ސްޓެލްކޯ އިން 'ބިގިނަރސް އިލެކްޓްރީޝަން ކޯސް ފޯރ ވިމެން'ގެ ނަމުގައި ބާއްވާ ހާއްސަ ކޯހުގައި ބައިވެރިވުމުގެ ފުރުޞަތު ހުޅުވާލައިފިއެވެ.

ސްޓެލްކޯ އިން ވަނީ، އިލެކްޓްރިކަލް ދާއިރާއަށް އަންހެނުން ޝައުގުވެރިކުރުވައި، އެ ދާއިރާގައި ފިރިހެނުންނާއި އެއް ހަމައެއްގައި މަސައްކަތް ކުރުމުގެ ފުރުސަތު ފަހިކޮށްދިނުމަށްޓަކައި ކަރަންޓާއި ގުޅޭ އަސާސީ ކަންކަން ކިޔަވައިދިނުމަށް ބާއްވާ ޚާއްސަ ކޯހެއް ހިންގުމަށް އެ ކުންފުނިން ތައްޔާރުވަމުންދާ ކަމަށް ބުނެފައެވެ.

ސްޓެލްކޯ އިން ބުނީ، ރައްކާތެރިގޮތުގައި ކަރަންޓު ބޭނުން ކުރުމާއި، ކަރަންޓަށް ކުރާ ޚަރަދު ކުޑަ ކުރުމުގެ އިތުރުން، ކަރަންޓު ވަޔަރުކުރުމުގެ އަސާސީ މަޢުލޫމާތު މި ކޯހުގައި ކިޔަވައިދިނުމަށް ހަމަޖެހިފައިވާ ކަމަށެވެ.

މި ކޯހުގައި ބައިވެރިވުމަށް އެއްވެސް ފީއެއް ނުނަގާނެ ކަމަށާއި، އުމުރުން 16 އަހަރު ފުރިފައިވާ ކޮންމެ ކަނބަލަކަށް ވެސް އެ ފުރުސަތު މިހާރު ވަނީ ހުޅުވާލެވިފައިވާ ކަމަށް ސްޓެލްކޯ އިން ބުނެއެވެ. 

އަދި، ކޯހުގެ ކިޔެވުން ކުރިއަށްދާނީ ހަތަރު ދުވަހުގެ މުއްދަތަށް، ކޮންމެ ދުވަހަކު 3 ގަޑިއިރަށް ކަމަށް ވެސް ސްޓެލްކޯ އިން ވަނީ ބުނެފައެވެ.

ސްޓެލްކޯ އިން އިތުރަށް ބުނީ، މި ކޯހުގެ ކިޔަވައިދިނުން ކުރިއަށްގެންދިއުމަށް ހަމަޖެހިފައިވަނީ މާލޭގައި ކަމަށެވެ. ކޯހުގައި ބައިވެރިވުމުގެ ސުންގަަޑި އަކީ އަންނަ ނޮވެންބަރު މަހުގެ ހަތަރުވަނަ ދުވަހުގެ މެންދުރު 3:00 އާ ހަމައަށް ކަމަށެވެ.

އިތުރު މައުލޫމާތު ހޯއްދެވުމަށް: 3338244 އާއި 3338236 ގުޅުއްވާލައްވާ.