ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތިލަދުންމަތީ ދެކުނުބުރީ ވައިކަރަދޫ އާއި ނޭކުރެންދޫގެ އިތުރުން ކުމުންދޫ ކައުންސިލް އަދި އެ ތިން ރަށުގެ ޑަބްލިއުޑީސީގެ މެންބަރުންނާ ބައްދަލުކުރައްވައިފިއެވެ.

ވައިކަރަދޫ ކައުންސިލާއެކު ބޭއްވި ބައްދަލުކުރެއްވުން އޮތީ ރޭ ތިލަދުންމަތީ ދެކުނުބުރީ އަތޮޅު ކައުންސިލް އިދާރާގައެވެ.

މި ބައްދަލުކުރެއްވުމުގައި ކައުންސިލުން އެންމެ މުހިންމުކަމެއްގެ ގޮތުގައި ހައުސިންގ ޔުނިޓް ބޭނުންވާކަމުގައި ފާހަގަކުރެއްވިއެވެ. އަދި ގިނަ މީހުން ރަށުން ހިޖުރަ ކުރާކަން ފާހަގަކުރައްވައި، އެކަން އެހެން ދިމާވަނީ ވަޒީފާ ލިބުމުގެ ދަތިކަން ހުރުމުން ކަމުގައި ކައުންސިލުން ވިދާޅުވިއެވެ. އެހެންކަމުން ރަށުގެ ރައްޔިތުންނަށް ވަޒީފާގެ ފުރުސަތު ފަހިކޮށްދެއްވުމަށް މަސައްކަތްކޮށްދެއްވުމަށް ކައުންސިލުން އެދިވަޑައިގެންނެވިއެވެ. ހަމައެއާއެކު، މަގުތައް ރަނގަޅު ފެންވަރުގައި ހެދުމަށާއި، ރަށަށް މިސްކިތެއް ގާއިމުކޮށްދެއްވުމަށާއި، ފަތުރުވެރިކަމުގެ ދާއިރާ ތަރައްޤީ ކޮށްދެއްވުމަށް ކައުންސިލުން އެދިވަޑައިގެންނެވިއެވެ. މީގެ އިތުރުންވެސް ރަށުގެ އިހުތިސާސުގައި ރަށެއް ހިމެނުމަށް ބޭނުންވާކަން ފާހަގަކުރެއްވިއެވެ.

އިއްޔެގެ ބައްދަލުކުރެއްވުމުގައި ވާހަކަފުޅު ދައްކަވަމުން ވައިކަރަދޫގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީންވަނީ އަންހެން ކަނބަލުންނަށް ޚާއްސަކޮށް ކުޅިވަރުގެ ދާއިރާ ކުރިއެރުވުމަށް ބޭނުންވާ ވަސީލަތްތައް ފާހަގަކުރައްވާފައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ކައުންސިލުން ފާހަގަކުރެއްވި ކަންކަން ޚާއްސަ ސަމާލުކަމެއް ދެއްވައިގެން ކޮށްދެއްވުމަށް މަސައްކަތްކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުންވަނީ ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ.

ރައީސުލްޖުމްހޫރިއްޔާ، ނޭކުރެންދޫ ކައުންސިލް އަދި ޑަބްލިއުޑީސީ އާއެކު ބޭއްވި ބައްދަލުކުރެއްވުމުގެ ތެރެއިން. --ފޮޓޯ: ރައީސް އޮފީސް

 

ރައީސުލްޖުމްހޫރިއްޔާ، ހދ. ނޭކުރެންދޫ ކައުންސިލް އަދި ޑަބްލިއުޑީސީގެ މެންބަރުންނާ ބައްދަލުކުރެއްވުން:

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތިލަދުންމަތީ ދެކުނުބުރީ ނޭކުރެންދޫ ކައުންސިލް އަދި އ.ތ.މ ކޮމިޓީގެ މެންބަރުންނާއެކު ބޭއްވި މި ބައްދަލުކުރެއްވުން އޮތީ ރޭ ތިލަދުންމަތީ ދެކުނުބުރީ އަތޮޅު ކައުންސިލް އިދާރާގައެވެ.

