ވެލާނާ އިންޓަނޭޝަނަލް އެއާޕޯޓުން ބާއްވާ 7 ވަނަ އެއާ ސާވިސް ވޯލްޑް ކޮންގްރެސްގެ ޑިޖިޓަލް ޕާޓްނަރެއްގެ ގޮތުގައި ދިރާގުން ސޮއިކޮށްފިއެވެ.
މިފަހަރުގެ ކޮންގްރެސް ކުރިއަށްދާނީ އަންނަ ޖުލައި މަހުގެ 9 އިން 11 އަށް ކުރުނބާ މޯލްޑިވްސް ގައެވެ.
މި ކޮންގްރެސްގައި އެއާލައިންތަކާއި، ޓޫރިޒަމް ބޯޑުތަކުންނާއި، އޭވިއޭޝަން އޮތޯރިޓީތަކާއި، އޭވިއޭޝަން ސަޕްލަޔަރުން އަދި އެއާޕޯޓްތަކާއި އެހެނިހެން ސެކްޓަރ ހިމެނޭ ގޮތަށް 200 އެއްހާ ޑެލިގޭޓުން ބައިވެރިވާނެ އެވެ.
ކޮންގްރެސްގެ ސަބަބުން، ކުރިއަށް އޮތްތަނުގައި ދާއިރާއާ ގުޅުންހުރި އެންމެހާ ފަރާތްތަކުގެ މެދުގައި ގުޅުން ބަދަހި ކުރުމުގެ ފުރުޞަތު ތަނަވަސްވެ، ކަންކަމުގައި އެއްބާރުލުން ލިބި ތަރައްގީގެ މަގުތައް ފަހިވެ، އެއާ ސާވސްގެ މަސައްކަތްތައް ކުރިއަށްގެންދިއުމުގެ ފަސޭހަވެގެންދާނެ ކަމަށް އިންތިޒާމްކުރާ ފަރާތްތަކުން ގަބޫލުކުރެއެވެ.
ދިރާގުގެ ޗީފް ކޮމާޝަލް އޮފިސަރ، އަލީ ރިޔާޒް ވިދާޅުވީ، އެއާ ސާވިސް ވޯލްޑް ކޮންގްރެސް 2024 ގެ ޑިޖިޓަލް ޕާޓްނަރަށްވެވުމަކީ އެ ކުންފުންޏަށް ލިބުނު ވަރަށް ބޮޑު އުފަލެއް ކަމަށެވެ.
އެމްއޭސީއެލްގެ ސީއީއޯ އަދި އެމްޑީ ޝަރީފް ވިދާޅުވީ، ކޮންގްރެސް އަށް ހައިސްޕީޑް ކަނެކްޓިވިޓީ ފޯރުކޮށްދިނުމުގެ އިތުރުން މި އިވެންޓްގައި ބައިވެރިވާ ބައިނަލްއަގުވާމީ ޑެލިގޭޓުން ރާއްޖެއަށް ކުރާ ދަތުރުގައި ގުޅުން ބަދަހިކޮށް ދެމިތިބުމަށް ދިރާގުން ވެދެއްވާ ދީލަތީ އެހީތެރިކަމާއި އެއްބާރުލުމަށް ހާއްސަ ޝުކުރެއް އަދާކުރާ ކަމަށެވެ.