މިދިޔަ މާރިޗް މަހުގައި ރާއްޖެއަށް 4.4 ބިލިއަން ރުފިޔާގެ މުދާ އެތެރެކޮށްފައިވާ މޯލްޑިވްސް ކަސްޓަމްސް ސާވިސްގެ ތަފާސް ހިސާބުތަކުން ދައްކައިފިއެވެ. މިއީ މިދިޔަ އަހަރުގެ މާރިޗް މަހާ އަޅާބަލާއިރު ހަތަރު އިންސައްތައިގެ ކުރިއެރުމެކެވެ.
މާރިޗް މަހު ރާއްޖެ އަށް އެންމެ ގިނައިން މުދާ އެތެރެކޮށްފައިވަނީ، އޮމާނާއި، އިންޑިއާގެ އިތުރުން ޔޫއޭއީ އާއި ޗައިނާ އަދި ސިންގަޕޫރުންނެވެ.
އެގޮތުން، އޮމާނުން 777 މިލިއަން ރުފިޔާގެ މުދާ އެތެރެކޮށްފައިވާއިރު މިއީ 18 އިންސައްތައިގެ ކުރިއެރުމެކެވެ. ޖުމްލަކޮށް އަނެއް ހަތަރު ގައުމުން އެތެރެކުރި މުދަލުގެ އަގު ވެސް ކުރިއަށްވުރެ އިތުރުވެފައިވާއިރު، އިންޑިއާ އިން ވަނީ 763 މިލިއަން ރުފިޔާގެ މުދާ އެތެރެކޮށްފައެވެ. އަދި ޔޫއޭއީ އިން 671 މިލިއަން ރުފިޔާގެ މުދާ، ޗައިނާ އިން 440 މިލިއަން ރުފިޔާގެ މުދާ އަދި ސިންގަޕޫރުން 401 މިލިއަން ރުފިޔާގެ މުދާ އެތެރެކޮށްފައިވެއެވެ.
ކަސްޓަމްސްގެ މިދިޔަ މަހުގެ ތަފާސްހިސާބުތަކަށް ބަލާއިރު ރާއްޖެ އަށް އެންމެ ގިނައިން އެތެރެކޮށްފައިވަނީ ތެޔޮ (މެރިން ގޭސް އޮއިލް، ޑީސަލް އާއި ޕެޓްރޯލް އަދި އޭވިއޭޝަން ގޭސް) އެވެ. އެގޮތުން، 1037 މިލިއަން ރުފިޔާގެ ތެޔޮ އިމްޕޯޓްކޮށްފައިވާއިރު، ކާނާގެ ބާވަތްތައް އެތެރެކުރުމަށް 985 މިލިއަން ރުފިޔާ ހޭދަކޮށްފައިވެއެވެ. ދެން އެންމެ ގިނައިން އެތެރެކޮށްފައިވާ މެޝިނަރީ އާއި މެކޭނިކަލް އަދި އިލެކްޓްރިކަލް އެޕްލަޔަންސަށް 728 މިލިއަން ރުފިޔާ އެވެ.
މާރިޗް މަހު ރާއްޖެއިން އެންމެ ގިނަ އިން މުދާ ބޭރުކޮށްފައިވަނީ ތައިލޭންޑަށެވެ. އެގޮތުން، ރާއްޖެއިން ތައިލޭންޑަށް 41 މިލިއަން ރުފިޔާގެ މުދާ އެކްސްޕޯޓް ކޮށްފައިވާއިރު ދެން އެންމެ ގިނައިން މުދާ ބޭރުކޮށްފައިވަނީ އިނގިރޭސިވިލާތަށެވެ. އެއީ، 27 މިލިއަން ރުފިޔާގެ މުދަލެވެ. މި ލިސްޓުގައި ދެން ހިމެނޭ ޖަރުމަނަށް 12 މިލިއަން ރުފިޔާގެ މުދާ، އިންޑިއާ އަށް 7 މިލިއަން ރުފިޔާގެ މުދާ އަދި ފްރާންސަށް 6 މިލިއަން ރުފިޔާގެ މުދާ ބޭރުކޮށްފައިވެއެވެ.
މިދިޔަ މަހު ރާއްޖެ އަށް އެތެރެކުރި މުދާ އިތުރުވެފައިވީ ނަމަވެސް، ރާއްޖެއިން ބޭރުކުރެވުނު މުދަލުގެ އަގު ވަނީ 64 އިންސައްތަ ދަށަށް ގޮސްފައެވެ. އަދި ކަސްޓަމްސް އަށް އާމްދަނީގެ ގޮތުގައި ލިބުނު މިންވަރު ވަނީ ކުރިއަށްވުރެ ތިން އިންސައްތަ ދަށަށް ގޮސްފައެވެ.