އެތައް ރެއެއްގެ ނިދި ޤުރުބާންކޮށް ހަށިގަނޑުގެ އެންމެ ހިމަ ނާރުން ހިތްވަރު ނެރެގެން ހޯދި ނަތީޖާ މިނެކިރުމަށް ގަދަ 10ގައި ހިމެނުނުތޯ ޔަގީންކުރާ ކަމީ ހަޤީޤަތެވެ. ސާނަވީ އަދި މަތީ ސާނަވީގައި އެންމެ ރަނގަޅު ނަތީޖާ ހޯދާ ދަރިވަރުންގެ ކާމިޔާބީ ފާހަގަ ކުރުމަށް ގަދަ 10 ނުވަތަ ޓޮޕް 10 ހޮވަމުން އަންނަތާ ޒަމާންތަކެއް ވެއްޖެއެެވެ. ގަދަ 10 އެއްގެ އިތުރުން ދުނިޔޭގެ އެެކި ވަނަތަކުގައިވެސް ދިވެހި ދަރީންގެ ނަން ވިދާތަށް އަދި އަދަށްްވެސް ފެންނަށް އެބަ ހުއްޓެވެ. ނަތީޖާއެއްގެ ގޮތުން، ސްކޫލުތަކާއި މަދަރުސާތަކުގެ މައިގަނޑު އަމާޒަކަށް ވެފައިވަނީ ގަދަ 10 އަކަށް އަރާ ދަރިވަރުންގެ ނިސްބަތް އިތުރު ކުރުމެވެ. މަތީ އަރުތަވެރިންގެ މާލަމުގައި ސްކޫލުގެ ނަން ޖަރީކުރުމެވެ. ގޯހެއް ނޫނެވެ. އެ ބީދައިން މަސައްކަތް ކުރަންވެސް ވާނެއެވެ. ނަމަވެސް ފިޔަވަޅު ކަތިވާ ހިސާބަށް އަންނަނީ ހުރިހާވެސް ކާމިޔާބަކީ ގަދަ 10ގައި ހިމެނުންކަމުގައި ވިސްނޭ ހިސާބުންނެވެ.

ހަމައެކަނި އަމާޒު ނުވަތަ މޯޓިވް ގޮތުގައި ގަދަ 10 ހެދުމުގެ ސަބަބުން ކުދިންނަށް ކުރަނީ ނޭދެވޭ އަސަރެކެވެ. އެންމެ ފުރަތަމަ ޓީޗަރުންނާ މައިންބަފައިންގެ އިތުރުން އާއިލާ މީހުންގެ ފަރާތުން އަންނަނީ އުއްމީދެކެވެ. އެ އުއްމީދު މަޑުމަޑުން ޕްރެޝަރަށް ބަދަލުވެ، ގަދަ 10އަކަށް ވާސިލް ނުވެވިއްޖެނަމަ ދިރިއުޅުމުގެ މައިދާނުންވެސް މީހާ ފެއިލްވެދާނޭ ކަމުގެ ވަސްވާހުން ކުއްޖާގެ ސިކުނޑި ވަރުބަލިކޮށް މާޔޫސްކޮށްލައެވެ. އެތައް ބައެއްގެ އުއްމީދާއި ހުވަފެންތައް ތިމާއާއި ގުޅި ލާމެހި ވެފައިވާކަމާ އެ ހުވަފެންތަކުގައި ހަޤީޤީ ކުލަ ނުޖެއްސުނު ނަމަ ތިމާއަށްވުރެ ބޮޑު ނާކާމިޔާބުވެރިއެއް ނުހުންނާނެކަން އަމިއްލަ ނަފްސަށް ވިސްނެން ފަށައެވެ. ލޮލަށް ނުފެންނަ އެތައް ވަސްވާހީ ހިޔާލުތަކާއެކު ކުރާ ހަނގުރާމަތަކުގެ ތެރެއިން ކުއްޖާއަށް ދެން ރެޔަކާލަނީ އެހެން ހަޤީޤަތެކެވެ. ތިމާކުރާ މަސައްކަތާއި އޮހޮރިހާ ދައުތައް މިން ކުރާ ހަމަ އެކަނި އެއްޗަކީވެސް ގަދަ 10 ކަމެވެ. ކުރެވުނު އެންމެ ރަނގަޅަށް މަސައްކަތްކޮށް 8 މާއްދާއިން ނުވަތަ ކިޔަވާ ހުރިހާ މާއްދާއަކުން ފާސްވިޔަސް އެއީ އެއްވެސް އެއްޗެއް ނޫންކަމެވެ. ކިޔެވިކަމަށް ވަނީވެސް، ގަދައަޅާ މަސައްކަތް ކުރިކަމަށް ވަނީވެސް ގަދަ 10 އެއްގެ ކޮންމެވެސް ގިންތިއެއްގައި ހިމެނުނީމަކަމެވެ. 

