މޯލްޑިވްސް ޕޯޓްސް ލިމިޓެޑުގެ މުވައްޒަފުންނަށް އަމާޒުކޮށްގެން އެމްއެންޑީއެފް ކޯސްޓްގާޑުން ހިންގި "ސެޓިފިކެޓް 1 އިން ޕޯޓް ސެކިއުރިޓީ ޓްރެއިނިންގ" ކޯހުގެ ދަސްވެނިވުމުގެ ރަސްމިއްޔާތު ބާއްވައިފިއެވެ.
މި ކޯސް ނިންމުމުގެ ގޮތުން ބޭއްވި ރަސްމިއްޔާތުގައި، އެމްޕީއެލްގެ ޑެޕިއުޓީ ޗީފް އެގްޒެކްޓިވް އޮފިސަރ، އަލީ ހާޝިމް އާއި އެ ކުންފުނީގެ އިސްވެރިންގެ އިތުރުން އެމްއެންޑީއެފް ކޯސްޓްގާޑްގެ އިސް އޮފިސަރުންނާއި ކޯހުގެ މުދައްރިބުން ބައިވެރިވެލެއްވިއެވެ.
ބަންޑާރަކޮށީގައި އިއްޔެ ބޭއްވި މި ރަސްމިއްޔާތު ޝަރަފުވެރިކޮށްދެއްވައި ވަނަވަނައަށް ހޮވުނު ބައިވެރިންނަށް ޓްރޮފީއާއި ހަނދާނީ ލިޔުން ހަވާލުކޮށްދެއްވީ ކޯސްޓްގާޑްގެ ކޮމަޑާންޓް، ބްރިގޭޑިއަރ ޖެނެރަލް މުޙައްމަދު ސަލީމްއެވެ.
މި ރަސްމިއްޔާތުގައިި ކޯހުގެ ބައިވެރިންނަށް ބެޖާއި ހަނދާނީ ލިޔުން ހަވާލުކޮށްދެއްވީ އެމްއެންޑީއެފް ކޯސްޓްގާޑްގެ ޕްރިންސިޕަލް ޑައިރެކްޓަރ، ލެފްޓިނެންޓް ކާނަލް މުޙައްމަދު ރިޒްމީ ވަލީދުއެވެ. އަދި މި ކޯހުގެ މުދައްރިބުންނަށް ހަނދާނީ ލިޔުން ހަވާލުކޮށްދެއްވީ އެމްޕީއެލްގެ ޑެޕިއުޓީ ސީއީއޯ ޢަލީ ހާޝިމްއެވެ.
ސީ ޕޯޓް ސެކިއުރިޓީގައި މަސައްކަތްކުރާ ފަރާތްތަކަށް ބޭނުންވާ ހުނަރާއި ޢިލްމު އުނގަންނައިދީ ހަރުދަނާ ސެކިއުރިޓީ އޮފިސަރުން އުފެއްދުމުގެ މަޤްޞަދުގައި ކުރިއަށްގެންދިޔަ މި ތަމްރީނު ޕްރޮގްރާމްގައި މޯލްޑިވްސް ޕޯޓްސް ލިމިޓެޑުގެ 18 މުވައްޒަފުން ބައިވެރިވެ، ކޯސް ފުރިހަމަކޮށްފައިވެއެވެ. އޭގެތެރޭގައި، ކުޅުދުއްފުށީ ބަނދަރާއި، ހިތަދޫ ބަނދަރުން ކުރެން ކޮންމެ ބަނދަރަކުން ދެ އޮފިސަރުން ހިމެނެއެވެ.
މި ކޯހުގެ ބައިވެރިންގެ ތެރެއިން އެންމެ ފާހަގަކޮށްލެވޭ ތިން ސެކިއުރިޓީ އޮފިސަރުން ހޮވާފައިވާއިރު، އެ ކާމިޔާބީ ހާސިލްކޮށްފައިވަނީ؛
1. އަފްސަލް އިބްރާހިމް، ސީނިއަރ ސެކިއުރިޓީ އިންސްޕެކްޓަރ - "ބެސްޓް އޯލް-ރައުންޑާ"
2. މުޙައްމަދު ނުހާދު، ސީނިއަރ ސެކިއުރިޓީ އެސިސްޓެންޓް - "ބެސްޓް އިން މެރިޓް"
3. މުޙައްމަދު އަބްދުﷲ، ސީނިއަރ ސެކިއުރިޓީ އެސިސްޓެންޓް - "ފިޓެސްޓް ޕާޓިސިޕެންޓް"
2023 ވަނަ އަހަރު ނޮވެންބަރު 4 ވަނަ ދުވަހުން ފެށިގެން އެއްމަސް ދުވަހަށް ހިންގި މި ޕްރޮގްރާމަކީ އެމްޕީއެލްގެ މުވައްޒަފުންނަށް ހިންގި މީގެ ދެވަނަ ޕްރޮގްރާމެވެ. މީގެ ފުރަތަމަ ޕްރޮގްރާމް ހިންގާފައިވަނީ 2020 ވަނަ އަހަރުއެވެ.
މި ކޯސް އިންތިޒާމް ކުރުމުގައި އެމްއެންޑީއެފް އިން ދެއްވި އެހީތެރިކަމާއި އެއްބާރުމަށް އެމްޕީއެލް އިން ވަނީ ޝުކުރުއަދާކޮށްފައެވެ.