އިންސާނުންގެ ހިޔާލަކީ ތަފާތު އެއްޗެކެވެ. ދެމީހެއްގެ ހިޔާލު އެއްކަމެއްގައި އެއްގޮތް ނުވެދާނެއެވެ. މިހުންނަނީކީ ދުނިޔެވީގޮތުން މައްސަލަތަކެއް ނޫނެވެ. މިއީ ހަމަ އާދައިގެ ކަންކަމެވެ. ދުނިޔޭގެ ފިޠުރަތެވެ. ނަމަވެސް މި ތަފާތުވާ ހިޔާލުތަކުގެ ސަބަބުން މައްސަލައަށް ވާ ހިސާބެއްވެސް އާދެއެވެ. އެހާރުން ކަންކަން ހިނގަމުންދަނީ އަމުދަކުން އަދި މާ ރަނގަޅަކަށް ނޫނެވެ.

ހިޔާލުތަފާތުވާ ކޮންމެ ހާލަތަކީވެސް އެކަކު އަނެކަކަށް އިހްތިރާމު ކުރަން ޖެހޭނެ ހާލަތެކެވެ. ނަމަވެސް ކަންކަން ގޯސްވެ، ގުޅުންތައް ހީނަރުވެ، އިޖްތިމާއީ ފޭރާން ވީދި، އެކުވެރިކަން ނެތި، ރުޅިވެރިކަން އާއްމުވެ، ހަލާކާ ފަސާދަ އިތުރުވެ، ފިތުނައާއި ޒާތީ ހަސަދަ އިންތިހާއަށް ބޮޑުވަމުން ދަނީ އަނެކުންނަށް ކުރާ އިހްތިރާމު ކުޑަވުމުންނެވެ. ނުވަތަ އިހްތިރާމު އެއްގޮތަކަށްވެސް ނުކުރާތީއެވެ. މިކަން މިމަގުން ދިވެހި މުޖުތަމައުތަކުގައި ހިނގާތީ ފެނެއެވެ.

ތިމާއަށް ވިސްނޭ ވިސްނުމާ އެނގި ހުރި އެއްޗެއް އެއީ އެކަމެއްގައި އެއްމެ ރަނގަޅު ގޮތް ކަމުގައި ނުދެކޭށެވެ. ފަހަރުގައި އެއީ ހަމަ އެއްމެ ރަނގަޅު ގޮތް ކަމުގައިވެސް ވެދާނެއެވެ. ނުވަތަ އެއީ އަދި އެއްމެ ރަނގަޅު ގޮތް ކަމުގައި ނުވެވެސް ހިނގައިދާނެއެވެ. ހިޔާލުތަފާތުވާ ކަމެއްގައި އެއްމެ ރަނގަޅު ގޮތަކީ ކޮބައިކަން އެއްވެސް ބަޔަކަށް ނޭނގޭނޭއެވެ. އެހެންކަމުން ހިޔާލުތަފާތުވާ ކަންކަމުގައި އަބަދުވެސް އަނެކުންގެ ރައުޔަށް އިހްތިރާމު ކުރަންވާނެއެވެ.

ތަފާތުވާ ހިޔާލުތަކުގައި ތިމާގެ ރައުޔަށް، ނުވަތަ ތިމާގެ ވިސްނުމާއި ތިމާގެ ބުނުމަށް ބާރު ދިނުމަކީ އޮތް ކަމެކެވެ. ތިމާގެ ވިސްނުން އިސްކުރުމަކީވެސް އޮތް ކަމެކެވެ. އިލްމީގޮތެއްގައި ބިނާކުރަނިވި ބަހުސްތައް ކުރުމަކީވެސް އޮތް ކަމެކެވެ. އަނެކުންގެ ހިޔާލާ ވިސްނުމުގައި ހުރި އުނި ނުވަތަ ކޮށި ކަންކަން ބުނެދީ ހެދުމަކީވެސް އޮތް ކަމެކެވެ. ނަމަވެސް މިކަންކަމުގައިވެސް ރިވެތި އަހުލާގު ދަމަހައްޓަން ޖެހޭނެއެވެ. އަނެކާގެ ހިޔާލާ ވިސްނުމަށް އިހްތިރާމު ކުރަންވާނެއެވެ. އަނެކާގެ ތަޖުރިބާތަކަކީވެސް އަގުކުރެވެން ޖެހޭނެ ކަންކަމެވެ. 

އަނެކާއަށް ބަދު ބަސްބުނުމާ، އަނެކާއަށް ކުޑައިމީސް ކުރުމާއި، އަނެކާގެ ބޮލުގައި ބޮޑެތި ދޮގު އިލްޒާމުތައް އެޅުވުމާއި އަނެކާ ބަދުނާމު ކުރުމާއި އަނެކާ ބޭޒާރުކޮށް ފަލީހަތް ކުރާ މޭރުމުން ބަސްބުނެ ހެދުމަކީ ހަމަ އެއްގޮތަކަށްވެސް އެދެވިގެންވާ ކަމެއް ނޫނެވެ. ނަމަވެސް ހިތާމައަކީ ހިޔާލުތަފާތުވާ ގިނަ ހާލަތްތަކުގައި މިމަގުން އަހަރެމެންނަށް ކަން ކުރެވޭ ކަމެވެ. މިއީ ދެރަވަރު ކަންކަމެވެ. އަހަރެމެންގެ ދިރިއުޅުމުގެ ވައްޓަފާޅީގައި ވާ ޒާތެއްގެ މި "ކަޓު" ގޮތްގަނޑު ދޫކޮށްލަމާ ހިނގާށެވެ. ހިޔާލު ތަފާތުވުންތަކާއި އެކީ އިހްތިރާމު ކުރުމާއި އެކު ލޯތްބާ އެކުވެރިކަން ދެމެހެއްޓޭނެއެވެ. މިހުންނަނީ ބުއްދި އިސްކޮށްފި ބަޔަކަށް އަމުދަކުން ކުރުން މާ އުނދަގޫ ކަންކަމެއް ނޫނެވެ.