ސެންޓްރަލް ރީޖަންގެ ރަށްތަކުގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން ތިން ރަށެއްގައި މިވަގުތު ހިނގަމުންދާ މަސައްކަތްތަކުގެ ތަފްޞީލް އާރްޑީސީ އިން އާންމުކޮށްފިއެވެ.
އެގޮތުން، ސެންޓްރަލް ރީޖަންގައި ހިމެނޭ ނ. ހޮޅުދޫ، މ. މުލައް އަދި ދ. ކުޑަހުވަދޫގައި މިހާރު ކުރިއަށްދާ މަސައްކަތްތަކުގެ ތަފްޞީލް އާރްޑީސީ އިން ވަނީ ދީފައެވެ.
ނ. ހޮޅުދޫގައި މިވަގުތު ކުރަމުންދަނީ، ޓިއުލިޕް ހިނގުމުގައި ޖަންކްޝަން ބެހެއްޓުމުގެ މަސައްކަތާއި، ސައިޓުގައި ކާރބްސްޓޯން އެޅުމުގެ މަސައްކަތެވެ.
ހޮޅުދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މި މަސައްކަތަކީ 71 މިލިއަން ރުފިޔާގެ މަޝްރޫޢެކެވެ. މި މަސައްކަތް ކުރުމަށް އާރްޑީސީ ހަވާލުކުރީ 2022 ވަނަ އަހަރުގެ އޮކްޓޫބަރު މަހު އެވެ.
މ. މުލަކުގައި މިހާރު ކުރަމުންދަނީ ހުސޭނީ މަގުގައި ކޭބަލް ޖަންކްޝަން ހުރަސް ހޮޅި އެޅުމުގެ މަސައްކަތާއި، އެ މަގުގެ ބެކްފިލިންގ އަދި ސާފު ކުރުމުގެ މަސައްކަތެވެ. މީގެއިތުރުން، ޗާންދަނީ މަގުގައި ސްޓޯރމް ވޯޓަރ ޓޭންކް ބެހެއްޓުމަށް މަގު ކޮނުމުގެ މަސައްކަތާއި، އަމީނީމަގުގައި ސްޓޯރމް ވޯޓަރ ޓޮޕް ލެވެލް ކާސްޓް ކުރުމުގެ މަސައްކަތް ވެސް މިވަގުތު ކުރިއަށްއެބަދެއެވެ.
މުލަކުގެ މަގުތައް ހެދުމުގެ މަސައްކަތްކުރުމަށް އާރްޑީސީއާ ހަވާލުކޮށްފައިވަނީ 2021 ވަނަ އަހަރުގެ އޭޕްރީލް މަހުގެ ތެރޭގައި 106.2 މިލިއަން ރުފިޔާ އަށެވެ.
ސެންޓްރަލް ރީޖަންގެ ރަށްތަކުގެ ތެރެއިން މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް މިހާރު ކުރަމުންދާ އަނެއް ރަށަކީ ދ. ކުޑަހުވަދޫ އެވެ.
ކުޑަހުވަދޫގައި މިހާރު ކުރަމުންދަނީ ފަރީދީ މަގުގައި ސްޓޯރމް ވޯޓަރ ނެޓްވޯކް އެޅުމަށް މަގު ކޮނުމުގެ މަސައްކަތާއި، ކުރިވާ ހިނގުމުގައި ޓްރީ ޕިޓް ފިނިޝިންގ ގެ މަސައްކަތެވެ. ކުޑަހުވަދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް އާރްޑީސީއާ ހަވާލުކޮށްފައިވަނީ 2021 ވަނަ އަހަރުގެ ސެޕްޓެންބަރު މަހުގައި 122.86 މިލިއަން ރުފިޔާ އަށެވެ.