ސައުތު ރީޖަންގެ ރަށްތަކުގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން ތިން ރަށެއްގައި މިވަގުތު ހިނގަމުންދާ މަސައްކަތްތަކުގެ ތަފްޞީލް އާރްޑީސީ އިން އާންމުކޮށްފިއެވެ.
އެގޮތުން، ސައުތު ރީޖަންގައި ހިމެނޭ ގއ. ކޮލަމާފުށި، ގއ. ވިލިނގިލި ފޭސް 2 އަދި ގދ. ގައްދޫ ގައި މިހާރު ކުރިއަށްދާ މަސައްކަތްތަކުގެ ތަފްޞީލް އާރްޑީސީ އިން ވަނީ ދީފައެވެ.
ގއ. ކޮލަމާފުށީ ގައި މިވަގުތު ކުރަމުންދަނީ، ސައިޓުގައި ކާރބް ސްޓޯން އެޅުމުގެ މަސައްކަތާއި، ކޭބަލް ޖަންކްޝަން އަދި ކޭބަލް ޖަންކްޝަންގެ މަތި ކާސްޓް ކުރުމުގެ މަސައްކަތުގެ އިތުރުން ތުއްތު ކަތީބް ހިނގުމުގައި މަގު އެއްވަރުކޮށް ދުވާރުގެ މަސައްކަތާއި ތުއްތު ކަތީބް ހިނގުމުގައި ކޯނަރ ކާރބް ޖެހުމުގެ މަސައްކަތެވެ.
ކޮލަމާފުށީގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މި މަސައްކަތަކީ ގާތްގަނޑަކަށް 85.3 މިލިއަން ރުފިޔާގެ މަޝްރޫޢެކެވެ. ޕްލޭނިންގ މިނިސްޓްރީން މި މަސައްކަތް ކުރުމަށް އާރްޑީސީއާ ހަވާލުކުރީ 2022 ވަނަ އަހަރުގެ ޖަނަވަރީ މަހުއެވެ.
ގއ. ވިލިނގިލީގައި މިހާރު ކުރަމުންދަނީ، ބަރާސީލު މަގުގައި ސްޓޯރމް ވޯޓަރ ޖަންކްޝަންގެ މަސައްކަތާއި ބަރާސީލު މަގުގައި ސްޓޯރމް ވޯޓަރ ހޮޅި އެޅުމުގެ މަސައްކަތުގެ އިތުރުން އެ ރަށުގެ ހަވީރީ ހިނގުމުގެ ދެކުނުކޮޅުގައި ކާރބް ސްޓޯން ޖެހުމުގެ މަސައްކަތް ވެސް މިވަގުތު ކުރިއަށްއެބަދެއެވެ.
ގއ. ވިލިނގިލީ ފޭސް 2 ގެ މި މަސައްކަތަކީ 98.33 މިލިއަން ރުފިޔާގެ މަޝްރޫޢެކެވެ. މި މަސައްކަތް ކުރުމަށް އާރްޑީސީއާ ހަވާލުކުރީ 2022 ވަނަ އަހަރުގެ އޭޕްރީލް މަހު އެވެ.
ސައުތު ރީޖަންގެ ރަށްތަކުގެ ތެރެއިން މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް މިހާރު ކުރަމުންދާ އަނެއް ރަށަކީ ގދ. ގައްދޫ އެވެ.
ގައްދޫ ގައި މިހާރު ކުރަމުންދަނީ، އޯކިޑްމަގުގައި ކަލްވަރޓް ޖެހުމުގެ މަސައްކަތާއި، އޯކިޑްމަގުގައި ހޮޅިއެޅުމުގެ މަސައްކަތުގެ އިތުރުން ތާރުގަނޑާ ހިސާބަށް ސްޓޯރމް ވޯޓަރ ޓޭންކްތައް އެއްވަރު ކުރުމުގެ މަސައްކަތެވެ. މިއީ 138.7 މިލިއަން ރުފިޔާ އަށް 2020 ވަނަ އަހަރުގެ ފެބުރުއަރީ މަހު އާރްޑީސީ އިން ހަވާލުވި މަޝްރޫޢެކެވެ.