ސްޓެލްކޯ އިން ބަލަހައްޓާ އާސާރީ ބިނާތަކަށް އެ ކުންފުނީގެ މެނޭޖިންގ ޑިރެކްޓަރ، ޙުސައިން ފަހުމީ ޒިޔާރަތްކުރައްވައިފިއެވެ.
އެމްޑީ ފަހުމީ، އިއްޔެ ވަނީ މާލޭގައި ހުރި ސްޓެލްކޯ އިން ބަލަހައްޓާ އާސާރީ ބިނާތަކުގެ އާބާތުރަ ފިލުވައި، މަރާމާތު ކުރުމުގެ މަސައްކަތް ކުރިއަށްދާގޮތް ބައްލަވާލައްވާފައެވެ.
މި ޒިޔާރަތުގައި ދިވެހިބަހާއި ސަގާފަތާއި ތަރިކައާ ބެހޭ ވަޒީރު، އާދަމް ނަޞީރު އިބްރާހިމް ވެސް ބައިވެރިވެވަޑައިގެންނެވިއެވެ.
"އަޅުގަނޑު ހިތުން މި މަސައްކަތަކީ ވަރަށް މުހިއްމު މަސައްކަތެއް. ސްޓެލްކޯ މިވަނީ އަޅުގަނޑުމެންގެ މި ހާއްސަ ތަރިކަތައް ރައްކާތެރިކޮށް ދެމެހެއްޓުމުގައި ވަރަށް މުހިއްމު މިތުރަކަށް، ވަރަށް މުހިއްމު ބައިވެރިއަކަށް." މިނިސްޓަރ، އާދަމް ނަޞީރު ވިދާޅުވިއެވެ.
މިނިސްޓަރު އާދަމް ނަޞީރު ވިދާޅުވީ، ސްޓެލްކޯ އިން މިހާރު މި މަސައްކަތް ކުރައްވަމުންގެންދަވާތާ އަހަރުތަކެއްވެއްޖެ ކަމަށާއި ކޮންމެ ފަހަރަކުވެސް މުންނާރު މިގޮތަށް ޒީނަތްތެރިކުރުމުގައި އެ ކުންފުނީގެ ދައުރު ވަރަށް މުހިއްމު ކަމަށެވެ. އަދި އެކަމަށްޓަކައި ސްޓެލްކޯގެ އެމްޑީ އަށާއި އެންމެހާ މުވައްޒަފުންނަށް ހާއްސަ ޝުކުރެއް އަދާކޮށްފައިވެއެވެ.
"މި މަސައްކަތް ސްޓެލްކޯ އިން ކޮށްދެއްވާތާ އަހަރުތަކެއް ވެއްޖެ. އަދި އަޅުގަނޑުމެން މިނިސްޓްރީއާ ގުޅިގެން މި ބަލަނީ އަޅުގަނޑުމެންނަށް ކޮށްދެވޭނެ އެހެން މަސައްކަތްތައްވެސް ހުރިތޯ،"
"މީގެ އެންމެ ބޮޑު މަގްޞަދަކީ އަޅުގަނޑު މިދެންނެވިހެން އަންނަން އޮތް ޖީލުތަކަށް މި ތަރިކަތައް ރައްކާކޮށްފަ އެ ޖީލުތަކަށް ރައްކާތެރިކަމާއެކު ފޯރުކޮށްދެވޭނެ ގޮތެއް ދައުލަތުގެ ކަމާބެހޭ ވުޒާރާތަކާ ގުޅިގެން މަސައްކަތްކުރުން." އެމްޑީ ފަހުމީ ވިދާޅުވިއެވެ.