ދިވެހި ޅެންވެރިއަކު ލިޔެފައި ވެއެވެ. "އުތުރާއި ދެކުނުން އަޔަސް ހެޔޮ މަށަށް، ކަޅުވިޔަސް ދޮންވިޔަސް ހެޔޮ މަށަށް" މިއީ ދިވެހިންގެ ތެރޭގައި ވަރަށް ބޮޑު މަޝްހޫރު ކަމެއް ލިބިގެން ދިޔަ ޅެމެކެވެ. ލަވައެކެވެ. އޭރުގެ ދިވެހި ރާއްޖޭގެ އަޑުންނާއި ޓެލެވިޒަން މޯލްޑިވްސް އިން ފެނި، އިވިގެންދިޔަ މި ލަވައިގާ ހަގީގަތުގައި މި ބުނެވެނީ ވަރަށް މާނަ ފުން ބަސް ތަކެކެވެ. "ލޯބި ވާށޭ ލޯބި ދޭށޭ" ގެ ނަމުން މަޝްހޫރުވި މި ލަވައިގެ މާނާގައި ފަނީ ފުން އިހުސާސް ތަކާއި ޖަޒުބާތީ އަސަރުތަކެކެވެ. 

މުޅި ޅެމުންވެސް އަޅުގަނޑަށް ފާހަގަވި އިބާރާތް ކޮޅެއް އެބަ އޮތެވެ. މިއީ ވަކި އަޅުގަނޑަށް އެކަނި ފާހަގަވި ބައެއް ނޫނެވެ. އެތައް ބަޔަކަށް ކަމުދިޔަ އިބާރާތްކޮޅެކެވެ. މި ލިޔުމުގެ ފެށުމުގައި އެ ވަނީ އެ އިބާރާތް ކޮޅެވެ. "އުތުރާއި ދެކުނުން އަޔަސް ހެޔޮ މަށަށް، ކަޅުވިޔަސް ދޮންވިޔަސް ހެޔޮ މަށަށް"! މިއެވެ.

ބުނެވެނީ ހަގީގަތުގައި ނަސްލީ ތަފާތު ކުރުމާއި މުޅިން ދެކޮޅު ވާހަކައެވެ. ހަމުގެ ކުލައަށް ބަލާ އިންސާނުން ތަފާތު ކުރާ ކުރުމަށް ހެޔޮ ވެގެން ނުހުރެވޭނެ ވާހަކައެވެ. ކުޑަކުދިންނަށް އަމާޒުކޮށް ތައްޔާރުކޮށްފައި އޮތް ލަވައެއް ނަމަވެސް މި ލަވައިގެ މި އިބާރާތްތަކަކީ ހަމަ މުޅި އިންސާނިއްޔަތަށް ނިސްބަތް ކުރެވިދާނެ އިބާރާތެކެވެ. ބުނެވޭ ގޮތުގައި ދިވެހިންނަކީ ތަފާތު ނަސްލުތަކަކުން އުފަންވި ނަސްލެކެވެ. އެކަން ދިވެހި މުޖުތަމައުންވެސް ދޭހަވެއެވެ. ލަވައިގަ އެބުނާ ދޮނާއި ކަޅުގެ ފަރަގު މިކަން ހާމަ ކޮށްދެއެވެ. އާނއެކެވެ! ދިވެހިންގެ ތެރޭގައި ހަމަ ވަރަށް ދޮން ކުދިންނާއި، ހަމުގެ ކުލަ ކަޅު ކުދިން އުޅެއެވެ. އެހެނަސް އެއިން ހަމަ ކޮންމެ ކުއްޖަކީ އެހާމެ ލޯބި ކުއްޖެކެވެ.

