މި އަހަރުގެ 'ތިމާވެށީގެ ދުވަސް' ފާހަގަ ކުރުމުގެ ގޮތުން ސްޓެލްކޯ އިން ގަސް އިންދުމުގެ ހަރަކާތެއް ބޭއްވުމަށް ހަމަޖެހިފައިވާ ކަމަށް އެ ކުންފުނިން ބުނެފިއެވެ.

ސްޓެލްކޯގެ މެނޭޖިންގ ޑިރެކްޓަރު، ހުސެއިން ފަހުމީ އެކްސްގައި އިއްޔެ ކުރެއްވި ޕޯސްޓެއްގައިވަނީ، މިއީ އެ ކުންފުނީގެ މުވައްޒަފުން އިސްނަގައިގެން ކުރިއަށްގެންދިއުމަށް ހަމަޖެހިފައިވާ ހަރަކާތެއް ކަމަށެވެ.

އެގޮތުން، ސްޓެލްކޯގެ އެމްޑީ ފަހުމީ ވިދާޅުވީ، މި ހަރަކާތަކީ ރާއްޖޭގެ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު، ކޮޕް28 ސަމިޓްގައި އިޢްލާންކުރައްވާފައިވާ 5 މިލިއަން ގަސް އިންދުމުގެ ޕްރޮގްރާމްގައި ބައިވެރިވެ، އެ މަސައްކަތުގައި ހިއްސާވުމުގެ ގޮތުން އެ ކުންފުނީގެ ހުރިހާ މުވައްޒަފުން ބައިވެރިވާ ގޮތަށް ހިންގާ ހަރަކާތެއް ކަމަށެވެ.

އެމްޑީ ފަހުމީ ކުރެއްވި ޕޯސްޓް ނިންމަވާލައްވަމުން ވަނީ، މި ޕްރޮގްރާމްގެ ޛަރިއްޔާއިން ސްޓެލްކޯ އިން އުފައްދާ ކާބަން އޮފްސެޓްކުރުމަށް ހިފާފައިވާ އަމާޒަށް ވާސިލްވުމަށް މަގުފަހިވާނެތީ، އެ ކުންފުނީގެ ހުރިހާ މުވައްޒަފުން ބައިވެރިވުމަކީ މުހިއްމު ކަމެއްގެ ގަބޫލުކުރައްވާ ކަމަށް ވެސް ވިދާޅުވެފައެވެ.