މާތް ﷲ އިންސާނާ ހައްދަވާ، މި ދުނިޔޭގައި ހަލީފާވެރި ކުރެއްވީ އިންސާނާގެ ހަށިގަނޑު އެއީ އެކަލާނގެ ކުޅަދުންވަންތަ ކަމުގެ ހެތްކެއް ގޮތުގައި ލައްވާފައެވެ. މި ހަށިގަނޑު ހެދިބޮޑުވުމާއި ހަށިގަނޑުގެ މަސައްކަތްތައް ތަރުތީބުވެފައިވަނީ އަޖައިބެއްހާ ފުރިހަމަކޮށެވެ. މި ފުރިހަމަ ނިއުމަތަށް މާތް ﷲ އަށް ޝުކުރު ހުއްޓެވެ.

އިންސާނާ، މުކައްލަފަކަށް (ބޮޑު) އިންސާނަކަށް ޠަބައީ ގޮތުން ހަދައިދެނީ އިންސާނާގެ ހަށިގަނޑަށް އަންނަ ބަދަލަކުންނެވެ. އެއީ ހަގީގަތުގައި ވަކި އުމުރެއް "ލިޔެވިފައި" ވާ ކަމެއް ނޫނެވެ. އާދެ އިންސާނާ ބާލިޣު ވުމެވެ. އެހެންކަމުން ބާލިޣުވާ އިންސާނާ މުކައްލިފަކަށް ވާ ސަބަބުތަކަށް ބަލައިލުން މުހިންމެވެ. އިންސާނާގެ ހަށިގަނޑަށާއި ހިއްސުތަކަށް އަންނަ ތަފާތަކީ މިކަމުގައި އެންމެނަށްވެސް އިނގޭ ކަންކަމެވެ. ނަމަވެސް އަޅުގަނޑުމެންގެ ގިނަ މީހުންނަށް ނޭގޭ ވަރަށްބޮޑު ކަމެއް ވެއެވެ. އެއީ އިންސާނާ ބާލިޣުވަނީ ސިކުނޑީގެ ތިން ތަސައްރަފު ފުދުމަކުންކަމެވެ.

އެހެނީ އިންސާނާ ބާލިޣު ވުމުގެ ކުރިން އިންސާނާގެ ސިކުނޑި ތެރޭގެ ތިން ބަޔަކުން، ތިން މަސައްކަތެއް ކުރެއެވެ. އެގޮތުން ޕީނިއަލް ގްލޭންޑް ނަމަކަށް ކިޔާ ތަނުން އުފައްދާ މެލާޓޮނިން ނަމަކަށް ކިޔާ ހޯމޯންގެ މިންވަރު މަދުވެއެވެ. އޭގެ ސަބަބުން ސިކުނަޑީގެ އެހެން ބައެއް ކަމަށްވާ ހައިޕޮތަލަމަސް އިން "ގޮނޯޑޯޓްރޮފިން ރިލީސިން ހޯމޯން" ނަމަކަށް ކިޔާ ހޯމޯނެއް އުފައްދައެވެ. މެލާޓޮނިން އަކީ މި ދެންނެވި ހޯމޯން އުފެދުމަށް ހުރި ހުރަހެއް ކަމަށް ބައެއް ދިރާސާވެރިން ދެކިލައްވައެވެ. އެހެންކަމުން މެލާޓޮނިން މަދުވުމުން "ގޮނޯޑޯޓްރޮފިން ރިލީސިން ހޯމޯން" އުފެދެން ފަށައެވެ. އޭގެ ސަބަބުން ޕިޓިއުޓަރީ ގްލޭންޑް ނަމަކަށް ކިޔާ ސިކުނޑީގެ ބަޔަކުން އިތުރު ދެ ހޯމޯން އެއް އުފައްދައެވެ. އެއީ "ފޮލިކިއުލާ ސްޓިމުލޭޓިން ހޯމޯން" ނަމަކަށް ކިޔާ ހޯމޯނަކާއި "ލޫޓިނައިޒިން ހޯމޯން" ނަމަކަށް ކިޔާ ދެ ހޯމޯނެވެ. މި ތިން މަރުހަލާ ކަޑައްތު ކުރަނީ އިންސާނާގެ ސިކުނޑީގައެވެ. އެއަށްފަހު މި ދެ ހޯމޯން ލޭގެ ތެރެއިން އެ ހޯމޯން ތަކުގެ މަންޒިލަށް ވާސިލުވެއެވެ. އެހިސާބުން އިންސާނާގެ ހަށިގަނޑުން އެ ބަދަލުތަށް ފެންނަން ފަށައެވެ. 

(ޕީނިއަލް ގްލޭންޑް > ހައިޕޮތަލަމަސް > ޕިޓިއުޓަރީ ގްލޭންޑް)

މިނިޒާމުން އިންސާނާ ބާލިޣު ވާންދިމައިވާ ހަގީގީ ސަބަަބެއް އަދި މިހާތަނަށް ހޯދިފައެއް ނުވެއެވެ. ނަމަވެސް އެނގި ހާމަވާ ކަމަކީ މިދެންނެވި ނިޒާމުން އިންސާނާގެ ސިކުނޑީގެ ތިން ތަސައްރަފު ފުދުމެއް ހިނގާ ކަމެވެ. މިއީ މާތް ﷲ ކުޅަދުންވަންތަކަމާއި މާތްކަން ހާމަވާ ކަންތައްތަކެކެވެ. އެ ފުރިހަމަ ނިޒާމުގެ ތަރުތީބުކަމެވެ.