އުރީދޫ މޯލްޑިވްސް އިން ރޯދަމަހު ކުރިއަށް ގެންދާ ސިލްސިލާ ކޮމިއުނިޓީ އިފްތާރު ގެ މިއަހަރުގެ ފުރަތަމަ އިފްތާރު އިއްޔެ (ހުކުރު 15 މާރިޗު)ގައި ބާއްވައިފިއެވެ.
އިއްޔެގެ ރޯދަ ވިއްލުމުގައި ސަލްމާން މިސްކިތުގެ ގޯތިތެރޭގައި 200އަށް ވުރެ ގިނަ މީހުންވަނީ ބައިވެރިވެފައެވެ.
މި ރޯދަމަހުގެ ކުރިއަށް ހުރި ހުކުރު ދުވަސްތަކުގައިވެސް އުރީދޫގެ ކޮމިނިޓީ އިފްތާރު ސަލްމާނު މިސްކިތުގެ ގޯތިތެރޭގައި ކުރިއަށްދާނެ ކަމަށާއި، މި ރޯދަވިއްލުމުގައި ކޮންމެ ބޭފުޅަކަށްވެސް ބައިވެރިވެވޭނެ ކަމަށް އުރީދޫން ބުނެއެވެ. އަދި މިރޯދަމަހުގެ ކޮންމެ ހުކުރު ދުވަހެއްގައިވެސް ހުރިހާ އެންމެނަށް ހުޅުވާލައިގެން މި ރޯދަވިއްލުން ބޭއްވޭނެއެވެ.
ކޮމިއުނިޓީ އިފްތާރެއް ބޭއްވުމުގެ ބޭނުމަކީ ގިނަ ބަޔަކަށް އެއް ސުފުރާ މަތީގައި ހިތްހަމަޖެހިގެން ރޯދަ ވިއްލުމުގެ ފުރުސަތު ހޯދަ ދިނުން ކަމަށް އުރީދޫން ވަނީ ބުނެފައެވެ.
އަދި މިގޮތަށް ބޭއްވޭ އިފްތާރް ކަހަލަ އިވެންޓްތަކުގެ ޛަރިއްޔާއިން އާއިލާއާ ދުރުގައި ދިރިއުޅޭ ފަރާތްތަކަށްވެސް އެއީ މުޖުތަމަޢުގެ މުހިންމު ބައެއްކަން ހަނދާންކޮށްދެވިގެންދާނެ ކަމަށް އުރީދޫން ބުނެއެވެ.
މިއީ އުރީދޫގެ ސީ.އެސް.އާރު ހަރަކާތްތަކުގެ ތެރެއިން ރޯދަމަހު ކުރިއަށްގެންދާ ހަރަކާތެކެވެ.