މީގެ ވިއްސަކަށް ފަނަރަ ވަރަކަށް އަހަރު ކުރިއެވެ. ރާއްޖޭގެ ފިލްމްތަކާއި ލަވަތަކުންވެސް ވަރަށް ގިނައިން ފެންނަ މަންޒަރެކެވެ. އެކުގައި ދިރިއުޅުން ވެއަތުކުރުމަށް ވަޢުދުވެ ކައިވެންޏާއި ހަމައަށް އަންނަ ފަހުން ތެލަސީމިޔާ ދެ ކެރިއަރުންނަށް ވުމުން އެގުޅުން އެހިސާބުން ކެނޑޭ މަންޒަރެވެ. ނަމަވެސް ދެމީހުން ދެމީހުނާ އިނދެގެން ވެސް އެކަކު އަނެކަމަށް ދެރައެއް ގެއްލުމެއް ލިބުނަ ނުދީ ދިރިއުޅުން ކުރިއަށް ގެންދާ މަންޒަރެވެ. ބައެއް ފަހަރު އެކަކު ހުންނަނީ އުމުރު ދުވަހު ހުސްހަށިބަޔަކެވެ. ހިތުއަޅައިގެން އުޅުނު ބައިވެރިޔާއާއި އެކުގައި ވެވެން ނެތުމުން އެހެން މީހަކާއި އެކުގައި އުޅެން ބޭނުން ނުވެފައެވެ. އެކިއެކި ސަބަބުތައް މެދުވެރި ވެގެން ކައިވެންޏަށް ހުރަސް އެޅުމުން ހުސްހަށިބައިކަމުގައި މުސްކުޅިވެގެން ދިޔަ އެތައް ބަޔަކު އަޅުގަނޑުމެންގެ ކޮންމެ ރަށަކުން ހެން ކަހަލަ ގޮތަކަށް ފެންނަންހުންނާނެއެވެ. ރާއްޖެއަކީ މާގިނަ ގިންތިތަކެއް އޮންނަ ގައުމެއް ނޫނެވެ. އެހެން ނަމަވެސް ފަގީރު އާއިލާއަކަށް ނިސްބަތްވުމުން އަނެއް އާއިލާގެ ފަރާތުން ކައިވެނި ކުރުމަށް ރުހުން ނުދިނުމުން މިހެން ހުސްހަށިބަޔަށް ތިބޭ މީހުންވެސް ވަރަށް ގިނައެވެ. ހިތުގައި އޮތް ލޯބި ހިތުގައި ބާއްވައިގެން މުޅި އުމުރު ހުސްކޮށްލުމަކީ ވަރަށް ކެތްތެރިކަން ބޭނުންވާނޭ ކަމެކެވެ. ބައިވެރިއެއްގެ އެހީތެރިކަން ބޭނުންވާނޭ ވަރަށް ގިނަ ޙާލަތްތައް ކޮންމެ ދުވަހަކު އާދެއެވެ. މި ދައްކަނީ އުމުރެއްގެ ވާހަކަ އެވެ. ބަލިވާ ވަގުތު ވެސް އަންނާނެއެވެ. ކަންކަމުގައި މަޝްވަރާ ކޮށްލާނެ މީހަކުވެސް ބޭނުންވާނެއެވެ. އެހެންކަމެއް ނެތިއްޔާ ހިތުގައި ހިނގާ އެކިއެކި ޚިޔާލުތައް ހިއްސާކޮށްލަންވެސް މީހަކު ބޭނުންވެއެވެ. މީގެ އެންމެ ހިތާމަވެރި ހިސާބަކީ މިހެން ހުރެ މުސްކުޅިވާ ދުވަހު ކައިރީގައި ދަރިއަކުވެސް ނެތުމެވެ. ހިތުގައި ގަދަރު ދެވުނު ފަރާތުގެ ހަނދާނުގައި އަދި އެފަރާތަށް ކުރާ އިހްތިރާމްގައި މިހެން ދުވަސްތައް ވެއަތުކޮށްލަން ވަރަށް ހިތްވަރު ބޭނުންވާނެއެވެ.
