ރާއްޖޭގެ ރަށްތަކުގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން ތިލަދުންމަތީ އުތުރުބުރީ ކުޅުދުއްފުށީ ސިޓީގައި މިވަގުތު ކުރަމުންދާ މަސައްކަތްތަކުގެ ތަފްޞީލް އާރްޑީސީ އިން އާންމުކޮށްފިއެވެ.
އާރްޑީސީ އިން ބުނީ، ކުޅުދުއްފުށި ސިޓީ މަގު ހެދުމުގެ މަޝްރޫޢުގެ ތެރެއިން މިވަގުތު ކުރިއަށްދަނީ ރޯޝަނީ މަގާއި އުޖާލާ ގޯޅީގައި ތާރު އެޅުމުގެ މަސައްކަތް ކަމަށެވެ.
މީގެއިތުރުން، ދަނޑުމަގުގައި ކީވޯލް ޖެހުމުގެ މަސައްކަތް ވެސް ކުރެވެމުންދާ ކަމަށް އާރްޑީސީ އިން ބުނެއެވެ.
ރާއްޖޭގެ އުތުރުގެ އިގްތިޞާދީ މައި ހަބުގެ ގޮތުގައި ބެލެވޭ ކުޅުދުއްފުށީ ސިޓީގެ މަގުތައް ޒަމާނީ ފެންވަރަށް ހެދުމުގެ މަސައްކަތް ކުރުމަށް އާރްޑީސީއާ ހަވާލުކުރީ 2021 ވަނަ އަހަރުގެ ޖޫން މަހުގައެވެ. މިއީ 100.7 މިލިއަން ރުފިޔާގެ މަޝްރޫޢެކެވެ.