އަލަށް ރަޙްމަތްތެރިކަން އުފެދުނު ބަޔަކާއި އެކު ރޭގަނޑުގެ ކެއުމެއްގައި ތިބި ރެއެކެވެ. ގޮނޑުދޮށާއި ގާތުގައިވާ ރެސްޓޯރެންޓެކެވެ. ކައިނިމިގެން ދެން ތިބި ދެމީހުން ގޮނޑުދޮށުގައި ހިނގާލާން ދުރަށް ޖެހިލިއެވެ. ދެން މޭޒުކައިރީގައި އިން މީހަކީ އެހާ ދެކެފަރިތަ މީހަކަށް ނުވުމުން ދެމީހުންގެ ދެމެދުގައިވާ ނުތަނަވަސްކަން ކަނޑުވާލުމަށް ފޯނުން ލަވައެއް ޖަހާލީމެވެ. އެއީ 90 ގެ ފަހުކޮޅު މަޝްހޫރުވެގެން ދިޔަ، ލަކީ ޢަލީގެ ހިންދީ ލަވައެކެވެ. ލަވައިގެ މެދާއި ހަމައަށް ނުދަނީސް ކައިރީގައި އިން ފިރިހެން މީހާއަށް އުނދަގޫވެގެން ބުންޏެވެ. "ތިޔަ ލަވަ ނިވާލަ ފާނަންތަ؟" އަހަރެން އެއްވެސް ދެކޮޅުވެރިކަމެއް ނެތި ވަގުތުން ލަވަ ނިވާލީމެވެ. ނިވާލީމާ އޭނާ ބުންޏެވެ. "ލަވަ ހުތުރު ވެގެން ނޫން މިހެން މިބުނީ. ތިޔަ ލަވަތައް ޖަހައިގެން، އަހަރެން ހައްދައިގެން، އަހަރެންގެ އެންމެ 12 އަހަރުގައި ބޮޑު އަންހެނަކު އަހަރެންނާ ބެހުނީ. އެހެންވެ އަޑު އަހަން ބޭނުން ނުވަނީ". އަޑު އިވުނު ވާހަކަތައް ގަބޫލުކުރަން ދަތިވެފައި އަހަރެން އިނީމެވެ. އެއީ 30 ހުން މައްޗަށް ގޮސްފައިވާ ބޮޑު ފިރިހެނަކު އެހެން ހަމަ ބުނެލާ ކަހަލަ ވާހަކަ އެއް ނޫނެވެ. އެއަށް ވުރެ ޒާތީ ވާހަކަ އެކެވެ. އަހަރެންނާ އެ މީހާ އާއި ދިމާވެގެން އަދި އެފަދަ ވާހަކަ އެއް ޙިއްސާކުރާހާ ގާތެއް ވެސް ނޫނެވެ.

