ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ފާދިއްޕޮޅު ހިންނަވަރު ހިންނަވަރާއި، އޮޅުވެލިފުށީ ކައުންސިލް އަދި އެ ދެ ރަށުގެ ޑަބްލިއުޑީސީއާ ބައްދަލުކުރައްވައިފިއެވެ.

ހިންނަވަރު ކައުންސިލާއި ޑަބްލިއުޑީސީ އާއެކު ބޭއްވޫ މިބައްދަލުކުރެއްވުން އޮތީ ޅ. އަތޮޅު ތައުލީމީ މަރުކަޒުގައެވެ.

މި ބައްދަލުކުރެއްވުމުގައި ކައުންސިލުން ފާހަގަކުރެއްވި ކަންތައްތަކުގެ ތެރޭގައި ކަރަންޓުގެ މައްސަލަތައް ހައްލުކުރުމަށް ބޭނުންވާކަމަށާއި ބަނދަރަށް ގެންނަން ބޭނުންވާ ބަދަލާއި ބިންހިއްކާފައިވާ ސަރަޙައްދަށް ފެނާއި ނަރުދަމާ އަދި ކަރަންޓުގެ ޚިދުމަތް އަވަހަށް ލިބޭނެ އިންތިޒާމު ހަމަޖެއްސުމާއި 50 ފްލެޓް އަދި 50 ރޯހައުސް ތަރައްޤީކުރުމުގެ މަޝްރޫޢުގެ މަސައްކަތް އަވަހަށް ނިންމުމަށް އެދުން ހިމެނެއެވެ. މީގެ އިތުރުން ކައުންސިލު އިދާރާއަށް އައު އިމާރާތުގެ މަސައްކަތް އަވަސްކުރުމާއި މިހާރުހުރި އޭޓީއެމްގެ އިތުރުން ބޭންކުގެ އައުޓްޕޯސްޓެއް ރަށުގައި ގާއިމުކުރުމާއި ރަށުގެ އިޤުތިޞާދީ އިޖުތިމާއީ ތަރައްޤީއަށް މުހިންމުކަންތައްތައް ކައުންސިލުން ފާހަގަކުރެއްވިއެވެ.

މިބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރެއްވި މުހިންމު ކަންތައްތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ. އަދި ކައުންސިލުން ފާހަގަކުރެއްވި ކަންކަން ބައްލަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ، އޮޅުވެލިފުށީ ކައުންސިލާއި ޑަބްލިއުޑީސީ އާއެކު ބޭއްވި ބައްދަލުކުރެއްވުމުގެ ތެރެއިން. --ފޮޓޯ: ރައީސް އޮފީސް

 

ރައީސުލްޖުމްހޫރިއްޔާ، ފާދިއްޕޮޅު އޮޅުވެލިފުށީގެ ކައުންސިލާ ޑަބްލިއުޑީސީއާ ބައްދަލުކުރައްވައި ރަށުގެ ތަރައްޤީއަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައިފި

ރައީސުލްޖުމްހޫރިއްޔާ، ޅ. އޮޅުވެލިފުށީގެ ކައުންސިލާއި ޑަބްލިއުޑީސީއާ ބައްދަލުކުރައްވައި ރަށުގެ ތަރައްޤީއަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައިފިއެވެ. މި ބައްދަލުކުރެއްވުން އޮތީ މިއަދު ކުރެންދޫ ޙަބަޝީ ޕްރީސްކޫލުގައެވެ.

މި ބައްދަލުކުރެއްވުމުގައި ކައުންސިލުން ފާހަގަކުރެއްވި ކަންކަމުގެ ތެރޭގައި ބަނދަރުގެ މަސައްކަތް ނުފެށި އޮތުމުގެ ކަންބޮޑުވުންތަކާއި ފެނާނަރުދަމާ ނިޒާމުގެ މަސައްކަތް ވީ އެންމެ އަވަހަށް ނިންމައިދިނުމަށް އެދުމާއި ކަރަންޓުގެ ޙާލަތު ރަނގަޅުކުރަން ބޭނުންވާކަމަށާއި އަދި ޚާއްސަގޮތެއްގައި ސީއެމްބިއުލަންސް ގެ ޚިދުމަތް މިހާރަށްވުރެ ފަސޭހައިން ލިބޭނެ މަގުފަހިކުރުން ހިމެނެއެވެ.

މި ބައްދަލުކުރެއްވުމުގައި އ.ތ.މ. ކޮމިޓީން ވަނީ ކޮމިޓީގެ މެންބަރުންނަށް ރޯދައިނާޔަތް ހަމަޖެހިފައި އޮތުމުގެ މުހިންމުކަމާއި ބަޖެޓުގެ ދަތިކަމާހުރެ އެކޮމިޓީގެ އިމާރާތުގެ މަރާމާތުގެ މަސައްކަތްތައް ކުރިޔަށް ނުގެންދެވި ވާތީ އެކަމުގެ ކަންބޮޑުވުން ފާޅުކުރައްވާފައެވެ.

މިބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރެއްވި މުހިންމު ކަންތައްތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ. އަދި ސީއެމްބިއުލާންސްއާ ގުޅޭގޮތުން ފާހަގަކުރެއްވި ކަންކަމަށް ހައްލެއް ހޯދަވައިދެއްވާނެކަމުގައި ވެސް ރައީސުލްޖުމްހޫރިއްޔާ ވިދާޅުވިއެވެ.