މިއަހަރުގެ މިހާތަނަށް ރާއްޖެ އަށް ޒިޔާރަތްކުރި ފަތުރުވެރިންގެ އަދަދު ހަތް ލައްކައިން މައްޗަށް އަރައިފިއެވެ.
ޓޫރިޒަމް މިނިސްޓްރީ އިން އިއްޔެ ހާމަކުރި ތަފާސްހިސާބުތަކުން ދައްކާ ގޮތުން، މި މަހުގެ 22 ވީ ހޯމަ ދުވަހުގެ ނިޔަލަށް ރާއްޖެ އަށް ޒިޔާރަތްކުރި ފަތުރުވެރިންގެ އަދަދަކީ 728،950 އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 13.1 އިންސައްތައިގެ ކުރިއެރުމެކެވެ.
މިއަހަރު މިހާތަނަށް ރާއްޖެ އަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ޗައިނާ އިންނެވެ. އެއީ 77،709 އެއްހާ ފަތުރުވެރިންނެވެ. ދެވަނަ އަށް އެންމެ ގިނައިން ޒިޔާރަތްކުރީ އިނގިރޭސިވިލާތުން 72،635 ފަތުރުވެރިންނެވެ. ތިންވަނަ އަށް އެންމެ ގިނައިން ޒިޔާރަތްކުރި ރަޝިޔާ އިން 72،336 ފަތުރުވެރިން އައެވެ.
މީގެކުރީން، ރާއްޖެ އަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރަމުން އަންނަ އެއް ގައުމު ކަމަށްވާ އިޓަލީ އަށް މި ލިސްޓުން ލިބުނީ ހަތަރުވަނަ އެވެ. އެ ގައުމުގެ 66،170 ފަތުރުވެރިން މިހާތަނަށް ޒިޔާރަތްކޮށްފައިވެއެވެ. ފަސްވަނަ އަށް އެންމެ ގިނައިން ފަތުރުވެރިން ޒިޔާރަތްކުރި ޖަރުމަނުގެ އަދަދަކީ 57،321 އެވެ.
އަވަށްޓެރި އިންޑިއާ އިން 40،358 އެއްހާ ފަތުރުވެރިން ޒިޔާރަތްކޮށްފައިވާއިރު، އެ ގައުމު އޮތީ މި ލިސްޓުގެ ހަވަނައިގައެވެ. މި ލިސްޓުގައި ދެން ހިމެނެނީ؛ ފްރާންސާއި އެމެރިކާގެ އިތުރުން ސްވިޓްޒަލެންޑް އަދި ޕޮލެންޑެވެ.
ރާއްޖެ އަށް މި އަހަރު ދުވާލަކު އެވްރެޖް ގޮތެއްގައި 6،451 އެއްހާ ފަތުރުވެރިން ޒިޔާރަތްކުރާއިރު، 7.9 ދުވަހު ރާއްޖެ އަށް ޒިޔާރަތްކުރާ ފަތުރުވެރިން މަޑުކުރެއެވެ.
ސަރުކާރުން މިއަހަރަށް އަމާޒު ހިފާފައިވަނީ 2 މިލިއަން ފަތުރުވެރިން ގެނައުމަށެވެ. މިހާރު ފަތުރުވެރިން ޒިޔާރަތްކުރާ ނިސްބަތަށް ބަލާއިރު އެ އަދަދު 2.3 މިލިއަނަށް އަރާނެކަމަށް ލަފާކުރެވޭކަމަށް ފަތުރުވެރިކަމާ ބެހޭ ވަޒީރު ވަނީ ވިދާޅުވެފައެވެ.