ފިހުމަކީ ހަމަ ޔަގީނުންވެސް ވަރަށް ވޭންހުރި ތަދުވާ ކަމެކެވެ. ބަދިގޭގައި ކައްކަން އުޅޭއިރު ކުދި ކުދި ތަންތަން ބައެއް ފަހަރު ފިހުމަކީ ކައްކަން އެންމެ ކުޅަދާނަ ބޭފުޅުންނަށްވެސް ދޭތެރެއަކުން ދިމާވާ ކަމެކެވެ. މިގޮތަށް ފިހޭ ތަންތަނަށް ފަރުވާ ދޭންވީގޮތް އެނގިފައި އޮތުން ވަރަށް މުހިންމެވެ. ސަބަބަކީ ފިހޭ ތަންކޮޅު ކިތަންމެ ކުޑަ ނަމަވެސް އެކަށީގެންވާ ފަރުވާ ނުލިބިއްޖެ ނަމަ ފާރު ހެދި އިތުރަށް ބޮޑުވަރު ވެދާނެތީވެއެވެ. ކުޑަކޮށް ފިހޭތަންތަނަށް ގޭގައި އަމިއްލަ އަށް ފަރުވާދޭން ވަރަށް ފަސޭހަ ވާނެއެވެ. ނަމަވެސް ހަންގަނޑުގެ ހުރިހާ ފަށަލައެއް ފިހިފައިވާ ނަމަ އަވަހަށް ހޮސްޕިޓަލަކަށް ދާން ވާނެއެވެ.
ފިހިފައިވާ ކުދި ކުދިތަންތަނަށް ފަރުވާ ދެވިދާނެ ގޮތް ތިރީގައި މިވަނީއެވެ.
- ތަނެއް ފިހޭ ވަގުތު ވީހާވެސް އަވަހަކަށް ކުޑަކޮށް ފިނި ފެން ހިނގަމުންދާ ގޮތަށް 10 ވަރަކަށް މިނެޓު ވަންދެން އަޅަމުން ގެންދާށެވެ. މިގޮތަށް ފެން އެޅުމުން ފިހުނުތަން އަވަހަށްފިނިވެ ތަަދާއި ދުޅަވުން ކުޑަ ކޮށްދެއެވެ.
- ފިހުނު ހިސާބުގައި އަނގޮއްޓި ފަދަ އެއްވެސް ގަހަނާއެއް ވާނަމަ އަވަހަށް ނަގާށެވެ. ފިހުނު ހިސާބުގައި ގަހަނާ ހުރުމުން އިތުރަށް ހޫނު ބަންދުވެ، ދުޅަ ވެއްޖެނަމަ ލޭ ދައުރުވުމަށްދަތިވެއެވެ.
- ފޮޅު ނަގައިފި ނަމަ ނުފަޅާށެވެ. ފިހޭ ތަންތާގައި އެތެރޭގައި ފެން ހުންނަ ފޮޅު ނަގަނީ އިންފެކްޝަން ތަކުން ރައްކާތެރި ކުރުމަށެވެ. ފޮޅެއް ހަލާކުވެ ފަޅައިގެން ގޮއްސި ނަމަ ފެންކޮޅަކުން ސާފު ކޮއްލުމަށް ފަހުގައި އެންޓިބައޮޓިކް ބޭސް ކޮޅެއް އުނގުޅާލާށެވެ.
- ފިހުނު ތަންކޮޅުން އެއްކޮން ހޫނުކަން ކެނޑުމުން ލޯޝަން ކޮޅެއް ނުވަތަ އެލޯވެރާ ކޮޅެއް އުނގުޅާލާށެވެ. މިހެން ހެދުމުން އެތަންކޮޅު މާ ބޮޑަށް ނުހިކި ތަދު ކުޑަވާނެއެވެ.
- ފިހުނު ތަނުގައި ދޫކޮށް ބެންޑޭޖު ކޮޅެއް އަޅާލާށެވެ. ބެންޑޭޖު ކުރުމަށް ކަފައިގެ ބަދަލުގައި ބޭނުން ކުރަންވާނީ ސްޓެރައިލް ގޯޒް ކޮޅެކެވެ. ބެންޑޭޖު ކުރުމުން ފިހުނުތަނުގައި ވައިނުޖެހި ފޮޅު ހަލާކުވުމުން ސަލާމަތް ކޮށްދެއެވެ.
މިފަދައިން ފިހޭ ތަންތަނަށް ފަރުވާ ކޮއްފިނަމަ އިތުރަށް ބޮޑުވަރު ނުވެެ އަވަހަށް ފަސޭހަވުމުގެ ފުރުސަތު ބޮޑެވެ. އެންމެ ރައްކާތެރި ގޮތަކީ ބަދިގޭގައި ކައްކަން އުޅުނަސް، އިސްތިރި ކުރިޔަސް އަދި ހޫނު އެއްޗެއް އެހެން ގޮތަކުން ގެންގުޅުނަސް ވީހާވެސް ބަލައިގެން ފަރުވާތެރިކަމާއެކު އުޅުމެވެ.