ކިތަންމެ "ކޫލް"ވެފައި ބުނި ނަމަވެސް އޭނާ އެބުނީ ވަރަށް ބޮޑު ވާހަކައެކެވެ. ނަމަވެސް އިތުރަށް އެވާހަކައިގެ ތަފްޞީލު އަހާކަށް ނުކެރުނެވެ. އެފަދަ ވާހަކަ ތަކަކީ ދައްކަން މާ ފަސޭހަ ވާހަކައަކަށް އެއްވެސް މީހަކަށް ނުވާނެއެވެ. އަމްދުން އެކަން ތަޖުރިބާކުރި މީހަކަށް އެކަމުގެ ވޭން ބޮޑުވާނެއެވެ. އެކަން މީހަކަށް ކިޔާދިނުންވާނީ އަލުން ހަމަ އެކަން ތަޖުރިބާ ކުރުން ފަދަ ބިރުވެރި ކަމަކަށެވެ. ނަމަވެސް މިކަން ސިކުނޑިން ފިލައިގެނެއް ނުދެއެވެ. ކޮންމެވެސް ވަގުތަކުން އަލުން މިވާހަކަ އެހުމުގެ ޝައުގުވެރިކަން ހުއްޓެވެ. އެހެންކަމުން އަނެއްކާވެސް ދިމާވި ދުވަހެއްގައި ވަރަށް ބިރުން ހުރެ އަހާލީމެވެ. ކުރިން ދުވަހަކު ސުރުޚީ އަޅާލާފައި އޮތް ވާހަކައެއްގެ ތަފްސީލް އަޑުއަހާލަން ބޭނުންވެފަ ހުރިކަމާ ފަސޭހަ ގަޑިއަކުން އެވާހަކަ އެނގެން ބޭނުންކަމަށް ބުނީމެވެ. ހީކުރިގޮތާ ޚިލާފަށް އެއްވެސް ރުޅިވެރިކަމެއް، ހިތްހަމަ ނުޖެހުމެއްނެތި އޭނާ ބުންޏެވެ. "އާނ! ކިޔާދީފާނަން. ކެރޭނެ. އުމުރުން އެންމެ 12 އަހަރު އެކަމަކު ހުރިހާ ކަމެއް ވަރަށް ރަގަޅަށް ހަނދާން އެބަހުރި. އަހަރެންނަކީ ކުޑަކުއްޖެއް އޭރު. އޭގައި އަހަރެންގެ މައްސަލައެއް ނޯންނާނެ. ގޯސް ހެދީ އެހެން މީހެއް." އަހަރެންނަށް އުއްމީދު އާވިއެވެ. އޭނާއަށް ފަސޭހަ ވަގުތަކުން މިވާހަކަ ކިޔާދޭން ގުޅާނެކަމަށް ގަބޫލުކޮށް ވަރަށް އުފަލުން ހުރީމެވެ.

އެންމެ ފަހުން އެދުވަސް ވެސް އައީއެވެ. ގުޅުމުގެ ބަދަލުގައި މިވާހަކަ ހިއްސާކުރީ ބައްދަލުކޮށްފައެވެ. ތިރީގައި އެވަނީ މިކަން ތަޖުރިބާ ކުރި މީހާ ކިޔާދިން ގޮތަށް، ވީ ވަރަކުން ބަހަކަށް ވެސް ބަދަލު ނުގެހެވެ.

" އޭރު އަހަރެމެން އެންމެން ކިޔަވަން ވެގެން އުޅުނީ އިންޑިޔާގައި. މަންމަ ހުރޭ ވަރަށް ބޮޑު ގެއެއް ހިފާފައި. އާއިލާގެ މީހުނާއި ޑޮކްޓަރަށް ދައްކަން މީހުން ގޮސް ހަދާތީ ކަންނޭނގެ. ރާއްޖެއިން ބޭރުގައި އުޅޭތީ އާއިލާގެ އެހެން މީހުނާ ވަރަށް ގުޅުން ކުޑަ. މިހެން އުޅެނިކޮށް ގެއަށް އައި އާއިލާގެ ބަޔަކު އެއީ ޑޮކްޓަރަށް ދައްކަން. އެތަނުގަ ހުރި 25 އަހަރުގެ އަންހެނެއް. އަހަރެންގެ އުމުރުން 12 އަހަރު. އެއްބަނޑުގައި ތިބި 3 އަންހެންކުދިންނާއި އެކުގައި، ގޭގައި ހުރެގެން ބޮޑުވާތީ ކަންނޭނގެ. ވަރަށް ހޭލުންތެރިކަން ކުޑަވާނެ. މިހެން އުޅެނިކޮށް މިމީހުން އައީ. އޭރު ދާން ޖެހޭނެ ގޭ ކާރިން ހަތަރު އަނގޮޅި ކަންމަތީގެ އިންނަ މުނިސިޕަލްޓީ ޑަސްޕިނަށް ކުނި އުކާލަން. ކުޑަވީމަ އާ ބޭރަށް ނިކުންނަން ލިބޭ ފުރުސަތެއް ވީމާ ވަރަށް ދާހިތުން ދަން ބޮޑު ކޮންމެ މީހަކު ދިޔަސް. މިހެން އެއް ރެއަކު އެމީހާ ޑަސްޕިން އުކާލަން ދާތީ އޭނާއާ ވެސް އެކުގައި ދިޔައީ. އަންނަމުން އޭނާ ދައްކާލީ ހަނދު. ބުނި މައްޗަށް ބަލާލާބަލާށޭ، ވަރަށް ރީތި ދޯއޭ. އަހަރެންވެސް ބަލާލާފަ ބުނިން ވަރަށް ރީއްޗޭ. ދޭން އޭނަ ދެއްކީ އޭނާގެ އަނގައިގަ އޮތް މެޓައެއް. ހަނދުފަޅި މެޓައަކީ އޭރު ވަރަށް އާންމުއެއްޗެއް. ދައްކާފަބުނީ މިވެސް ހަމަ ހަނދެކޭ. ވަރަށް ވައްތަރު ދޯއޭ. އަހަރެން ދެން އެކަމާ މާބޮޑަށް އަޅައެއް ނުލަން".

