ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ވިއްކާ ތެލުގެ އަގު މިއަދުން ފެށިގެން ހެޔޮ ކޮށްފިއެވެ.
ރާއްޖެ އަށް އެންމެ ގިނަ އިން ތެޔޮ އެތެރެކޮށް ވިއްކާ އެސްޓީއޯގެ ސަބްސިޑިއަރީ ކުންފުނި ފިއުލް ސަޕްލައި މޯލްޑިވްސް (އެފްއެސްއެމް)ގެ ޝެޑްތަކުން މިއަދުން ފެށިގެން ޕެޓްރޯލް ލީޓަރެއް ވިއްކާނީ 13.92ރ. އަދި ޑީސަލް ލީޓަރެއް 13.98ރ. އަށެވެ.
މިދިޔަ ޑިސެންބަރު މަހުން ފެށިގެން އެސްޓީއޯ އިން ޕެޓްރޯލް ލީޓަރެއް 14.33ރ. ވިއްކަމުންދިޔައިރު، ޑީސަލް ލިޓަރެއް ވިއްކީ 14.62ރ. އަށެވެ.
އެހެންކަމުން މި ފަހަރު އެސްޓީއޯ އިން ތެލުގެ އަގަށް ގެނައި ބަދަލުގެ ސަބަބުން ރާއްޖޭގެ ބާޒާރުގައި ޕެޓްރޯލް ލީޓަރަކުން 35 ލާރި އަދި ޑީސަލް ލީޓަރަކުން 70 ލާރި ކުޑަވެގެންދާނެ އެވެ. މިއާއެކު، ރާއްޖޭގެ ބާޒާރުގައި ޑީސަލް އަގު ހަތަރު އިންސައްތަ އަށް، ޕެޓްރޯލްގެ އަގު ތިން އިންސައްތަ ދަށަށް ވަނީ ގޮސްފައެވެ.
ތެލުގެ އަގު ހެޔޮކުރީ ދުނިޔޭގެ ބާޒާރުގައި ތެޔޮ ގަންނަން ލިބޭ އަގު ހެޔޮ ވުމާ ގުޅިގެން ކަމަށް އެސްޓީއޯ އިން ބުންޏެވެ.
އެސްޓީއޯ އިން އަބަދުވެސް މަސައްކަތް ކުރަމުންދަނީ އެ ކުންފުނިން ފޯރުކޮށްދޭ އެންމެހާ ހިދުމަތްތައް ހުއްޓުމެއްނެތި، ދެމެހެއްޓެނިވި ގޮތެއްގައި ރައްޔިތުންނަށް ފޯރުކޮށްދެމުން ގެންދިއުމަށް ކަމަށް އެ ކުންފުނިން ބުނެއެވެ.