ދަރިން ތަރުބިއްޔަތު ކުރުމަކީ އެކި ބެލެނިވެރިން އެކި ގޮތަށް ކުރާކަމެކެވެ. ކޮންމެ ކުއްޖަކީ ތަފާތު ކުއްޖަކަށް ވާފަދައިން ކޮންމެ ބެލެނިވެރިއެއްވެސް ތަފާތެވެ. ބައެއް ބެލެނިވެރިން ދަރިން ގެންގުޅެނީ އިންޓަނެޓާއި ޓެކްނޮލިޖީއާ މާ ގާތްނުކޮށެވެ. ނަމަވެސް އަނެއް ބަޔަކު އެކަމުގައި ކޮންޓްރޯލެއް ނުގެންގުޅެއެވެ. ކޮންމެ އާއިލާއަކަށް ބަލާލި ނަމަވެސް މިފަދަ ތަފާތުކަންކަން ފެންނަން ހުންނާނެއެވެ. ނަމަވެސް ދަރިންނާއި ބެލެނިވެރިންނާއި ދެމެދު ރަގަޅު ގުޅުމެއް އޮންނަ ނަމަ އެކަން ހާމަވާނެ ބައެއް ކަންކަމަށް މިއަދު ބަލާލާލަނަމެވެ.

  1. ދެފަރާތުން ވާހަކަ ދެއްކޭނެފަދަ މާހައުލެއް ގާއިމްވެފައި އޮތުން

ދިރާސާކުރާފަރާތްތަކުން ހާމަކުރާ ގޮތުގައި، ބެލެނިވެރިންނާއި ދަރިންނާއި ދެމެދު ވާހަކަދެކެވޭނެ މާހައުލެއް ގާއިމް ވެފައި އޮތުމަކީ ވަރަށް މުހިންމު ކަމެކެވެ. ދަރިއަކު ކަމަކާ ދެރަވެފައި ހުރިހެން ހީވާނަމަ ސީދާ ލޮލަށް ބަލަމުން ސުވާލު ކުރާށެވެ. އަދި އެކުދިން ވާހަކަ ދައްކާއިރު ވެސް ލޮލަށް ބަލަހައްޓައިގެން، ދައްކާވާހަކައަށް ސަމާލުކަން ދީގެން ހުންނާށެވެ. ދަރިފުޅުދައްކާ ވާހަކައަށް ސަމާލުކަން ދޭކަން ގަބޫލުކުރެވޭ ނަމަ ކުދިންނަށް އެކުދިންގެ އިޙްސާސްތައް ހިއްސާކުރަން ފަސޭހަވާނެއެވެ. ކުދިން ތަޖުރިބާ ކުރާ ކަންކަމާއި އެކުދިންގެ އިހްސާސްތައް ބެލެނިވެރިންނަށް އެނގުމަކީ ފަހުން ދެރައެއް ލިބިދާނެ ކަންކަމުން ދުރުވުމަށް އެޅޭ ވަރަށް މުހިންމު ފިޔަވަޅެކެވެ. ކޮންމެ ކަމަކާއި މެދުވެސް ވާހަކަ ދެކެވޭނަމަ ދަރިންނާއި މައިންބަފައިންނާއި ދެމެދު އޮންނަ ގުޅުން ވަރުގަދަ ވާނެއެވެ.

  1. ބެލެނިވެރިންވެސް ގޯސްކޮށް ކަމެއް ކޮށްފިނަމަ މަޢާފަށް އެދުން

ކަމަކާ ހިތްހަމަ ނުޖެހިގެން މައިންބަފައިންނާއި ދަރިންނާއި ދެމެދު ވާހަކަދެކެވި، ދަރިން ހިތުގައި ޖެހޭ އެއްޗެއް ބުނެވިއްޖެނަމަ ނުވަތަ ކަންކުރަން ނުވާ ގޮތަކަށް ކަމެއް ކުރެވިއްޖެނަމަ ބެލެނިވެރިންވެސް މަޢާފަށް އެދެން ޖެހޭނެއެވެ. އަބަދު ގޯސްހަދާނީ ދަރިންނެއް ނޫނެވެ. ބޮޑެތި މީހުނަށްވެސް ގޯސްކޮށް ކަންކަން ކުރެވޭނެއެވެ. މިފަދަ ޙާލަތްތަކުގައި މަޢާފަށް އެދުމަކީ ލަދުވެތިވާނެ ޖެހޭ ކަމެއް ނޫނެވެ. މިކަމުން ދަރިންނަށް ދައްކާދެވެނީ ގޯސްއެއްޗެއް ބުނެވި އެފަދަ ކަމެއް ކުރެވިއްޖެނަމަ އެކަމުގައި ހިފަހައްޓައިގެން ނުހުރެ މަޢާފަށް އެދުމަށްފަހު ގުޅުން އިތުރަށް ވަރުގަދަކޮށް ކުރިއަށް ގެންދިއުމުގެ ރީތި ސިފައެވެ.

  1. މުސްތަގުބަލަށް ދަރިފުޅު ދެކޭ ހުވަފެނުގައި ބައިވެރިވުން

ދަރިންގެ ކުރިމަށް އެކުދިން ދެކޭ ހުވަފެންތަކުގައި ބައިވެރިވެ އެކަމަކީ ދީނާއި މުޖުމަތަޢު ހުއްދަކުރާކަމެއް ނަމަ އެކަމުގައި ކުދިންނަށް އެއްބާރުލުން ދިނުމަކީ ވަރަށް މުހިންމު ކަމެކެވެ. ކުދިންގެ ކިބައިގައި ހުންނަ ހުނަރު ކުރިއަރުވާ އެކުދިންގެ ގާބިލްކަމަށް ފަޚުރުވެރިވާކަން ހާމަކުރަން ވާނެއެވެ. އަދި ކުދިންގެ ހުވަފެން ކާމިޔާބުކުރުމުގައި އެކުދިންނަށް އެއްބާރުލުންދޭން ވާނެއެވެ. ދިރާސާތަކުން އެނގޭގޮތުގައި ބެލެނިވެރިންގެ އެއްބާރުލުން ލިބޭ ކުދިން ދިރިއުޅުމުގައި ގިނަ ކާމިޔާބީތައް ހޯދައެވެ.

