ވެމްކޯގެ "ހޮބާ" ޚިދުމަތް ލިބިގަތުމަށް ސްޓެލްކޯ އިން އެ ކުންފުންޏާއެކު އެއްބަސްވުމެއްގައި ސޮއިކޮށްފިއެވެ.
"ހޮބާ" ޚިދުމަތް ހޯދުމަށް އެއްބަސްވުމުގައި ސޮއިކޮށްފައިވަނީ ސްޓެލްކޯގައި ބޭއްވި ހަފްލާއެއްގައެވެ.
މި އެއްބަސްވުމުގައި ސްޓެލްކޯގެ ފަރާތުން ސޮއި ކުރެއްވީ، މެނޭޖިންގ ޑިރެކްޓަރ ޙުސައިން ފަހުމީ އެވެ. އަދި ވެމްކޯގެ ފަރާތުން ސޮއި ކުރެއްވީ އެކުންފުނީގެ މެނޭޖިންގ ޑިރެކްޓަރ ޝަހީދު އިބްރާހީމް އެވެ.
މި އެއްބަސްވުމުގެ ދަށުން، މާލެ، ހުޅުމާލެ އަދި ވިލިމާލޭގައި ހުރި ސްޓެލްކޯގެ ޢިމާރާތްތަކާއި، ސްޓެލްކޯ ހިޔާގެ 2 ޓަވަރު ފޮޅައި ސާފުކުރުމުގެ މަސައްކަތް ވަނީ ވެމްކޯއާއި ޙަވާލުކޮށްފައެވެ.
ވެމްކޯގެ "ހޮބާ" ޚިދުމަތަކީ ސަރުކާރުގެ ކުންފުނިތަކާއި އޮފީސްތަކާއި އިދާރާތަކާއި ދައުލަތުގެ ބެލުމުގެ ދަށުގައި ހުރި އެހެނިހެން ތަންތަނަށް އަމާޒުކޮށްގެން ދޭން ފެށި ހިދުމަތެކެވެ. މީގެ ބޭނުމަކީ ހިދުމަތްތައް ފުޅާކޮށް ވެމްކޯއަކީ ފައިދާވާ ކުންފުންޏަކަށް ހެދުމެވެ.