މި ފެބްރުއަރީ މަހުގެ 25 ވީ ހުކުރު ދުވަހު އެމެރިކާގެ ވައިގެ ސިފައިންގެ އެކްޓިވް ޑިއުޓީ މެމްބަރެއް ކަމުގައިވާ އާރޮން ބުޝްނެލް ވަނީ އެމެރިކާގެ ވެރިރަށް ވޮޝިންޓަން ޑީސީގައި ހުންނަ އިސްރާއީލުގެ އެމްބަސީގެ ކުރިމަތީގައި އަމިއްލައަށް، އަމިއްލަ ގައިގާ އަލިފާން ރޯކޮށްލާފަ އެވެ. އަދި މިކަމުގެ ސަބަބުން އެ އެމެރިކާ ސިފައިންގެ މީހާ ވަނީ ދުނިޔެ ދޫކޮށްފައެވެ. މިއީ މިހާރު ޣައްޒާގައި އިސްރާއީލުގެ އަސްކަރިއްޔާއިން ހިންގަމުންދާ ޤަތުލު އާއްމާ ދެކޮށަށް ކުރެވުނު އެއްމެ ވަރުގަދަ، އަދި އެއްމެ އަސަރުގަދަ އެއް އިހުތިޖާޖެވެ.

އިންސާނަކަށް އޭނާގެ އަމިއްލަ ގައިގާ އަލިފާން ރޯކޮށް، އެ ވޭނުގައި މަރުވާން ކެރޭނީ ފުދޭވަރެއްގެ ހިތްވަރަކާއި ހިތުގައި އުފެދޭ އަސަރުގަދަ ޖަޒުބާތެއްގެ ސަބަބުންނެވެ. ފަލަސްޠީނުގައި ކޮންމެ ދުވަހަކު އެތައް ބަޔަކު މަރަމުންދާ އިރު، އެކަމާ ދެކޮޅަށް މުޅި ދުނިޔޭގައި ދަނީ އަޑު އުފުލަމުންނެވެ. ނަސްލު ނައްތާލުމުގެ އެ ހަމަލާތަކުގައި ޔަހޫދީ އިސްރާއީލުގެ ސިފައިންނާއި އެކު އެމެރިކާ ސިފައިން ބައިވެރިވާކަމަށް މުޅި ދުނިޔޭގައި ދަނީ އަޑު ފެތުރެމުންނެވެ. އަދި އެކަން އެމެރިކާއިން ސީދާ ދޮގުކޮށްފައި ނުވާއިރު، އެމެރިކާއިން ދަނީ މަތިއޮމާންކުރުމަށް ތަފާތު ގިރިޓީތައް ހާކަމުންނެވެ.

އެމެރިކާއިން އޭގެ ކޮންޓްރޯލު ނަގައިގެން ދުނިޔޭގައި ހިންގާ ބޮޑެތި ޖަމުއިއްޔާ ޖަމާއަތްތައް ކަމަށްވާ ޔުނައިޓެޑް ނޭޝަން އާއި ޔުނިސެފާއި، ޔުއެންޑީޕީ އާއި ޔުނެސްކޯ އަދި ޔޫއެސްއެއިޑް ފަދަ ބޮޑެތި ޖަމުއިއްޔާތަށް އޮތީ ވާވެފައެވެ. އަތްފައި ބަނދެވިފައެވެ. ރީތި ނަންނަމުގައި މުޅި ދުނިޔޭގައި އެބައިމީހުންގެ ހަރަކާތައް ހިންގާ ދުނިޔޭގެ އެކި ކަންކޮޅުތަކުގައި އެބައިމީހުންގެ ބަސްވިކޭނޭ މީހުން ތިބީ ވަކިހިއްޕާފައެވެ. ދުނިޔޭގެ ހުރިހާ އިންސާނުންނަކީ އެމެރިކާގެ އަޅުން ކަމުގައި ދެކިގެން މުޅި ދުނިޔޭގެ ތާރީޚު އެމެރިކާއިން އެދަނީ ލިޔަމުންނެވެ. ނަމަވެސް އެބައިމީހުންގެ ކޮންޓްރޯލް އޮންނަ މިފަދަ ޖަމުއިއްޔާތައް ވާވެވައި އޮތުމުގެ ސަބަބުން މިއަދު އެ ޖަމުއިއްޔާތަކަކީ އެއްވެސް ބަހެއް ވިކޭ ބަޔަކު ކަމުގައި ނުވެއެވެ. މީސްމީޑިޔާގައި ފެންނަނީ އެފަދަ ޖަމުއިއްޔާތަކުން ކޮށްފައި ހުންނަ ޕޯސްޓްތަކަށް، އާއްމުން މުޅިންވެސް ކަސިޔާރު ރައްދު ދީފައި ހުންނަ ތަނެވެ. އެބައިމީހުން ބަލައިނުގަންނަކަން ހާމަކުރަމުންނެވެ. ސަބަބަކީ އެމެރިކާއިން އެތަންތަން ކޮންޓްރޯލު ކުރާއިރު، ފަލަސްޠީނުގެ ހާލަތު އެގޮތަށް ގޯސްކުރުވުމުގައި އެތަންތަނުގެ އަޑި ނޭނގޭ ސިއްރު ޕްރޮޕެގެންޑާތަކެއް ހިންގާކަމަށް އާއްމުން ގަބޫލުކުރާތީއެވެ.

