ބަނދަރު މައްޗަކީ ވަރަށް ތަފާތު މަންޒިލެކެވެ. އެކި ކަހަލަ އިހުސާސަތައް އެތަނަކާ ގުޅިފައިވާ މަންޒިލެކެވެ. ދެކިލަން ބޭނުންވާ، ގޮސްލަން ބޭނުންވާ ތަނެކެވެ. ރާއްޖޭގެ އަތޮޅުތެރޭގެ ރަށްތަކުގައި އަމުދުން މިއީ އާއްމު ކަމެކެވެ. ވަކި އުމުރެއް، ވަކި ޖިންސެއް ކިޔާނެކަމެއް ނެތެވެ. ވަކި ވަގުތެއް ވަކި އިރެއްވެސް ކިޔުމެއް ނެތެވެ.

ހާސްކަން ބޮޑު ވަޒީފާގެ މާހައުލާ، ފިކުރުބޮޑު މަދަރުސާގެ މާހައުލާ، ބުރަބޮޑު ގޭތެރޭގެ މަސައްކަތްތަކުން އަވަދިވެ، ލިބޭ ކުޑަ ވަގުތުކޮޅުގައިވެސް ބޮލަށް ވެރިވެފައިވާ ބުރަކަން ލުއިކޮށްލަން ބަނދަރަށް ނުކުމެލާ އުޅޭ ދަރިވަރުންނާއި މީހުން މަދެއް ނޫނެވެ. އެކުވެރިން އެއްވެލާ ވާހަކަ ދައްކާލަން ވެސް ކޮފީ މޭޒުތަކޭ އެއްފަދައިން ބަނދަރުމަތީގެ ހިތްގައިމު މަންޒިލްތަކަކީވެސް ގިނަ ބަޔަކު އިހްތިޔާރު ކުރާ ތަންތަނެވެ. ރޭގަނޑުގެ ކެއުމަށްފަހު، ނިދަން އޮށޯތުމުގެ ކުރިން، އެއްކަލަ ބަނދަރަށް ދެވެން އޮތްނަމަ، ބަނދަރުމައްޗަށް އަރާނުލާ ހިތްހަމަ ނުޖެހޭ މީހުން އުޅެއެވެ.

މި ރަމަޟާންމަހުގައިވެސް އެ މަންޒަރު އެބަ ފެނެއެވެ. ރާއްޖޭގެ އެކި ކަންކޮޅުތަކުން މި މަންޒަރު ފެންނަނީ ސަގާފީ އާދަކާދައެއް ފަދައިންނެވެ. ދަމުނަމާދުކޮށް އަވަދިވެގެން، މިސްކުތުން ފައިބައިގެން، ހާރު ކެއުމާ ދޭތެރޭ ބަނދަރު މައްޗަށް ނުކުމެލާ މީހުން މަދެއް ނޫނެވެ. ހާރު ކައިގެން ފަތިސްނަމާދު ކުރުމުގެ ކުރިންވެސް އެފަދައެވެ. އަދި ފަތިސް ނަމާދުކޮށްގެންވެސް އެ ބަނދަރުގެ އެ ހަމަހިމޭން މަންޒިލްގެ ރާހަތު ހޯދާލަން ބަނދަރަށް ނުކުމެލާ މީހުން މަދެއް ނޫނެވެ. މެންދުރުގެ އަވި ބާރު ވަގުތުގައިވެސް ބަނަދަރުމަތީ ހިޔަލެއްގައި މަޑުކޮށްލައިގެން ތިބުން އެއީ ހިތްހަމަ ޖެހޭ ކަމެއް ކަމުގައި ވެއެވެ. ހަވީރު ފިންޏަށް ކުޑަކުދިން ގޮވައިގެން ބުރެއް ޖަހާލަން ނުކުތަސް، ބަނދަރަކީ އެ ދަތުރުގެ މުހިއްމު މަންޒިލެކެވެ. ތަރާވީހަށް ފަހުންވެސް، ބަނދަރަށް ނުކުމެލުން އެއީ އަމުދުން ލިބޭ ހިތްހަމަ ޖެހުމެކެވެ. އެކުވެރިންނާއި އެކުގައެވެ. ލޯބިވާ މީހުންނާއި އެކުގައެވެ. އާއިލާ އާއި އަނބިދަރިންނާއި އެކުގައެވެ. 

ބަނދަރުމައްޗަކީ އިޖްތިމާއީ މަރުކަޒެކެވެ. އެކުވެންޏެކެވެ. ތަފާތު އެކި މިޒާޖުގެ މީހުން ނުކުމެ އުޅޭ ތަފާތު އެތައް ކަމެއް ހިނގާ ތަނެކެވެ. ތަނުގެ ގޮތުން މާ އާދަޔާހިލާފު ތަނަކަށް ބަނދަރު ނުވިއެއް ކަމަކު، އެއީ ހިތްހަމަ ޖެހުން ގެނުވާ މަންޒިލެކެވެ. އުޑާއި މޫދާއި، ފަޅާއި ކަނޑު، އަދި ޖެހޭ ވައި ރޯޅިތަކާއި ކަނޑުގައި ހުންނަ ރާޅު، މިއީ ހައްތަހާވެސް އެ ބަނދަރުން ހިތްހަމަ ޖެހުން ގެނުވާ ކަންކަންމެވެ. ލަފާ ފުރާ އުޅަނދުތަކާއި ގޮސް އައިސްވާ މީހުންނާއި އެނޫނަސް ބަނދަރުމަތީގެ ހަރަކާތްތަކަކީ ވެސް އެމަންޒަރު ބަލާ ބަޔަކަށް ޒާތެއްގެ އުފާވެރިކަމެއް ވެރިކުރުވާ ކަމެކެވެ. ބަނދަރަކީ ބައެއް ރަށްރަށުގައި މަސްވެރިކަމުގެ ހަރަކާތްތައް ވެސް ހިނގާ ތަނެކެވެ. މިއީ ބައެއް މީހުން އަމުދުން ހިތްހަމަ ޖެހޭ ކަމެއް ކަމުގައި ވެއެވެ.

ކޮންމެ އަކަސް އަތޮޅުތެރޭ ރަށްތަކުގެ އެ ހިމޭން ބަދަރު ތަަަކަކީ އެ ރަށްތަކުގެ ރަށްޔިތުންގެ އުފާވެރިކަމާ ގުޅިފައިވާ މަންޒިލެކެވެ. ދެ އެކުވެރި ދިމާވުމުން، ނުވަތަ ކޮފީއެއް ބޮއެ ނިންމާލުމަށް ފަހު، ނުވަދަ ދަރިވަރުންތަކެއް ކިޔަވާ އަވަދިވެގެން، "ބަނދަރަށް އަރައެއް ނުލާލަންހޭ" އަހާ ނުލާ ބަޔަކު އެ ރަށްތަކުގައި މަދުވާނެއެވެ. ޒަމާން މިއަދު ބަދަލުވެ، ފައި މަގުގައި ގޮސް އުޅޭ އުޅުން ނިމުމަކަށް އައިސްފިއެވެ. ގިނައިން ގޮސް އުޅެނީ ބައިސްކަލުތަކުގައްޔާއި ސައިކަލު ތަކުގައެވެ. ބައެއް މީހުން ފައިމަގުގައިވެސް ނުކުމެ އުޅެއެވެ. މަންޒަރު ދެކޭ ބަޔަކުވެސް އެ މަންޒަރުތަކުން އުފާ ކުރާނެއެވެ. މިއީ ދިވެހިންގެ ދިރިއުޅުމުގެ ވައްޓަފާޅީގައިވާ ހިނގާ އާދައިގެ އެހެނަސް އުފާވެެރި ހިތްހަމަ ޖެހޭ ކަމެކެވެ. ބަނދަރު ތަކަކީ އަބަދުވެސް އަމާންތަނެއް ކަމުގައި ވުމަށް މިބައިމީހުން އެދެއެވެ. އަދި މިކަމުގައި މުޖުތަމައުގެ ކޮންމެ އަފުރާދެއްގެވެސް ޒިންމާ އިންތިހާއަށް ބޮޑެވެ.