ސެންޓްރަލް ރީޖަންގެ ރަށްތަކުގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން ތިން ރަށެއްގައި މިވަގުތު ހިނގަމުންދާ މަސައްކަތްތަކުގެ ތަފްޞީލް އާރްޑީސީ އިން އާންމުކޮށްފިއެވެ.
އެގޮތުން، ސެންޓްރަލް ރީޖަންގައި ހިމެނޭ ނ. ހޮޅުދޫ، މ. މުލައް އަދި އދ. މާމިގިލީ ގައި މިހާރު ކުރިއަށްދާ މަސައްކަތްތަކުގެ ތަފްޞީލް އާރްޑީސީ އިން ވަނީ ދީފައެވެ.
ނ. ހޮޅުދޫގައި މިވަގުތު ކުރަމުންދަނީ، ޓިއުލިޕް ހިނގުމުގައި ޖަންކްޝަންގެ މަސައްކަތާއި އެ މަގުގެ ރިންގ ކޮންކްރީޓް ފޯމްގެ މަސައްކަތުގެ އިތުރުން އުނިމާ މަގުގައި ކާރބް ސްޓޯން ޖެހުމުގެ މަސައްކަތާއި، މަދަރުސާ މަގުގައި ޕޭވިންގގެ މަސައްކަތެވެ.
ހޮޅުދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މި މަސައްކަތަކީ 71 މިލިއަން ރުފިޔާގެ މަޝްރޫޢެކެވެ. މި މަސައްކަތް ކުރުމަށް އާރްޑީސީ ހަވާލުކުރީ 2022 ވަނަ އަހަރުގެ އޮކްޓޫބަރު މަހު އެވެ.
މ. މުލަކުގައި މިހާރު ކުރަމުންދަނީ ހުސޭނީ މަގުގައި ސްޓޯރމް ވޯޓަރ ޓޭންކް އެޅުމާއި ހޮޅި އެޅުމުގެ މަސައްކަތާއި ކޭބަލް ޖަންކްޝަން ހުރަސް ހޮޅި އެޅުމުގެ މަސައްކަތެވެ.
މުލަކުގެ މަގުތައް ހެދުމުގެ މަސައްކަތްކުރުމަށް އާރްޑީސީއާ ހަވާލުކޮށްފައިވަނީ 2021 ވަނަ އަހަރުގެ އޭޕްރީލް މަހުގެ ތެރޭގައި 106.2 މިލިއަން ރުފިޔާ އަށެވެ.
ސެންޓްރަލް ރީޖަންގެ ރަށްތަކުގެ ތެރެއިން މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް މިހާރު ކުރަމުންދާ އަނެއް ރަށަކީ އދ. މާމިގިލި އެވެ.
މާމިގިލީ އަމީނީ މަގުގައި ކޭބަލް އެޅުމުގެ މަސައްކަތާއި، އެ މަގުގެ ގްރޭޓިންގ ފްރޭމްގެ މަސައްކަތުގެ އިތުރުން ގެވެހި މަގުގައި ގްރޭޓިންގ ފްރޭމް ކާސްޓް ކުރުމުގެ މަސައްކަތެވެ. މާމިގިލީގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް އާރްޑީސީއާ ހަވާލުކޮށްފައިވަނީ 2020 ވަނަ އަހަރުގެ ސެޕްޓެންބަރު މަހުގައި 95 މިލިއަން ރުފިޔާ އަށެވެ.