" އޭރު އާއިލާއަށް ސިއްރުން ސިގިރެޓް ބުއިން. އެއްރޭ ޓެރަސް އަށް އަރާ ވަގަށް ސިގިރެޓް ބޯން ހުއްޓާ އޭނާ އަރައިފި. އަހަރެން ދިޔައީ ސިއްސައިގެން. އެއީ އާންމުކޮށް ގޭ މީހުން ޓެރަސްއަށް އަރާ ވަގުތެއް ނޫން. އޭނާއަށް އަހަރެން ސިގިރެޓް ބޯން ހުއްޓާ ފެނުމުން ބުނީ އެއީ މައްސަލައެއް ނޫން ކަމާ، ގޭ އެއްވެސް މީހެއް ކާރި ނުބުނާނެ ކަމަށް. ދޭން އޭނަ އައިސް އަހަރެންގެ ގައިގަ އެކި ތަންތަނުގައި އަތްލާ އަހަރެންނަށް ދޮންދީ ހަދަންފެށި. އޭނާ އަހަރެންނަށް ވިސްނާދިން ގޮތުގައި އެހެން އެކަން އެވީ އަހަރެމެން ދެމީހުން އެކަކު އަނެކަކު ދެކެ ލޯބިވާތީ. އަދި އާއިލީ ގާތްކަމެއް އޮތް ނަމަވެސް ދެމީހުން ކައިވެނި ކުރެވޭނެ ކަމަށް އޭނަ ބުނި. އޭރުވެސް އޭނަ އުޅެނީ މީހަކާ އިނދެގެން. އަހަރެންނަށް ވިސްނާދީފަ އޮތް ގޮތުގައި މިހާރު އަހަރެމެން ދެމީހުނަކީ ހިތާވެގެން އުޅޭ ދެމީހުން. އެކަން އަހަރެންވެސް ހުންނަނީ ގަބޫލުކޮށްގެން. މީގައި ގޯހެއް ހިނގާ ކަމެއް ދެނެގަނެވޭ ވަރަށް ވުރެ އަހަރެންގެ ސިކުނޑި ޅަ."

