ކްރީމް ކެރަމަލްއަކީ އަނގަޔަށް މީރު ފޮނިކާ އެއްޗެކެވެ. ތައްޔާރުކޮށްލަން ވަގުތުކޮޅެއް ހޭދަވީ ނަމަވެސް މިއީ ރޯދަމަހު ދިވެހިންގެ ތެރޭގައި ވަރަށް މަޤުބޫލު އެއްޗެކެވެ.
ތައްޔާރިއަށް ހޭދަވާނެ ވަގުތު: 30 މިނެޓު.
ކެއްކުމަށް ނަގާނެ ވަގުތު: 45 މިނެޓު.
ބޭނުންވާނެ ޖުމްލަ ވަގުތު: 1 ގަޑި 15 މިނެޓު.
ބޭނުންވާނެ ތަކެތި:
• 1 ދަޅު ގެރިކިރު
• 1 ޖޯޑު ފެން
• 5 ބިސް
• 2 ސައިސަމްސާ ވެނީލާ އެސެންސު
• ½ ސައިސަމްސާ ލޮނު
• 3 މޭޒުމަތީ ސަމްސާ ހަކުރު
• 2 މޭޒުމަތީ ސަމްސާ ފެން
ތައްޔާރުކުރާނެ ގޮތް:
• ތައްޓަކަށް ބިސްތަށް މޮއްވާލުމަށްފަހު، ގެރިކިރު، 1 ޖޯޑު ފެން އަދި ލޮނުކޮޅު އަޅާލުމަށްފަހު ރަނގަޅަށް އެއްކޮއްލާށެވެ.
• މަޑު ގިނީގައި، ފިހަން ގެންގުޅޭ ޓްރޭ ބަހައްޓާލާ، އެޔަށް ހަކުރުކޮޅާއި ފެންފޮދު އަޅާލާށެވެ.
• ހަކުރުކޮޅު ރަނގަޅަށް ވިރި، ރަތް(މަޅު) ވެލަންދެން ހޫނުކޮއްލާށެވެ.
• ހަކުރުކޮޅު މަޅުވުމުން، އުނދުން ނިވާލުމަށްފަހު 2 މިނެޓު ބަހައްޓާލާށެވެ.
• މަޅުކުރި ހަކުރުކޮޅު ކުޑަކޮށް ހަރުވެލާ ގޮތްވުމުން، ކުރިން އެއްކުރި ތަކެތި ހަކުރުކޮޅުގެ މައްޗަށް އޮއްސާލާށެވެ.
• 150 ޑިގްރީ އަށް އަވަން ހޫނުކޮއްލާށެވެ.
• ފުން ތަވައެއްގެ ތެރޭގައި ތުވާއްޔެއް ފަތްޖަހާލާ ބާރުކޮއްލާށެވެ. ފިހަން ތައްޔާރުކުރެވުނު ޓްރޭ އެ ތުވާލި މަތީގައި ބަހައްޓާލާށެވެ. ހޫނުފެންފޮދެއް އެ ތަވާގެ ތެރެއަށް އަޅާލާށެވެ. މި ފެންފޮދު ފިހަން ތައްޔާރުކުރެވުނު ޓްރޭގެ މެދާހިސާބަށް އަރަން ވާނެއެވެ.
• މުޅި ތަވާ އެއްކޮށް ފޮއިލު ކަރުދާހުން ބައްދާލާށެވެ.
• އަވަނުގައި 40 – 45 މިނެޓުވަންދެން ފިހެލާށެވެ.
• ފިހެ ނިމުމުން އަވަނުން ނަގާ ހިހޫ ވަންދެން ބަހައްޓާލާށެވެ. އެއަށްފަހު އިންސާފު ކުރައްވާށެވެ.