މިސްކިތްތަކުގައި ބޭނުންކުރާ ކަރަންޓުގެ ރޭޓް ކުޑަކުރުމަކީ ކައުންސިލްތަކުން ކުރާ ޚަރަދުތައް އިޤްތިޞާދުކޮށް ސިންދަފާތުކުރުމަށް މަގުފަހިކޮށްދިނުމަށް މި ސަރުކާރުން ގެންގުޅުއްވާ ހަރުދަނާ ސިޔާސަތުގެ ތެރެއިން ނިންމުނު ފުރިހަމަ އަދި އެހާމެ މުޙިއްމު ނިންމުމެއް ކަމަށް ސްޓެލްކޯ އިން ބުނެފިއެވެ.

މިހެން ވިދާޅުވީ، ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީ މިއަދު އެކްސްގައި ކުރެއްވި ޕޯސްޓެއްގައެވެ.

"މިއީ ލާމަރުކަޒީ ނިޒާމުގެ މުގޫ ކަމުގައިވާ ކައުންސިލްތައް ބާރުވެރި ކުރުމަށާއި، ކައުންސިލްތަކުން ކުރާ ޚަރަދު އިޤުތިޞާދުކޮށް ސިންދަފާތު ކުރެވޭނެ މަގުފަހިކުރުމަށް މި ސަރުކާރުން ގެންގުޅުއްވާ ހަރުދަނާ ސިޔާސަތުގެ ތެރެއިން ނިންމުނު ފުރިހަމަ އަދި މުހިއްމު ނިންމުމެއް." އެމްޑީ ފަހުމީ ކުރެއްވި ޕޯސްޓްގައިވެއެވެ.

"މިސްކިތްތަކުގައި ބޭނުންކުރާ ކަރަންޓަށް ބިލްކުރުން ޑޮމެސްޓިކް ރޭޓަށް ބަދަލުކުރެއްވުމަށް ރައީސުލްޖުމްހޫރިއްޔާ މުޙައްމަދު މުޢިއްޒު ނިންމެވި ނިންމެވުމަށް މަރުޙަބާ ދަންނަވަން." އެމްޑީ ފަހުމީ ކުރެއްވި ޕޯސްޓްގައިވެއެވެ.

ފަހުމީ އިތުރަށް ވިދާޅުވީ، ރާއްޖޭގެ އިއްޒަތްތެރި ރައީސުލްޖުމްހޫރިއްޔާ ރޭ ކުޅުދުއްފުށީ ސިޓީގައި އިޢުލާންކުރެއްވި ފަދައިން ގްރޭޓަރ މާލެ ސަރަހައްދުގެ އިތުރުން ސްޓެލްކޯ އިން އަތޮޅުތެރޭގައި ހިދުމަތްދެމުންގެންދާ އެހެން ރަށްތަކުގެ މިސްކިތްތަކުގައި ބޭނުންކުރާ ކަރަންޓަށް އަންނަ މަހުން ފެށިގެން ބިލްކުރަމުންދާނީ ޑޮމެސްޓިކް ރޭޓުން ކަމަށެވެ.