ކުރިއަށް އޮތް ރަމަޟާން މަހުވެސް ކާބޯތަކެތި ކްލިއަރ ކުރުމުގެ މަސައްކަތް ހަލުވިކަމާއެކު ކުރިއަށްދާނެ ކަމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.

އެމްޕީއެލް އިން މިކަން ޔަޤީންކޮށްދެއްވައިފައިވަނީ މިއަދު އެކްސްގައި ކުރި ޕޯސްޓެއްގައެވެ.

އެގޮތުން، މާލޭ ވިޔަފާރި ބަނދަރުގައި މިއަދުވެސް ގިނަ އަދަދެއްގެ ކާބޯތަކެތި ބޯޓުތަކުން ބާލައި، ކްލިއަރ ކުރުމުގެ މަސައްކަތްތައް ހަލުވިކަމާއެކު ކުރިއަށްދާ ކަމަށް އެމްޕީއެލް އިން ވަނީ ބުނެފައެވެ.

"ބަރަކާތްތެރި ރަމަޟާން މަހާ ދިމާކޮށް މާލޭ ވިޔަފާރި ބަނދަރުން ފާއިތުވި ދެތިން ހަތަރު ދުވަހު ގިނަ އަދަދެއްގެ ކާބޯތަކެތި ވަނީ އެތެރެކޮށްފައި." އެމްޕީއެލްގެ ޕޯސްޓްގައިވެއެވެ.

އަދި ރަމަޟާން މަހަށް ގެންނަ ކާބޯތަކެތި ވީހާވެސް އަވަހަށް ކްލިއަރ ކުރުމަށް އެ ކުންފުނިން ޚާއްޞަ ސަމާލުކަމެއްދޭ ކަމަށާއި، މިދިޔަ ހުކުރު ދުވަހުވެސް މުދާ ކްލިއަރކުރުމުގެ މަސައްކަތްތައް ކުރިއަށް ގެންގޮސްފައިވާ ކަމަށް ވެސް އެމްޕީއެލް އިން ވަނީ ބުނެފައެވެ.