އިންސާނަކު އިންސާނަކަށްވަނީ، ރީތި އަޙްލާޤެއް ލިބިގެން ވުމުންނެވެ. މީސްތަކުންގެ ލޯތްބާއި ޤަދަރު ލިބޭ ފަދަ މާތް ސިފަތަކެއް ހުރުމުންނެވެ. މިފަދަ ސިފަތަކެއް ހުރި މީހެއްގެ ސަބަބުން، އެމީހަކު ދިރިއުޅޭ ޖަމާޢަތަށާއި މުޖުތަމަޢު އަށް ނުހަނު ފައިދާއާއި މަންފާ ކުރާނެއެވެ. ޙަޤީޤަތުގައި ރިވެތި އަޚްލާޤަކީ، މުޅި މުޖުތަމަޢުގެ ދިރުމެވެ.

ތެދުވެރިކަމާއި، އަމާނާތްތެރިކަމާއި، މަޑުމޮޅިކަމާއި ހިތްތިރިކަމާއި، އެހެން މީހުންނަށް ކަމޭ ހިތުމާއި، އިޙްސާންތެރިވުމަކީ، ރިވެތި އަޚްލާޤުގެ އެންމެ ފުރިހަމަ ސިފަތަކުގެ ތެރެއިންވާ ސިފަތަކެކެވެ. މި ސިފަތައް އިންސާނާގެ ކިބައިގައި އަށަގެންފައިވާ މީހަކުނަމަ، ވެގެންދާނީ، އެންމެންގެ ލޯތްބާއި ޤަދަރު ލިބިގެންވާ މީހަކަށެވެ. ކީރިތި ރަސޫލާގެ އަޚްލާޤަށް ތަޢުރީފުގެ ބަސްފުޅު ކީރިތި ޤުރުއާންގައި ﷲ ސުބުހާނަޙޫ ވަތަޢާލާ ވަޙީކުރައްވައިފައިވަނީ، މި ސަބަބަށްޓަކައެވެ. މާތްﷲ ވަޙީ ކުރެއްވިއެވެ.  {وَإِنَّكَ لَعَلَىٰ خُلُقٍ عَظِيمٍۢ } (އަލްޤަލަމް: 4) މާނައީ: "އަދި ހަމަކަށަވަރުން، ކަލޭގެފާނުވަނީ، މާތްވެގެންވާ ޚުލްޤުފުޅެއްގެ މަތީގައިކަން ކަށަވަރެވެ."

އަޅުގަނޑުމެންނަކީ ފުރިހަމަ މުސްލިމުން ކަމުގައިވާންޖެހެއެވެ. އަޅުގަނޑުމެން އެކަކު އަނެކަކާމެދު ކުރާ މުޢާމަލާތްތަކުގައި ތެދުވެރިވެ، މީސްތަކުންނަށް ކަމޭހިތައި، މަޑުމޮޅިކަމާއި ހިތްތިރިކަން ކުރިޔަށް ނެރެންޖެހެއެވެ. ބަހާއި އަމަލާއި އެއްގޮތްކުރަން ޖެހެއެވެ. ހެޔޮ ކަންތަކަށް އަމުރު ކުރަންޖެހެއެވެ. ހެޔޮ ވިސްނުމުގެ ބޭނުންހިފަން ޖެހެއެވެ. ތިމާއަށް ލިބިފައިވާ އިލްމާއި ހުނަރު އެހެން މީހުންނަށް އުނގަންނައިދޭން ޖެހެއެވެ. އަނެކަކާމެދު ހެޔޮ ޝުޢޫރުތައް ފާޅުކުރަން ޖެހެއެވެ. މި ހުރިހާ ސިފަތަކެއްވަނީ، އިސްލާމްދީނުގައި ވަރަށް ފުރިހަމައަށް ބަޔާން ކުރައްވާފައެވެ. މި ސިފަތަކުން ޒީނަތްތެރިވުމަށް އިސްލާމްދީނުގައި ބާރުއަޅުއްވާފައިވާ މިންވަރަށް އެހެން އެއްވެސް ދީނެއްގައި ނުވަތަ ފަލްސަފާއެއްގައި ބާރުއަޅާފައެއް ނުވެއެވެ.

އެހެންކަމުން، އަޅުގަނޑުމެންނަކީ، މި މާތް ސިފަތަކުން ގަހަނާއެޅިފައިވާ ބަޔަކަށްވުމަށް މަސައްކަތްކުރަން ޖެހެއެވެ. އެއީ، ރިވެތި އަޚްލާޤެއްގެ ވެރިބަޔަކަށް ވުމަށްޓަކައެވެ. ފުރިހަމަ މުސްލިމުންނަށް ވުމަށްޓަކައެވެ.

 

(ރިވެތި އަޚްލާޤަކީ، މުޅި މުޖުތަމަޢުގެ ދިރުމެވެ. –މައުމޫން އަބްދުލް ޤައްޔޫމް؛ ދީނުގެމަގު، އަހަރު 22، އަދަދު 11، ޞ.1، 04 އޭޕްރީލް 2008)