މިއަދުން ފެށިގެން ފުރަމާލެ ސަރަހައްދުގައި (މާލެ، ވިލިމާލެ އަދި ހުޅުމާލެ) ކުނި އުކާލަން އަންނަ އާއްމު ފަރާތްތަކުގެ އުޅަނދުތަކުން ނަގާ ފީ އަށް ބަދަލު ގެންނަން ނިންމާފައިވާކަން ވެމްކޯ އިން ބުނެފިއެވެ.
މިގޮތުން، މީގެކުރީގައި އާއްމުންގެ ފަރާތުން ކުނި ގެންނަ އުޅަނދުގެ ޓަނަކަށް ޗާރޖު ކުރަމުން އައި 1،060.00 ރުފިޔާގެ ބަދަލުގައި، 01 މާރިޗު 2024 އިން ފެށިގެން ޗާރޖު ކުރެވޭނީ ޓަނަކަށް 750.00 ރުފިޔާގެ މަގުންނެވެ.
މީގެއިތުރުން، ފުރަމާލެ ސަރަހައްދުގައި ކުނިއުކާލުމުގެ ޚިދުމަތް ފޯރުކޮށްދޭ ފެސިލިޓީތަކަށް އަންނަ އާއްމުންނާއި ސަރުކާރު އަދި ސަރުކާރު ހިއްސާވާ ކުންފުނިތަކުގެ ކޮންމެ އުޅަނދަކަށް ޚިދުމަތުގެ އަގެއްގެ ގޮތުގައި ވަންނަ ކޮންމެ ފަހަރަކު 150.00 ރުފިޔާގެ ޗާރޖެއް ނަގާނެ ކަމަށް ވެސް ވެމްކޯ އިން ވަނީ ބުނެފައެވެ.
އަގަށް މިގެނައި ބަދަލާއި އެކު ފުރަމާލެ ސަރަހައްދުގައި ވެއި ބުރިޖް ޤާއިމްވެފައިވާ ފެސިލިޓީތަކަށް ކުނި ގެނައުމުން އާއްމުންގެ ފަރާތުން އަންނަ އުޅަނދަށް ޗާރޖު ކުރާނީ ގެންނަ ކުނީގެ ބަރުދަނަށް ބަލައި ޓަނަކަށް 2،660.00 ރުފިޔާގެ މަގުން ކަމަށް ވެސް ވެމްކޯ އިން ބުންޏެވެ.
އަދި ވެއި ބުރިޖު ޤާއިމުވެފައި ނުވާ ފެސިލިޓީތަކުން އާއްމުންނަށް ޗާރޖުކުރަމުން ދާނީ އުޅަނދުގެ ރަޖިސްޓާރޑް ޓަނަކަށް 750.00 ރުފިޔާގެ މަގުން ކަމަށް ވެސް ވެމްކޯ އިން ބުނެއެވެ.