ރާއްޖޭގެ ގައުމީ އެއަރލައިން، މޯލްޑިވިއަން އިން އެއާ އެމްބިއުލާންސްގެ ޚިދުމަތަށް ސީޕްލޭން މަތިންދާބޯޓެއް އިތުރުކޮށް ޚިދުމަތްދޭން ފަށައިފިއެވެ.
އައިލެންޑް އޭވިއޭޝަނުން ބުނީ، ކުއްލި ސިއްހީ ޚިދުމަތްތައް އިތުރަށް ފުޅާކުރުމަށްޓަކައި މި މަޝްރޫޢު ކުރިއަށްދަނީ މިނިސްޓްރީ އޮފް ހެލްތު، އެންސްޕާ، އާސަންދަ ލިމިޓެޑާއި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންއާ ގުޅިގެން ކަމަށެވެ.
ސަލާމަތީ ގޮތުން ރައްކާތެރި އަދި އިތުބާރު ކުރެވޭ ގޮތަށް ފަރުމާކޮށްފައިވާ ޑީއެޗްސީ-6 ޓްވިން އޮޓަރގައި އެއާ އެމްބިއުލާންސްގެ ޚިދުމަތްތައް ފޯރުކޮށްދިނުން ވެގެންދާނީ ރައްޔިތުންނަށް ސިއްޙީ ގޮތުން ލިބިގެންދާނެ ބޮޑު ކުރިއެރުމެއް ކަމަށް އައިލެންޑް އޭވިއޭޝަނުން ބުނެއެވެ.
މި ސީޕްލޭންގައި ރާއްޖޭގެ ރަށްތަކަށް އޮޕަރޭޓް ކުރުމުގެ ޤާބިލްކަން ލިބުމުގެ އިތުރުން ޒަމާނީ އިމާޖެންސީ މެޑިކަލް ވަޞީލަތް ހަރުކުރެވިފައިވާނެ ކަމަށް ވެސް އައިލެންޑް އޭވިއޭޝަނުން ވަނީ ބުނެފައެވެ.
ސަރުކާރުން ވެފައިވާ ވަޢުދުތަކުގެ ތެރެއިން ޑޭޝް8-200 މަރުކާގެ މަތިންދާބޯޓު ބޭނުންކޮށްގެން، އެއާ އެމްބިއުލާންސްގެ ޚިދުމަތް ފެށީ މި މާރިޗް މަހުގެ 01 ވަނަ ދުވަހު އެވެ. އަދި މިއަދާ ހަމައަށް އެއާ އެމްބިއުލާންސް ބޭނުންކޮށްގެން 25 އަށް ވުރެ ގިނަ މެޑިކަލް ދަތުރުތައް ފުރިހަމަކޮށްފައިވާކަމަށް ވެސް އައިލެންޑް އޭވިއޭޝަނުން ނެރުނު ނޫސް ބަޔާންގައިވެއެވެ.