ދިވެހިންގެ ތެރޭގައިވެސް ދޮން މީހުންނާއި ކަޅު މީހުން ތަފާތު ކުރުން ހިސާބަކަށް އޮވެއެވެ. އޮވެގެން ނުވާނެ މުޑުދާރު ސިފައެކެވެ. ނަމަވެސް އެޒަމާނުގައިވެސް އަދި މިޒަމާނުގައިވެސް މިކަން ހިސާބަކަށް އެބަ އޮތެވެ. މި ޅެމުގައި މިފަދަ އިބާރާތެއް މި މޭރުމުން ގެނެސްފައި އެ އޮތީވެސް އެކަމަށް އަލި އަޅުވާލާ އެކަމަށް ހޭލުންތެރިކަން އިތުރު ކުރުމުގެ ގޮތުން ކަމުގައި ދެކެމެވެ. 

އިންސާނާގެ ސޫރަ އަށް، ސިފަ އަށް، ހަމުގެ ކުލަ އަށް މަލާމާތް ކުރުމީ ކުރުން ހެޔޮވާވަރުގެ ކަމެއް ނޫނެވެ. މާތް ﷲ އިންސާނާ ހެއްދެވީ އެއްމެ ރިވެތި ސޫރާގައެވެ. އެ ސޫރައަށް މަލާމާތް ކުރަން އިންސާނާ މިއީ ކާކު ހެއްޔެވެ؟ ހަމުގެ ކުލަ ކަޅު ވުމީ މިއަދުވެސް އެބައިމީހުންނަށް މަލާމާތާ ފުރައްސާރަ ރައްދުވާ ކަމެއްގެ ގޮތުގައި މުޅި ދުނިޔެ އެބަ ދެކެއެވެ. ހިތާމަ އަކީ ދިވެހިންގެ ތެރޭގައިވެސް މި އާދަ އަދިވެސް އޮތް ކަމެވެ. މިއީ މިއަދު ގިނަ ބަޔަކު ދައްކާ ވާހަކައެއް ނޫނެވެ. ނަމަވެސް ގަބޫލުކުރަން ޖެހޭ ހަގީގަތަކީ ދިވެހިންގެ ތެރޭގައިވެސް މި މުޑުދާރު އާދަ އޮތް ކަމެވެ.

އިންސާނާގެ ހަމުގެ ކުލަ ދޮންވިޔަސް، ކަޅުވިޔަސް އެ އިންސާނާގެ ހަށިގަނޑުގައި އުނިވާ ކަމެއް ނެތެވެ. އެއީ ހަމަ ކައްޓާ މަހެވެ. ވީއިރު ދޮން މީހުން ކަޅު މީހުންނަށް މަލާމާތް މި ކުރަނީ ދޮނަކީ ވަކި މާ ރީތި ކުލަ އަކަށް ވާތީ ހެއްޔެވެ؟ އެނގޭ ހެއްޔެވެ؟ އިންސާގެ ހަމުގެ ކުލަ އަކީ އެ އިންސާނާކު އަމިއްލަ އަށް ޖެއްސި ކުލަ އެއް ނޫނެވެ. އެއީ މާތް ﷲ ޖެއްސެވި ކުލަ އެކެވެ. އެހެންކަމުން އަނެކާގެ ހަމުގެ ކުލައަށް ތިބާ މަލާމާތް ކުރާއިރު، ތިބާގެ ހަމުގެ ކުލަ ބަދަލުވެދާނެ ކަމާމެދު ތިބާ ބިރު ނުގަންނަ ކަމީ އީމާންތެރިކަމުގެ ބަލިކަށި ކަމެވެ. އާދޭހެވެ! ދޮންވިޔަސް ކަޅުވިޔަސް މަށަށް ހެވެއެވެ. އިންސާނެއް ވިއްޔާ ތަފާތެއް ނުކުރާނަމެވެ. އަދުލުވެރިކަމާއި އިންސާފުން އަބަދުވެސް ކަންކަން ކުރާށެވެ. ނަސްލީ ތަފާތުކުރުންތަކަށް ޖާގަ ނުދޭށެެވެ!