އުރީދޫ މޯލްޑިވްސް ޕލކ އަށް މިދިޔަ އަހަރު ލިބުނު ފައިދާއިން ހިއްސާއަކަށް 3.27ރ. ބަހަން އެ ކުންފުނީގެ އަހަރީ އާންމު ޖަލްސާގައި ފާސްކޮށްފިއެވެ.
މިދިޔަ ބުރާސްފަތި ދުވަހުގެ ރޭ ހުޅުމާލޭ ސެންޓްރަލް ޕާކްގައި ބޭއްވި އެ ކުންފުނީގެ އަހަރީ އާންމު ޖަލްސާގައި މުޅިއެކު 1،764 (އެއްހާސް ހަތް ސަތޭކަ ފަސްދޮޅަސް ހަތަރު) ހިއްސާދާރުން ބައިވެރިވިއިރު، އޭގެތެރެއިން 123 ހިއްސާދާރުން ހާޟިރުވެ، 60 އެއްހާ ޕްރޮކްސީހޯލްޑަރުން ބައިވެރިވެފައިވެއެވެ.
އުރީދޫން މި ފަހަރު ހިއްސާއަކަށް ބަހަން ނިންމީ އޭގެ ކުރީ އަހަރަށްވުރެ 23 ލާރި އިތުރު އަދަދެކެވެ. އެ ކުންފުނިން 2022 ވަނަ އަހަރުގެ ފައިދާ އިން ހިއްސާދާރުންނަށް ބެހީ ހިއްސާއަކަށް 3.04ރ. އެވެ.
އުރީދޫން އިން ވަނީ މި ޖަލްސާގައި މިދިޔަ އަހަރުގެ އޮޑިޓްކޮށްފައިވާ މާލީ ބަޔާންތަކާއެކު އޮޑިޓާސް ރިޕޯޓާއި، ޑައިރެކްޓާސް ރިޕޯޓް އަދި މި އަހަރުގެ އޮޑިޓަރުގެ ގޮތުގައި ކޭޕީއެމްޖީ ހަމަޖައްސަން ވެސް ފާސްކޮށްފައެވެ.
މީގެއިތުރުން، އުރީދޫން ވަނީ އާއްމު ހިއްސާދާރުންގެ ޑިރެކްޓަރެއްގެ ގޮތުގައި މުޙައްމަދު ޝާހިދު އައްޔަންކޮށް، އަދި އެ ކުންފުނީގެ ބޯޑަށް އަލުން އިންތިހާބުވި ދީނާ ހުސެއިން އާއި ސުރޭޝް ކަލްޕާތީ ޗިދަމްބަރަމް އައްޔަންކުރުމަށް މެޖޯރިޓީ ހިއްސާދާރު، ވަތަނިއްޔާ އިންޓަނޭޝަނަލް އެފްޒެޑް އެލްއެލްސީ އިން ވަނީ ފާސްކޮށް، ބޯޑަށް ހުށަހަޅައިފައެވެ.