީލް މަހުގެ ތެރޭގައި 122 މިލިއަން ރުފިޔާ އަށެވެ.
ސެންޓްރަލް ރީޖަންގެ ރަށްތަކުގެ ތެރެއިން މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް މިހާރު ކުރަމުންދާ އަނެއް ރަށަކީ ދ. ކުޑަހުވަދޫ އެވެ.
ކުޑަހުވަދޫގެ ހުރަވީ މަގުގައި ސްޓޯރމް ވޯޓަރ ޕައިޕްލައިން އެޅުމުގެ މަސައްކަތާއި، އެ މަގުގައި ސްޓޯރމް ވޯޓަރ ކެޗްޕިޓް އެޅުމުގެ މަސައްކަތުގެ އިތުރުން ސްޓޯރމް ވޯޓަރ ޖަންކްޝަން އަދި ޑީވޯޓަރ ޖަންކްޝަން ފްރޭމް ހެދުމުގެ މަސައްކަތެވެ. ކުޑަހުވަދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް އާރްޑީސީއާ ހަވާލުކޮށްފައިވަނީ 2021 ވަނަ އަހަރުގެ ސެޕްޓެންބަރު މަހުގައި 122.86 މިލިއަން ރުފިޔާ އަށެވެ.