މި ބައްދަލުކުރެއްވުމުގައި ކައުންސިލުންވަނީ ބަނދަރު ބޮޑުކޮށްދެއްވުމަށާއި، ސުކޫލުގައި ހަދަމުންދާ ކްލާސްރޫމުގެ މަސައްކަތް ކުރިއަށް ގެންގޮސްދެއްވުމަށާއި، ރަށަށް އާމްދަނީ ލިބޭނެ މަޝްރޫޢެއް ހިންގަވައިދެއްވުމަށާއި، ކުނި މެނޭޖުކުރާނެ ޒަމާނީ ފެންވަރުގެ ނިޒާމެއް ގާއިމު ކޮށްދެއްވުމަށާއި، ފެނަކަ އިންޖީނުގެ މީހުން ދިރިއުޅޭ ސަރަހައްދުން ދުރަށް ބަދަލުކޮށްދެއްވުމަށް އެދިވަޑައިގެންފައެވެ. އަދި ކުޅިވަރުގެ ދާއިރާ ތަރައްޤީކުރުމަށް ބޭނުންވާކަމަށާއި ޞިއްޙީ މަރުކަޒު އިތުރަށް ތަރައްޤީކުރުމަށްޓަކައި ބޭނުންވާ ކަންކަން ކައުންސިލުން ހިއްސާކުރެއްވިއެވެ.

އިއްޔެގެ ބައްދަލުކުރެއްވުމުގައި ވާހަކަފުޅު ދައްކަވަމުން ނޭކުރެންދޫގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީންވަނީ ބަޖެޓުގެ ދަތިކަން ފާހަގަކުރައްވާފައެވެ.

ރައީސުލްޖުމްހޫރިއްޔާ، ކުމުންދޫ ކައުންސިލް އަދި ޑަބްލިއުޑީސީ އާއެކު ބޭއްވި ބައްދަލުކުރެއްވުމުގެ ތެރެއިން. --ފޮޓޯ: ރައީސް އޮފީސް

 

ރައީސުލްޖުމްހޫރިއްޔާ ހދ. ކުމުންދޫ ކައުންސިލް އަދި ޑަބްލިއުޑީސީގެ މެންބަރުންނާ ބައްދަލުކުރެއްވުން:

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތިލަދުންމަތީ ދެކުނުބުރީ ކުމުންދޫ ކައުންސިލް އަދި އ.ތ.މ ކޮމިޓީގެ މެންބަރުންނާއެކު ބޭއްވި މި ބައްދަލުކުރެއްވުން އޮތީ ރޭ ތިލަދުންމަތީ ދެކުނުބުރީ އަތޮޅު ކައުންސިލް އިދާރާގައެވެ.

މި ބައްދަލުކުރެއްވުމުގައި ކައުންސިލުންވަނީ މިދިޔަ ސަރުކާރުން އަމާޒެއްނެތި ފަށާފައިހުރި މަޝްރޫޢުތަކުގެ ސަބަބުން ރައްޔިތުންގެ ޝަކުވާ ކައުންސިލަށް ލިބޭކަމުގައި ފާހަގަކުރައްވާފައެވެ. އަދި ކުނި މެނޭޖުކުރުމަށް ޚާއްސަ ސެންޓަރެއް ގާއިމުކޮށްދެއްވުމަށާއި، ޞިއްޙީ މަރުކަޒުގައި ލެބޯޓަރީގެ ޚިދުމަތް ނެތުމުން ދިމާވާ ގޮންޖެހުންތަކާއި، ބަނދަރުގެ މައްސަލައަށް ޖުމްލަގޮތެއްގައި ހައްލެއް ހޯދުމަށް މަސައްކަތް ކޮށްދެއްވުމަށާއި، ރަށުގެ ރައްޔިތުންނަށް އާމްދަނީ ލިބޭނެ ގޮތްތައް މަގުފަހިކޮށްދެއްވުމަށް ކައުންސިލުން އެދިވަޑައިގެންނެވިއެވެ. ހަމައެއާއެކު ކުމުންދޫ ރައްޔިތުންނަށް ރޯހައުސް ނުވަތަ ފްލެޓް ގާއިމުކޮށްދެއްވުމަށް އެދިވަޑައިގެންނެވިއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ކައުންސިލުން ފާހަގަކުރެއްވި ކަންކަން ކޮށްދެއްވުމަށް މަސައްކަތްކުރައްވާނެ ކަމުގައި ވިދާޅުވިއެވެ.