އާޙިރު ނަތީޖާތޯއެވެ؟ ކިޔެވުންމަތިން ކުދިން ފޫހި ވަނީ އެވެ. ކިޔެވުމަކީ ބޭކާރުކަމެއް ގޮތުގައި ދެކެވެނީއެވެ. ކިޔެވުމަށް އިތުރަށް ހިތްވަރެއް ލިބުމަށް ހުރަސް އެޅެނީއެވެ. ކިޔެވުމަކީ ބޮޑު ބުރައަކާއި ތަކުލީފަކަށްވަނީއެވެ. ގަދަ 10އަކަށް އަރާ ދަރިވަރުންގެ ކާމިޔާބީ ސުކޫލުތަކުން ފާހަގަ ކުރާ ބީދައިން، 8 މާއްދާއިން ނުވަތަ ކިޔެވި ހުރިހާ މާއްދާއަކުން ފާސްވާ ދަރިވަރުންނާއި މުޅިއަކު ފާސްވާ ދަރިވަރުންގެ މަސައްކަތްތައްވެސް ބަލައިގަންނަކަން ކުދިންނަށް އިޙްސާސެއް ނުކޮށްދެވެއެެވެ. އާއިލާތަކުގައިވެސް ގަދަ 10 އަކަށް އަރާ ކުއްޖާއަށް ދެވޭ ލޯބި، ގަދަ 10 ނޭރި ނަމަވެސް ނަތީޖާ ރަނގަޅަށް ނެރުނު ކުއްޖާއަކަށް ނުދެވެއެވެ. ކޮންމެ ބައެއްގެވެސް ޢަމަލުތައް ހެކިދެނީ އެންމެ ކަމަކަށެވެ. ހުރިހާވެސް ކާމިޔާބަކީ ގަދަ 10އަކަށް އެރުންކަމެވެ. ކަށީގައި ނެތް ހިތްވަރުންވެސް މަސައްކަތްކޮށް، ފާހަގަކޮށްލެވޭ ނަތީޖާއެެއް ނެރުނަސް ގަދަ 10ގައި ނުހިމެނޭނަމަ މަސައްކަތް ކުރިކަމަށް ގަބޫލެއް ނުކުރާނެކަމެވެ. 

ގަަދަ 10 ނުހޮވާށެކޭ ނޫނެވެ. ގަދަ 10އަކަށް މަސައްކަތް ނުކުރާށެކޭވެސް ނޫނެވެ. އެ ޖޯޝާއި ފޯރީގައި މަސައްކަތްކުރާއިރު ހުރިހާ ދަރިވަރުން އެއްވަރު ނުވާނެކަން ދަންނަންވީއެވެ. ހަަމައެކަނި ގަދަ 10އަކަށް އެރުމުގެ ޤާބިލްކަން ހުރި ކުދިން ގަދަ 10 އަކަށް އެރުވުމުގެ މަގުސަދުތައް ގެންގުޅުމުގެ ބަދަލުގައި މާއްދާތަކުން ފާސްވުމަކީވެސް ކާމިޔާބިީކަން ޤަބޫލުކޮށް، ހުރިހާ ދަރިވަރުންގެ މަސައްކަތާއި ނަތީޖާ ބަލައިގަންނަންވީއެވެ. އެކުދިން ކުރާ މަަސައްކަތާމެދު ފަޙުރުވެރިވާކަން އެކުދިންނަށް އިޙްސާސްކޮށްދޭންވީއެވެ. އެއްވެސް ޝައްކެއް ވަސްވާހެއް ނެތް ގޮތުގައި، ގަދަ 10އަކަށް އަރާ ކުދިންނަށް އެ ކާމިޔާބަށް ވާސިލްވެވެނީ ނުހަނު ގިނަ ހަރުފަތްތަކާއި ބުރަ މަސައްކަތުންނެވެ. އެތައް ދަލެއް އޮހޮރުވާ އެތައް ރެއެއްގެ ނިންޖާއި އަރާމު އެކުދިން ޤުރުބާން ކުރެއެވެ. ކުރިޔާލާ ފިލާވަޅުތައް މުތާލިޢާކޮށް، ކިޔެވުމަށް ކިތައްމެ ވަގުތެއް ހުސްކުރެއެވެ. އެ ހިތްވަރާއި މިންނަތުން ގަދަ 10ގެ ގިންތީގައި ވިދާލާ ވިދާލުމަކީ ފާހަގަ ކުރުން ހައްޤުކަމެކެވެ. އެއީ ބަލައިގަތުން މުހިންމު ކާމިޔާބީއެކެވެ. ނަމަވެސް އެ ކާމިޔާބީއާއި ބުރަ މަސައްކަތް ބަލައިގަންނަ ފަދައިން، ގަދަ 10ގައި ޝާމިލް ނުވެވުނު ދަރިވަރުންގެ މަސައްކަތްވެސް ބަލައިގަންނާށެވެ. އެ ދަރިވަރުންވެސް ކުރީ މަސައްކަތެވެ. އެކަން ޤަބޫލުކުރާށެވެ.

ދީނަށް ލޯބިކުރާ، އިސްލާމީ އަޚުލާޤުން ޖަރީވެފައިވާ ދަރިންތަކެއް މުޖްތަމަޢަށް ނެރެވުމަކީވެސް ކާމިޔާބެކެވެ. ފަންނިއްޔާތާއި ދިރިއުޅުމުގެ ވައްޓަފާާޅީގެ އިތުރުން މަސައްކަތްތައް ދަންނަ ޖީލެއް ބިނާ ކުރެވުމަކީވެސް ލަނޑުދަނޑިއެކެވެ. ލިބޭ ޢިލްމެއްގެ ބޭނުން ކުރަން އެނގޭ، ދިރިއުޅުމުގެ މައިދާނުގައި ކަންކަމާ ކުރިމަތިލާންކެރޭ ޒުވާނުންތަކެއް އުފެއްދުމަކީވެސް އަމާޒެކެވެ. ބޭނުންވަނީ ކުދިން ކުރާ މަސައްކަތް ބަލައިގަންނަ، އެއީވެސް ކާމިޔާބެއްކަން ޤާބޫލުކުރާ ބައެކެވެ.