އޭގެ ފަހުން އެހެން ދުވަހަކު ގޭގެ ބޮޑެތިމީހުން ދިޔައީ ބާޒާރަށް. ދެން ގޭގައި ތިބީ އަހަރެންނާއި އެއްވަރެއްގެ އިތުރު 3 ކުދިން. އެގަޑި ބަލާފައި އޭނާ އަހަރެން ގޮވައިގެން ގޭގެ ހުސްކޮޓަރިއަކަށް ދިޔަ. އަދި އަހަރެންގެ ޢިއްފަތްތެރިކަން ފޭރިގަތް. ކަމަކާ ދެކޮޅު ހަދާ ވަރަށްވުރެ އަހަރެން ކުޑަ. އޭނަ ބުނި ގޮތަކަށް ބުނި ކަމެއް ކުރީ. ދެކޮޅު ހަދާކަށް ނުކެރުން. ހިތްހަމަ ޖެހުމެއް ނުލިބުނަސް އޭނާ ހަމަ ބުނާ އިރަށް އޭނަ އާ އެކީގައި ދަން. މުޅި ސިކުނޑީގައި ހުންނަނީ އޭނަ ދައްކާފަ ހުންނަ ވާހަކަތައް އެކަނި. އެއީ ހުސް ލޯބިކަމަށް އަހަރެންނަށް ގަބޫލު ކުރެވިފަ ހުރީ. އެއީ ގޯސްކަމެއް ނުވަތަ އަނިޔާއެއް ނޫންކަމަށް އޭނަ އަހަރެންނަށް ކިޔާދީފަ ހުރީ އެހެންވީމަ އެވާހަކަ އެހެން މީހެއް ކާރި ކިޔާދީގެން އެކަން ހުއްޓުވާކަށް ޚިޔާލަށްވެސް ނާދޭ."

" މިހެން އުޅެފަ އަހަރެމެން މާލެ ބަދަލުވީވެސް އެމީހުން އައި ދަތުރެއްގައި. އިންޑިޔާއިން ގްރޭޑް 8 ނިންމާފަ މާލެ އައިސް ގްރޭޑް 10 އަކަށް ވަދެވުނު. ސްކޫލަށް ދާން ފެށިފަހުން ވެސް އޭނާ ބޭނުންވަނީ އޭނަގެ ފިރިމީހާ ނުހުންނަ ގަޑިތަކުގައި އަހަރެން އެގެއަށް ދާން. މިހެން ދެން ވަރަށް ގިނައިން ސްކޫލަށް ނުގޮސް ދާން ޖެހެނީ އެގެއަށް. އެހެން ވީމާ ކިޔެވުމަށް ވަރަށް އަސަރު ކުރަން ފެށި. އެވަރުންވެސް މީހެއް ކާރި ނުބުނަން. ދެން ސްކޫލް ނިމިގެން ރިސޯޓަކަށް ދިޔަ ހިސާބުން ގުޅުން ކެނޑުނު. އެކަމަކު ފަހުން ވެސް ދޭތެރެއަކުން މާލެ އަޔަސް ގުޅާ ހޯދާ ހަދާނެ."

" ދެން އަހަރެން ފެށީ ޒަވާޖީ ހަޔާތެއް. ނަމަވެސް ކަންކަން ދިޔައީ ހީކުރި ގޮތަކަށް ނޫން. އަނބިފިރކަމުގެ ގުޅުމަކީ ލޯބީގެ ބައެއް ނަމަވެސް ކުރިން އަހަރެންނަށް "ލޯބި" ވިސްނާދީފަ އިން ގޮތުން އެކަން ވެސް ވީ ވޭނަކަށް. އެފަދަ ގުޅުންތަކާ މެދު އަހަރެންނަށް ފޫހިވާންފެށި. އެއީ ލޯބި ނޫންކަމާ އެއީ ވެސް ކޮންމެވެސް އަނިޔާއެއް ނުވަތަ ކެއްސެއްކަމަށް ވިސްނެންފެށި. އޭގެ ފަހުންވެސް އިތުރު ކައިވެންޏެއްވެސް ކޮށްގެން އެކަމުގައި ދެމިހުރެވޭ ގޮތެއް ނުވޭ. އެ ހާދިސާގެ ފަހުން އަހަރެންގެ ހަޔާތުގެ ކޮންމެ ކަމެއްގެ މާނަވަނީ އޮޅިފައި. ލޯބި، އިތުބާރު އަދި އަޅާލުމަކީ ކޮބައިކަމާމެދު އަހަރެން ޝައްކު ކުރަން ފެށިން. ހެއްދެވި ފަރާތާއި މެދު އޮތް އީމާންތެރި ކަމަށް ބުރޫ އެރި. ކިތަންމެ ރެއަކު ރޮމުން ﷲ ހަނދުމަ ކުރަމުން ޝަކުވާކުރިން. އަހަރެންނަކީ އޭރު ކުޑަކުއްޖެއް ކަމާ އަހަރެންނަށް ހިމާޔަތްނުލިބުނީ ކީއްވެތޯ ހިތާހިތުން ސުވާލުކުރިން. އަހަރެންގެ މުޅި ހަޔާތަށް އަސަރުކުރާ ވަރުގެ ކަމެއްގެ ތެރެއަށް އަހަރެން ދިޔައީ އަހަރެންގެ ކޮން ކުށެއް އޮވެގެންތޯ ވެސް ސުވާލުކުރަން."

