ގާކޮށީގެ ޕާކިންގ ޒޯނުން ބައެއް ހިމެނޭގޮތަށް ބަންދުކޮށްފައިވާ ސަރަހައްދު ސްޓެލްކޯ އިން އާންމުންނަށް ހުޅުވާލުމަށް ނިންމާފައިވާ ކަމަށް އެ ކުންފުނީގެ މެނޭޖިންގ ޑިރެކްޓަރު ހުސެއިން ފަހުމީ ވިދާޅުވެއްޖެއެވެ.
ސްޓެލްކޯގެ އެމްޑީ ފަހުމީ، މިކަން ހާމަކުރެއްވީ މިއަދު އެކްސްގައި ކުރެއްވި ޕޯސްޓެއްގައެވެ.
އެގޮތުން، އެމްޑީ ފަހުމީ ކުރެއްވި ޕޯސްޓްގައި ވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ހަރުދަނާ ސިޔާސަތުތަކާއި އެއްގޮތަށް ރައްޔިތުންނަށް ތަކުލީފަކަށްވެފައިވާ ކަންކަމަށް ހައްލު ހޯދައިދިނުމަށް ކުރަމުންދާ މަސައްކަތްތަކުގެ ތެރެއިން ގާކޮށީގެ ޕާކިންގ ޒޯނުން ބައެއް ހިމެނޭ ގޮތަށް އެ ކުންފުނިން ބަންދުކޮށްފައިވާ ސަރަހައްދު މި ހަފްތާ ނިމުމުގެ ކުރީން ހުސްކޮށް އެތަން އާންމުންނަށް ހުޅުވާލަން ނިންމާފައިވާ ކަމަށެވެ.
މީގެއިތުރުން، ސްޓެލްކޯ އަކީ ރައްޔިތުންގެ ދިރިއުޅުމުގެ އެންމެ އަސާސީ ޙިދުމަތުގެ ބައިވެރިޔާ ކަމަށާއި، އެ ކުންފުންޏަކީ ރައްޔިތުންނާ ވީހާވެސް ގާތުން މަސައްކަތްކޮށް، ރައްޔިތުންގެ އިތުބާރު ލިބިފައިވާ ކުންފުންޏަކަށް ހެދުމަށް ކުރަމުންދާ މަސައްކަތްތަކުގެ ތެރެއިން އެ ފަދަ ގިނަ ކަންކަމަށް ހައްލު ހޯދައިދެމުން ގެންދާ ކަމަށް ވެސް އެމްޑީ ފަހުމީ ކުރެއްވި ޕޯސްޓްގައިވެއެވެ.