ސްޓެލްކޯގެ މެނޭޖިންގ ޑިރެކްޓަރ، ހުސެއިން ފަހުމީ އަށް "އޭޝިއާގެ އެންމެ އިންސްޕަޔަރިންގ އެގްޒެކެޓިވް" ގެ އެވޯޑު ލިބިއްޖެ އެވެ.
ސްޓެލްކޯގައި 25 އަހަރަށްވުރެ ދިގު މުއްދަތަކަށް ހިދުމަތް ކުރެއްވުމަށްފަހު މިހާރު އެ ކުންފުނީގެ އެމްޑީގެ މަގާމުގައި ހުންނެވި ފަހުމީ އަށް ލިބިވަޑައިގެންފައިވަނީ އޭޝިއާސް ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް 2024 އެވެ.
މި ހަފްލާގައި ސްޓެލްކޯ އިން ވަނީ، "އޭޝިއާސް ކޯޕަރޭޓް އެކްސެލެންސް އެންޑް ސަސްޓެއިނިބިލިޓީ އެވޯޑްސް 2024" ގެ އިންޑަސްޓްރީ ޗެމްޕިއަންސްގެ އެވޯޑް ހާސިލްކޮށްފައެވެ.
މި އެވޯޑް ހަފްލާ ބާއްވާފައިވަނީ މި މަހުގެ 14 އިން 15 އަށް ތައިލެންޑްގެ ވެރިރަށް، ބެންކޮކްގައެވެ.
ދުނިޔޭގެ އެންމެ މަޝްހޫރު ބައެއް ކުންފުނިތަކަށް ލިބިފައިވާ މިއެވޯޑް ދިނުމުގައި އެކުންފުންޏަކުން ދޭ ހިދުމަތް ކުރިއަރަމުން އަންނަ ފެންވަރަށާއި ދެމެހެއްޓެނެވި ގޮތުގައި ހިދުމަތް ފޯރުކޮށްދޭން ކުރާ މަސައްކަތްތަކަށާއި ކުންފުނީގެ ހިންގުން ހަރުދަނާކުރަން ކުރާ މަސައްކަތްތަކުގެ އިތުރުން ނެރޭ ނަތީޖާތަކަށް ވެސް ބަލަ އެވެ.
ސްޓެލްކޯއަކީ ރާއްޖޭގެ އެންމެ ބޮޑު ކަރަންޓް ވިއުގަ ހިންގާ ކުންފުންޏެވެ. މި ވިއުގައިން ވެރިރަށާއި އެ ސަރަޙައްދުގެ އަތޮޅުތަކުގައި 60،000 އަށްވުރެ ގިނަ ކަސްޓަމަރުންނަށް ހިދުމަތް ފޯރުކޮށްދެ އެވެ. އެ ކުންފުނިން ރާއްޖޭގެ 35 ރަށެއްގައިވެސް ކަރަންޓުގެ ހިދުމަތް ފޯރުކޮށްދެއެވެ. އަދި، ރައްޔިތުންނަށް ހިދުމަތް ދޭން 1،500 އަށްވުރެ ގިނަ މުވައްޒަފުން އެ ކުންފުނީގައި މަސައްކަތް ކުރެ އެވެ.
އިންޑަސްޓްރީތަކުގެ ޗެމްޕިއަނުންނަށް ދޭ މި ޝަރަފުވެރި އެވޯޑަކީ 2014 އިން ފެށިގެން ކޮންމެ އަހަރަކު ދެމުންދާ އެވޯޑެކެވެ. އަދި މިއީ ރާއްޖޭގެ ކުންފުންޏެއްގެ އިސްވެރިއަކަށް މި އެވޯޑު ލިބުނު ފުރަތަމަ ފަހަރެވެ.