ނޯތު ރީޖަންގެ ރަށްތަކުގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން ހދ. ކުޅުދުއްފުށި ސިޓީ، ހއ. އިހަވަންދޫ އާއި ރ. ހުޅުދުއްފާރުގައި މިވަގުތު ހިނގަމުންދާ މަސައްކަތްތަކުގެ ތަފްޞީލް އާރްޑީސީ އިން އާންމުކޮށްފިއެވެ.
ހއ. އިހަވަންދޫގައި މިވަގުތު ކުރަމުންދަނީ، ސައިޓް ސާފުކުރުމުގެ މަސައްކަތާއި، ކާރބް ސްޓޯން ކާސްޓްކުރުމުގެ މަސައްކަތުގެ އިތުރުން ސްކޫލުގެ ފުޓްސަލް ޕިޗުގެ މަސައްކަތެވެ.
އިހަވަންދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މި މަސައްކަތަކީ 102.8 މިލިއަން ރުފިޔާގެ މަޝްރޫޢެކެވެ. މި މަސައްކަތް ކުރުމަށް އާރްޑީސީ ހަވާލުކުރީ މިދިޔަ އަހަރުގެ އޭޕްރީލް މަހު އެވެ.
ރާއްޖޭގެ އުތުރުގެ އިގްތިޞާދީ މައި ހަބުގެ ގޮތުގައި ބެލެވޭ ކުޅުދުއްފުށި ސިޓީގައި މިހާރު ކުރަމުންދަނީ، ދޮންއުމަރުކަލޭގެފާނު މަގުގައި ޕޭވިންގގެ މަސައްކަތާއި، ސަހަރާ މަގުގައި ސްޓޯރމް ވޯޓަރ އެކްސްކެވޭޝަން އަދި ސްޓޯރމް ވޯޓަރ ޕައިޕް ލައިންގެ މަސައްކަތުގެ އިތުރުން ދަނޑުމަގުގައި ސްޓްރީޓް ލައިޓް ކޭބަލް އެޅުމުގެ މަސައްކަތެވެ.
ކުޅުދުއްފުށީ ސިޓީގެ މަގުތައް ޒަމާނީ ފެންވަރަށް ހެދުމުގެ މަސައްކަތް ކުރުމަށް އާރްޑީސީއާ ހަވާލުކުރީ 2021 ވަނަ އަހަރުގެ ޖޫން މަހުގައެވެ. މިއީ 100.7 މިލިއަން ރުފިޔާގެ މަޝްރޫޢެކެވެ.
ނޯތު ރީޖަންގެ ރަށްތަކުގެ ތެރެއިން މަގުތައް ޒަމާނީ ފެންވަރަށް ތަރައްޤީ ކުރުމުގެ މަސައްކަތް މިހާރު ކުރަމުންދާ އަނެއް ރަށަކީ ހުޅުދުއްފާރެވެ.
ހުޅުދުއްފާރުގައި މިހާރު ކުރަމުންދަނީ، ބޮޑުތަކުރުފާނު މަގުގައި ސްޓޯރމް ވޯޓަރ ކެޗްޕިޓް ބެހެއްޓުމުގެ މަސައްކަތާއި، މަޖީދީމަގުގައި ސްޓްރީޓް ލައިޓް ކޭބަލް އެޅުމުގެ މަސައްކަތެވެ.
ހުޅުދުއްފާރުގެ މަގު މަގުތައް ޒަމާނީ ފެންވަރަށް ހެދުމުގެ މަސައްކަތް ކުރުމަށް އާރްޑީސީއާ ހަވާލުކުރީ 2021 ވަނަ އަހަރުގެ މެއި މަހުގެ ތެރޭގައި 88.9 މިލިއަން ރުފިޔާ އަށެވެ.