ފާހީޝްކަމާ ނުލާވެސް މީހަކަށް މީހަކު ދެކެ ލޯބިވެވިދާނެއެވެ. މީހެއްގެ ދިރިއުޅުމުގައި ހުރި ދަތިކަމެއްގެ ވާހަކަ ހިއްސާކުރެވިގެންވެސް މީހަކަށް މީހަކު ދެކެ ލޯބިވެވިދާނެއެވެ. މީހެއްގެ ހުރި ރަގަޅު އަޚްލާގެއް ނުވަތަ ސިފައެއްގެ ސަބަބުން ވެސް މީހަކަށް އެހެންމީހަކު ދެކެ ލޯބިވެވިދާނެއެވެ. މީހަކު އެމީހެއްގެ ޒާތީ ދިރިއުޅުމުގައި ތަހައްމަލު ކުރާ ވޭނެއް އިހްސާސްކުރެވިގެން ވެސް އަނެކާގެ ހިތުގައި އެމީހަކަށް ޚާއްސަ މަގާމެއް ދެވިދާނެއެވެ. ނަމަވެސް މިފަދަ ޙާލަތްތަކުގައި އެކަކީ ޒަވާޖީ ހަޔާތެއްގައި ހުރި މީހެއްނަމަ މިގުޅުން އިތުރު ހަރުފަތަކަށް ނުދާނެއެވެ. ނަމަވެސް އިޙްތިރާމްކުރުމާއި އަޅާލުން އެއީ ދެވޭނެ އެއްޗެއްކަން އެތައް ބައެއްގެ ފަރާތުން ފެންނަން އެބަ ހުއްޓެވެ. ކޮންމެ މީހެއްގެ ދިރިއުޅުމަށް ބަލާލި ނަމަވެސް ދުރުގައި ހުރެގެން އެމީހަކު ދެކެ ލޯބިވާ މީހަކު ހުރުން ވަރަށް ގާތެވެ. މިފަދަ މީހުންގެ މެދުގައި ނުބައި ގުޅުން ތަކެއް ނުހިނގާ، މާގިނަ މުޢާމަލާތްތަކެއް ނުކުރެވުނު ނަމަވެސް އަނެއްމީހާގެ ހިތުގައި ދެވިފައިވާ އިޙްތިރާމް އެނގެއެވެ. ކޮންމެ މީހަކުވެސް އެދެނީ އަނެކާ ހެޔޮހާލުގައިވެ، އުފަލުގައި ހަޔާތް ވެއަތު ކުރާށެވެ. އެއްވެސް އަނިޔާއެއް ޖެއްސުމެއް ކުރާކަށް ނޭދެވެއެވެ. ހިނިތުންވުން ގެނުވާ ކަމެއްގައި ނޫނީ ހަނދާންކުރާކަށް ބޭނުމެއް ނުވެއެވެ. ހިތްދަތިވެދާނެ ކަމެއް ކުރުން އެއްކިބާގައި އޮއްވާ ބަހެއް ބުނަންވެސް ބޭނުން ނުވެއެވެ. މި ދުނިޔޭގައި އެކުގައި ވުމަކީ މުހިންމުކަމެއް ކަމަށް ނުދެކެއެވެ. މިކަން އެންމެ ރަގަޅަށް އެނގޭނީ މިކަން އިޙްސާސްކޮށްފައިވާ ފަރާތަކަށެވެ.
އެކީގައި ޒަވާޖީހަޔާތެއްގައި އުޅޭ ދެމީހެއްގެ ދެމެދު މައްސަލަ ޖެހި އަޑުހަރުކޮށް ބައެއް ފަހަރު ބަސްބުނުން އެއީ އާންމު ކަމެކެވެ. މިހެން ބުނާއިރު ދެން ހުންނަ މީހާގެ ހިތް ފަޅައިގެންދާވަރުގެ އެއްޗެހި ބުނެވޭ ފަހަރުވެސް އާދެއެވެ. ނަމަވެސް ދުރުގައި ހުރެގެން ލޯބިވާ މީހަކާ ކުރާނެ ޒުވާބެއް ޖެހޭނެ މައްސަލައެއް ނޯންނާނެއެވެ. ލޯބިވާ މީހަކު ހުރިކަން އެނގި ލިބޭ ހިތްހަމަ ޖެހުމާއި، ލޯބިވާ މީހާ އުފަލުގައި ހުރުން އެދި ކުރެވޭ އުއްމީދު ނޫން އެއްޗެއް ނުވެއެވެ. އެކަކުގެ ސަބަބުން އަނެކަކު ބަދުނާމް ވާނެ އެއްވެސް ކަމެއް ނުކުރަން ކަނޑައެޅި ޢަޒުމްގެ ވަރުގަދަ ކަމާއެވެ. ލޯބި ލިބުމެއްނެތި ލޯބިދޭން ކުރި ވަޢުދުގެ ފުރިހަމަ ކަމާއެވެ. ދުރުގައި ހުރެގެން އަބަދުވެސް ހެޔޮ ހާލުގައި ހުރިކަން ޔަގީންކުރުމަށް ދެއްކި ސާބިތުކަމާއެވެ. ކޮން ފަދަ ފުރިހަމަ އިހުސާސެއް ހެއްޔެވެ؟
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން