ލާމު އަތޮޅުގައި ތަރައްޤީކުރާ "މެރިޓައިމް ހަބް" މަޝްރޫޢު ކުރިއަށް ގެންދިއުމަށް އެމް.ޕީ.އެލް އާއި ޗައިނާގެ ކެމްސީ އިންޖިނިއަރިންގ ކޯ ލިމިޓަޑާއެކު ވަނީ ފަހުމުނާމާގައި މިރޭ ސޮއިކޮށްފައެވެ.
މި ފަހުމުނާމާގައި ސޮއިކުރީ ލާމު "އިންޓަރގްރޭޓަޑް ޑިވެލޮޕްމަންޓް ޕްރޮޖެކްޓްސް" އިފްތިތާޙް ކުުރުމަށް ލާމު ފޮނަދޫގައި މިރޭ އޮތް ރަސްމިއްޔާތުގައެވެ.
އެމް.ޕީ.އެލްގެ ފަރާތުން ސޮއިކުރެއްވީ ސީ.އީ.އޯ މުޙައްމަދު ވަޖީހް އިބްރާހިމެވެ. ޗައިނާގެ ކެމްސީ އިންޖިނިއަރިންގެ ފަރާތުން ސޮއިކުރެވީ ޖެނެރަލް މެނޭޖަރ ލީ ވެއިވެއި އެވެ.
ލާމު "މެރިޓައިމް ހަބް" އަކީ މެރިޓައިމް ދާއިރާގެ ތަފާތު ގިނަ ޚިދުމަތްތައް ފޯރުކޮށްދޭ، މެރިޓައިމްގެ ޒަމާނީ މަރުކަޒަކަށް ވެގެންދާނެއެވެ. އެގޮތުން، ބަންކަރިންގ އާއި ކްރޫޒް ޓާރމިނަލް އައި ޔޮޓް މެރީނާ އަދި ޓްރާންސްޝިޕްމަންޓް ބަނދަރަކީ މި ޕްރޮޖެކްޓްގެ ތެރޭގައި ހިމެނޭ މުހިންމު ބައިތަކެވެ.