ޢާއިލާއެއްގައި ބައްޕައަކީ އެ ޢާއިލާއެއްގެ އެންމެ އިސްފަރާތެވެ. މާތް ﷲ ވަނީ އޭނާގެ އަނބިދަރިންނަށް އަދާކޮށްދޭން ޖެހޭ ޙައްޤުތަކެއް ލައްވައިފައެވެ. ބެލެހެއްޓުންތެރިއެއްގެ ގޮތުގައި ލައްވައިފައެވެ. މި ކަންކަމަކީ އޭނާގެ މައްޗަށް ލާޒިމު ކަންކަމެވެ. ޤިޔާމަތްދުވަހުން އޭނާއާ ސުވާލުކުރެވޭނެ މަސްއޫލިއްޔަތުތަކެކެވެ.

ޢާއިލާއެއްގައި ބައްޕައެއްގެ އެންމެ އިސް އެއް ދައުރަކީ އޭނާގެ ދަރިން ހެޔޮ ތަރުބިއްޔަތަކުން ތަރުބިއްޔަތުކުރުމެވެ. ޒަމާނީ އޮއިވަރުތަކުގައި ޖެހި، ޒިންމާތަކަށް އިހުމާލުވެފައި ވާ މަންޒަރަކީ މި މުޖުތަމަޢިން ފެންނަ ހިތާމަވެރި މަންޒަރެކެވެ. ދަރިންނަށް ރަނގަޅު ތަޢުލީމެއް ދިނުމާއި، އެ ކުދިން އަދަބުވެރިކުރުވުމާއި، ހެޔޮ ކަންކަމަށް އަހުލުވެރިކުރުވުމަކީ ހަމައެކަނި މައިމީހާ ކުރަންޖެހޭ ކަމެއް ކަމަށް ދެކެވެން ފަށައިފިއެވެ. ތަރުބިއްޔަތާގުޅޭ ބައްދަލުވުންތަކާއި ވޯކްޝޮޕްތަކުގައި ބައިވެރިވުމަކީ މައިންނަށް އެކަނި އޮތް ކަމެއް ކަމަށް ބެލެވެން ފަށައިފިއެވެ.

ދަރިން ތަރުބިއްޔަތުކުރުމުގައި ބައްޕައިންގެ ދައުރު އަދާކުރައްވައިފައިވާ ރިވެތި މިސާލުތަކުގެ އެތައް ވާހަކައެއް ކީރިތި ޤުރުއާނުގައި އައިސްފަ ވެއެވެ. ރަނގަޅު ދަރިފަސްކޮޅެއް ދެއްވުން އެދި އިބްރާހިމް އަލައިހިއްޞަލާމް ކުރެއްވި ދުޢާފުޅުތަކަކީ ތަރުބިއްޔަތުގެ ފުރަތަމަ ނަމޫނާއެވެ. ދަރީން ހެޔޮ ގޮތުގައި ތަރުބިއްޔަތުކުރުމުގެ ތައުފިޤު ދެއްވުން އެދި ﷲގެ ޙަޟްރަތުގައި ބައްޕައިން ދުޢާ ކުރުމަކީ މުހިންމު ކަމެކެވެ. އިބްރާހިމްގެފާނު އެކަލޭގެފާނުގެ ދަރިކަލުން އިސްމާޢީލްގެފާނާ މުޚާތަބުކުރެއްވެވި ރިވެތި ގޮތްތައް ޤުރުއާނުގައި އައިސްފައި ވެއެވެ. ޙިކުމަތްތެރިކަމުގެ ނަމޫނާ ކަމުގައި މާތްﷲ ލެއްވެވި ލުޤުމާނުގެފާނު އެކަލޭގެފާނުގެ ދަރިކަލުންނަށް، ބައްޕައެއްގެ ޙައިޘިއްޔަތުން ދެއްވެވި ޢިބްރަތްތެރި އަގުހުރި ނަސޭހަތްޕުޅު މާތް ﷲ އެ ވަނީ ލުޤުމާން ސޫރަތުގައި ބަޔާންކޮށްދެއްވައިފައެވެ. ރަސޫލު ﷲ ޞައްލަﷲ އަލައިހި ވަޞައްލަމް ތަރުބިއްޔަތުގެ މައިދާނުގައި ދެއްކެވި ރިވެތި ނަމޫނާތައް ވެސް އެހުރީ ފެންނާށެވެ.