  1. ތާވަލުތައް ހަދައިންގެން އެއަށް އަމަލު ކުރުން

ދުވަހުގެ އެކިގަޑިތަކުގައި ކުރަން ހުންނަ ކަންކަން ރާވާލާ ތަވާލު ތައްޔާރުކޮށްފައި ކުދިންނަށް ފެންނަހެން ބަހައްޓާނަމަ އެކުދިން ވެސް އެކަންކަމަށް ތައްޔާރުވެ، އަމިއްލަ ނަފްސަށް ކުރާ އިތުބާރުބޮޑުވެ ރައްކާތެރިކަން އިހްސާސްކުރާނެއެވެ. ކާގަޑިތަކާއި، ނިދާގަޑިއާއި ކުޅޭގަޑިތަކުގެ އިތުރުން ހަފްތާބަންދުތަކަށް ޚާއްސަކޮށް ކަންކަން ރާވާފައި ހުންނަނަމަ އެދުވަހަށް ތައްޔާރުވެ ބަސްއަހައިގެން އުޅުމަށް އެޅޭ ބާރަކަށްވެއެވެ. ކުދިންގެ އުމުރު މައްޗަށް ދިއުމުން އަމިއްލައަށް ކިޔަވާ ގަޑިތަކާއި ބޭރަށް ދާގަޑިތަކާއި ގެއަށް އައުމަށް ގަޑިތަކެއް އޮންނަ ނަމަ ކުދިން އެކަމަށް ސަމާލުކަންދީގެން އުޅޭނެއެވެ. އާއިލާގެ ތެރޭގައި މުޢާމަލާތުކުރުން އެންމެ ރަގަޅުވަގުތަކީ އާއިލާގެ ހުރިހާ މެމްބަރުން އެކުގައި ކާގަޑިކަމަށް ތަޖުރިބާކާރުން ހާމަކުރެއެވެ.

  1. އެންމެ ފުރަތަމަ މަދަރުސާއަށް ވުން

ބެލެނިވެރިންނަކީ ކުދިންގެ އެންމެ ފުރަތަމަ މަދަރުސާއެވެ. ދީނާއި ދުނިޔެއާއި އާޚިރަތާއި ބެހޭ ގޮތުުން ކުދިން ދަސްކުރާނީ ބެލެނިވެރިންގެ ފަރާތުންނެވެ. އެންމެ ފުރަތަމަ ދަސްކުރާ އަކުރުން ފެށިގެން ރިވެތި އާދަތަކާއި ވަށައިގެންގެވާ މާހައުލުގައި ހިނގާ ކަންކަން ބެލެނިވެރިންގެ ފަރާތުން ދަސްކުރުމަށް ފުރުސަތުދޭށެވެ. މިކަމަށް ފައިސާދީފައި މީހުން ބޭތިއްބުމުގެ ބަދަލުގައި ވީވަރަކުން އަމިއްލައަށް ކުރާށެވެ. ކުދިންނާއި އެކުގައި ފޮތްކިޔުމަކީ ކުދިންގެ ސިކުނޑި ހެދިބޮޑުވުމަށް އެޅޭވަރަށް ބޮޑު ބާރެކެވެ. ހަމަ އެގޮތަށް ދަރިން ރަގަޅުކަމެއް ކުރުމުން ތަޢުރީފްކުރާ ފަދައިން ގޯސްކަމެއް ކުރުމުން އެކަން ފާހަގަކޮށް ނަސޭހަތްތެރިވާށެވެ. ކޮންމެކުއްޖަކީވެސް ރަގަޅު ކުއްޖެއްގެ ގޮތުގައި ބޮޑުވުމަށް ފުރުސަތު ދެވޭނީ މިހެންނެވެ.

  1. ކުދިން ކުރިއަށް ނެރެގެން ޒިންމާދާރުކުރުވުން

ކުދިންގެ ސަލާމަތްތެރިކަން ރައްކާތެރި ކުރުމަކީ މައިންބަފައިންނާއި ބެލެނިވެރިންގެ ޒިންމާއެކެވެ. ނަމަވެސް ކުދިންބޮޑެތިވާ ވަރަކުން އެކުދިން އަމިއްލައަށް ކަންކަން ކުރަން ދޫކޮށްލުމަށްފަހު ފަހަތުގައި ހުންނަން ދަސްކުރަން ޖެހޭނެއެވެ. އޭރުން ކަމެއް ގޯސްކޮށްދާނަމަ ވަގުތުން އެކަމެއް ހުއްޓުވޭނެއެވެ. ނަމަވެސް އަބަދު އިނގިލީގައި ހިފައިގެން އުޅޭނަމަ އަމިއްލައަށް ހިނގަން ކުދިންނަށް އުނދަގޫވާނެއެވެ. ކުދިންގެ އުމުރުން ދުވަސްވާވަރަކަށް އަމިއްލައަށް ޒިންމާދާރުވާން ފުރުސަތުދޭން ވާނެއެވެ. ކޮންމެ ކުއްޖަކީވެސް މައިންބަފައިންނާއި ނުލާ ދިރިއުޅެވޭނެ ފަދަ ކުއްޖަކަށް ހަދަން މަސައްކަތް ކުރަންވާނެއެވެ.