"އެއީ އެކަން ވީގޮތަކީ" ހީނލާފައި އޭނާގެ ވާހަކަ ނިންމާލިއެވެ. ނަމަވެސް ހިތަށް އަސަރުކޮށްފައިވާ ވަރު މޫނުމަތިން ސާފުކޮށް ފެނެއެވެ. ގަދަކަމުން ފިރިހެންކަން ދައްކަންވެގެން ހީނލި ނަމަވެސް މިވަރުގެ ބޮޑު ކަމެއްގެ ތެރޭގައި އުޅުނު މީހަކު އިހްސާސްކުރާނެ އެއްޗެހި ވިސްނެއެވެ. މިހާދިސާއަށް 20 އަހަރު ވެގެން ދިޔައިރުވެސް މިކަމުން އަރައި ނުގަނެވި ހުރި މީހަކަށް މިއީ ވަރަށް ބޮޑު ތަކުލީފެކެވެ. ބޮޑު ފިރިހެނެއްގެ ހިތުގެ ޒަޚަމްތައް ތާޒާކޮށްލެވުނީމާވެސް ހިތެއް ނުފުރުނެވެ. އަދި މިހާރު އެމީހާ ކޮބައިތޯ އާއި އެއްވެސް ވަރަކަށް ގުޅުން އޮވޭތޯ އަހާލީމެވެ.

" އެބަ އުޅޭ. އެކަހަލަ ކަމަކު މިހާރު ބުނާކަށް ނުކެރޭނެ. ބަވާލާނަން. ވަރަށް ފަހުން ގުޅި. އެހި އޭނައަށް މާފްކުރާނަންދޯއޭ. ބުނިން މާފްކޮށްފާނަމޭ އެކަމަކު އަހަރެންގެ ހަޔާތުގެ ވަރަށް ގިނަ ކަންކަން ހާޞިލްނުވެ ދިޔައޭ އެހެން އެކަން ވީމާ. އަދި އިތުރު ގޯސްކަންކަން ވެސް އައިސްފިޔޭ އެކަމުގެ ތެރޭގަ އުޅެން ޖެހުނީމަ." މިފަހަރު މޫނުމަތިން ކޮންމެވެސް ވަރެއްގެ ޔަގީން ކަމަކާއި އަމިއްލަ ނަފުސަށް އިތުބާރުކުރާކަން ދޭހަވިއެވެ.

މިއީ އަޅުގަނޑުމެންގެ މުޖުތަމަޢުގައި ހިނގާ ކަމެކެވެ. "ގްރޫމް" ކޮށްގެން ކުޑަކުދިން ހައްލާލައިގެން ހިންގާ މިފަދަ ކަންކަމުގައި އިތުބާރުކުރެވޭ މަގާމްތަކުގައި ތިބޭ މީހުންގެ ނަން އައުމަކީ ކަންބޮޑުވާން ޖެހޭ ކަމެކެވެ. ކުޑަ ކުއްޖަކާއި މެދު ވެވޭ މިފަދަ ކޮންމެ އަމަލަކީ އެކުއްޖެއްގެ މުޅި ދިރިއުޅުމަށް އަސަރު ކުރާނެ ކަމެއްކަން މިވާހަކަ އިންވެސް ވެސް ސާބިތުވެއެވެ.