ބައްޕައިންނޭވެ! ދަރީން ތަރުބިއްޔަތުކުރުމަކީ އުނދަގޫ، ބުރަ ކަމެކެވެ. ޚާއްޞަކޮށް އެކިދިމަދިމާލަށް ހުޅުވިފައިވާ މިފަދަ ޒަމާނެއްގައެވެ. ތަރުބިއްޔަތުގެ މައިދާނުގައި ކާމިޔާބާ ހަމައަށް ވާޞިލުވެވޭނީ ދެމަފިރިން ވެސް ލައްކަ ބޮޑެތި ޤުރުބާނީތަކެއް ވެގެންނެވެ. ހަމައެކަނި އަނބިމީހާގެ ޒިންމާއަކަށް އެ ކަން ނުހަދާށެވެ! ދަރިން ތަރުބިއްޔަތުކުރުމާގުޅޭ މަޢުލޫމާތުތައް ވީވަރަކުން ހޯދާށެވެ! އެ ކަމުގައި ދެމަފިރިން މަޝްވަރާކޮށް ޚިޔާލު ބަދަލުކުރާށެވެ! ދަރިންގެ މުސްތަޤްބަލާ މެދު ފުންކޮށް ވިސްނައި، އެ ކުދިންނަށް ހެޔޮ ތަރުބިއްޔަތެއް ދިނުމަށް ގަދައަޅައި މަސައްކަތްކުރާށެވެ! އެ ދަރިންނަށް ކާންބޯންދީ، އަންނައުނުދީ، އަދި އެ ނޫން ވެސް ކަންކަން ފުއްދައިދޭ ފަދައިން، ނުވަތަ އެއަށްވުރެ ވެސް ބޮޑަށް ތަރުބިއްޔަތަށް އިސްކަންދޭށެވެ! ހެޔޮ ތަރުބިއްޔަތެއް ނުދެވިއްޖެ ނަމަ މާއްދީގޮތުން ކޮށްދޭ ކަންކަމުގެ އަގެއް ޙަޤީޤަތުގައި ނުހުންނާނެއެވެ.

ބައްޕައިންނޭވެ! ދަރިންނަށް ދޭ ތަރުބިއްޔަތުގެ މޭވާއިން މާދަމާ މަންފާކުރާނީ ހެޔޮ ތަރުބިއްޔަތެއް ދިނުމަށް މަސައްކަތްކޮށްފައި ވާނަމައެވެ. މަރުވާއިރު ދުނިޔެއަށް ދޫކޮށްދާ ދަރިންގެ ހެޔޮ ދުޢާއިންނާއި އެ ކުދިން ކުރާ ނަމާދުންނާއި ކިޔަވާ ޤުރުއާނުގެ އަކުރަކުން ވިޔަސް ތިޔަ ބައްޕައިންނަށް ސަވާބެއް، ދަރުމައެއް ލިބޭނީ އެ ދަރިން އެ ކަންކަމުގެ މައްޗަށް ތަރުބިއްޔަތުކޮށްފައި ވާނަމައެވެ. މާތް ﷲއަށް ބިރުވެތިވެ ދަރިން ހެޔޮގޮތުގައި ތަރުބިއްޔަތުކުރުމުގެ ޒިންމާ އޭގެ އެންމެ ފުރިހަމަގޮތުގައި ނަގާށެވެ!

 

(ދަރީންގެ ތަރުބިއްޔަތުގައި ބައްޕަގެ ރޯލު - އައްޝައިޚް މުޙައްމަދު ސިނާން؛ ދީނުގެ މަގު، އަހަރު 4، އަދަދު 8، ޞ.3 –23 ފެބުރުވަރީ 2024)