ނޯތު ރީޖަންގެ ރަށްތަކުގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން ތިން ރަށެއްގައި މިވަގުތު ހިނގަމުންދާ މަސައްކަތްތަކުގެ ތަފްޞީލް އާރްޑީސީ އިން އާންމުކޮށްފިއެވެ.
އެގޮތުން، ނޯތު ރީޖަންގައި ހިމެނޭ ހއ. އިހަވަންދޫ، ހއ. ދިއްދޫ އަދި ށ. މިލަންދޫގައި މިހާރު ކުރިއަށްދާ މަސައްކަތްތަކުގެ ތަފްޞީލް އާރްޑީސީ އިން ވަނީ ދީފައެވެ.
ހއ. އިހަވަންދޫގައި މިވަގުތު ކުރަމުންދަނީ، ސައިޓު ސަރަހައްދު ސާފުކުރުމާއި، ކާސްޓިންގ ސަރަހައްދުގެ މަސައްކަތްތަކުގެ އިތުރުން ކާރބް ސްޓޯން އެޅުމުގެ މަސައްކަތެވެ.
އިހަވަންދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މި މަސައްކަތަކީ 102.8 މިލިއަން ރުފިޔާގެ މަޝްރޫޢެކެވެ. މި މަސައްކަތް ކުރުމަށް އާރްޑީސީ ހަވާލުކުރީ މިދިޔަ އަހަރުގެ އޭޕްރީލް މަހު އެވެ.
ހއ. ދިއްދޫގައި މިހާރު ކުރަމުންދަނީ ހުކުރުމަގުގައި ޕޭވިންގ ގެ މަސައްކަތާއި ޕިޔާނާ ގޯޅީގައި ކާރބް ސްޓޯން ޖެހުމުގެ މަސައްކަތުގެ އިތުރުން ހިޔާވަހި ގޯޅީގައި ކީވޯލް ޖެހުމުގެ މަސައްކަތް ވެސް މިވަގުތު ކުރިއަށްއެބަދެއެވެ.
ދިއްދޫގެ މަގުތައް ހެދުމުގެ މަސައްކަތްކުރުމަށް އާރްޑީސީއާ ހަވާލުކޮށްފައިވަނީ 2022 ވަނަ އަހަރުގެ އޭޕްރީލް މަހުގެ ތެރޭގައި 108.5 މިލިއަން ރުފިޔާ އަށެވެ.
ނޯތު ރީޖަންގެ ރަށްތަކުގެ ތެރެއިން މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް މިހާރު ކުރަމުންދާ އަނެއް ރަށަކީ ށ. މިލަންދޫ އެވެ.
މިލަންދޫގައި މިހާރު ކުރަމުންދަނީ ޝަހީދު އަލީ ހިނގުމުގައި ރޯޑް މާރކިންގ ގެ މަސައްކަތާއި، ސައިޓުގައި ސްޓޯރމް ވޯޓަރ ޓޭންކް ކާސްޓް ކުރުމުގެ މަސައްކަތުގެ އިތުރުން، ހުރަވީ މަގުގެ ޕަމްޕް ސްޓޭޝަން ވަޅު ބެހެއްޓުމުގެ މަސައްކަތެވެ. މިލަންދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް އާރްޑީސީއާ ހަވާލުކޮށްފައިވަނީ 2020 ވަނަ އަހަރުގެ ސެޕްޓެންބަރު މަހުގައި 156.48 މިލިއަން ރުފިޔާ އަށެވެ.