އެމެރިކާގެ ވައިގެ އެކްޓިވް ޑިއުޓީ މެމްބަރެއް ކަމުގައިވާ އާރޮން ބުޝްނެލް މި ވަނީ މުޅި ދުނިޔެއަށް އެމެރިކާގެ ހަގީގަތް ހާމަކޮށްދީފައެވެ. މިއީ އެމެރިކާގެ ވައިގެ އަސްކަރިއްޔާގެ ސިފައިންގެ މީހެކެވެ. ފަލަސްޠީނުގެ ހައްގުގައި އޭނާގެ ފުރާނަ އޭނާ އަމިއްލައަށް ދުއްވާލީ، އެމެރިކާ ސިފައިންގެ މީހެއްގެ ހައިސިއްޔަތުން ހިތުގައި ޖެހި، އެ ވޭނުގައި ދުނިޔޭގައި އުޅެން ބޭނުން ނުވެގެންނާއި އަދި މިކަމުގެ މައްޗަށް އިންސާނުންގެ ސަމާލުކަން އިތުރަށް ހޯދުމުގެ ބޭނުމުގައެވެ.

އޭނާ އޭނާގެ ގައިގާ އަލިފާންރޯކުރާ މަންޒަރު ރިކޯޑުކޮށްފައިވާ ވީޑިއޯގައި، އަލިފާން ރޯކުރުމުގެ ކުރިން ދައްކާފައިވާ ވާހަކަތަށް ދަނީ މީސްވީޑިޔާގައި ދައުރުވަމުންނެވެ. އޭނާ ބުނާ ގޮތުގައި އެމެރިކާ ސިފައިން ދަނީ ފަލަސްޠީނުގެ ރައްޔިތުން މެރުމުގައި އަމަލީގޮތުން ބައިވެރިވަމުންނެވެ. އަދި އިތުރަށް، ނަސްލު ނައްތާލުމުގެ އެ އަމަލުގައި ބައިވެރި ނުވާނެ ކަމަށްވެސް އޭނާ ވަނީ ބުނެފައެވެ. އަދި މިއީ މިހާތަނަށް ފަލަސްޠީނުގެ ރައްޔިތުންގެ ހައްގުގައި ކުރެވޭ އެއްމެ ނުރައްކާތެރި އިހްތިޖާޖު ކަމަށާއި ނަމަވެސް މިއީ ފަލަސްޠީނުގެ ރައްޔިތުންގެ ހާލާ އަޅާބަލާއިރު، ކުޑަވެސް ބިރުވެރިކަމެއް ނޫންކަން އޭނާ ވަނީ ފާހަކަކޮށްފައެވެ. ގައިގާ އަލިފާން ރޯކުރުމާއެކު، އަނދަމުން ދިޔަ ނަމަވެސް އޭނާ ހުރީ ސާބިތުކަންމަތީ އިސްރާއީލުގެ އެންބަސީ ކުރިމަތީގައެވެ. އެ ވޭނުގައި އޭނާ ހަޅޭލަވަމުން ދިޔައީ ފަލަސްޠީނު މިނިވަން ކުރުމަށެވެ. ގާތްގަނޑަކަށް ހައެއްކަ ފަހަރު، އަޑު ހަރުކޮށް ފަލަސްޠީނު މިނިވަން ކުރުމަށް ބުޝްނެލް ވަނީ ގޮވާލާފައެވެ. އެއާއި އެކު އޭނާ ބިންމަށްޗަށް ވެއްޓޭމަންޒަރު ފެނެއެވެ. ބަޔަކު އައިސް އަލިފާން ނިވަން މަސައްކަތް ކުރެއެވެ. ނަމަވެސް އިސްރާއީލު އެންބަސީގެ ސެކިއުރިޓީ މީހާ ނުކުތީ އަނދަމުންދިޔަ ބުޝްނެލް އާ ދިމާލަށް ބަޑި ދިއްކޮށްގެންނެވެ. މި އަނިޔާތަކަށް ފަރުވާދެމުން ދަނިކޮށް ބުޝްނެލް ވަނީ މަރުވެފައެވެ.

އާދޭހެވެ! އެމެރިކާގެ ވައިގެ ސިފައިންގެ އެކްޓިވް ސިފައިންގެ މީހަކު، މުޅި ދުނިޔެއަށް އެމެރިކާގެ ހަގީގަތް ހާމަކޮށްދީފިއެވެ. ފަލަސްޠީނު ރައްޔިތުން އެގޮތަށް މަރުވަމުންދާއިރު، ތިމަންނާ ދުނިޔޭގައި ހުރުމުގެ ބޭނުމެއް ނެތްކަމަށް، އެމެރިކާ ސިފައިންގެ މީހަކު ގަބޫލުކޮށް އެކަން އެމަގުން ކޮށްފިއެވެ. ނަމަވެސް އަހަރެމެން ދިވެހިން އަދިވެސް މި ތިބެނީ އެމެރިކާ މީހުންގެ އަޅުންގެ ގޮތުގައި އެމީހުނަށް ސަނާކިޔައިގެންނެވެ. ހެޔޮވާނީ ކޮންފަދައަކުން ހެއްޔެވެ! ޤުނޫތު ކިޔުންވެސް މިހާރު ހުއްޓާލައިފިއެވެ! ވިސްނާކަށް ނުވޭ ހެއްޔެވެ؟