ނޯތު ރީޖަންގައި ހިމެނޭ ކުޅުދުއްފުށި ސިޓީގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން މިވަގުތު ހިނގަމުންދާ މަސައްކަތްތަކުގެ މަޢުލޫމާތު އާރްޑީސީ އިން އާންމުކޮށްފިއެވެ.
އެގޮތުން، ކުޅުދުއްފުށި ސިޓީ މަގު ހެދުމުގެ މަޝްރޫޢުގެ ދަށުން މިވަގުތު ކުރިއަށްދަނީ، ދޮންއުމަރުކަލޭފާނުމަގުގައި އަދި ޕޮލިސް ސްޓޭޝަން ސަރަހައްދުގައި ތާރު އެޅުމުގެ މަސައްކަތް ކަމަށް އާރްޑީސީ އިން ވަނީ ބުނެފައެވެ.
އަދި މިހާރު ދޮންއުމަރުކަލޭފާނު މަގުގެ 150 މީޓަރުގައި ތާރުއަޅާ ނިމިފައިވާ ކަމަށް ވެސް އާރްޑީސީ އިން ވަނީ ބުނެފައެވެ.
ކުޅުދުއްފުށީ ސިޓީގެ މަގުތައް ޒަމާނީ ފެންވަރަށް ހެދުމުގެ މަސައްކަތް ކުރުމަށް އާރްޑީސީއާ ހަވާލުކޮށްފައިވަނީ 2021 ވަނަ އަހަރުގެ ޖޫން މަހުގެ ތެރޭގައި 100.7 މިލިއަން ރުފިޔާ އަށެވެ.