ފެންނަ ކަންކަން ނުފެންނަ ކަމަށް ހެދުމަކީ ބައެއް މީހުންގެ ސިފައެކެވެ. ނަމަވެސް މިއީ އުޅުމެއްގެ ގޮތުން ރީތި ގޮތެއް ނޫނެވެ. އަދި މިއީ މުޖުތަމައެއް ހަލާކުގެ ތެރެއަށް ވެއްޓި ފަސާދައިގެ މަގު ކޮށި، ފަނާކުރަނިވި ވެއްޓަކަށް އެ މުޖުތަމައު ބަދަލުވެދާނެ ކަމެކެވެ. މިފަދަ މީސް މީހުންނަށް މުނާފިގުން ނަމުންވެސް ދުނިޔޭގައި މުހާތަބުކޮށް އުޅިފައި ވެއެވެ.

މިފަދަ ބައެއް މީސްމީހުން ދެކޭ ގޮތުގައި ފެންނަ އެފަދަ ނޭދެވޭ މަންޒަރުތައް ފެނުނެއްކަމަކު، ނުފެންނަ ކަމަށް ހަދަނީ އެކަންކަމުގައި ތިމާގެ މަސްލަހަތު ނުހިމެނޭތީއެވެ. އާދޭހެވެ! މަސްލަހަތު ނެތްކަންކަމުގައި ހަނުހުރުމަކީ ވެސް ރަނގަޅު ކަމެކެވެ. ނަމަވެސް މަސްލަހަތު ހިމެނުމާއި ނުހިމެނުން މިއީ ފުޅައިކޮށް ވިސްނަން ޖެހޭނެ ނުކުތާއެކެވެ.

މުޖުތަމައުގައި ފާޅުގައި ހިނގާ ބޮޑެތި ޖަރީމާތައް ތިބާއަށް ފެނުނަސް، ތިބާގެ މަސްލަހަތު އެކަމުގައި ނުހިމެނޭކަމަށް ހީކޮށް، އެކަންކަމާ އަޅާނުލައި ހުންނަ ހުރުމީ ގޯސް ކަމެކެވެ. އެހެނީ ތިބާގެ މުޖުތަމައުގައި ތިބާގެ މަސްލަހަތު ވާތީއެވެ. ތިބާގެ މައިންބަފައިންނާއި ތިބާގެ އަނބިދަރިންގެ މަސްލަހަތު ވާތީއެވެ. މުޖުތަމައުގައި ހިނގާ ގޯސްކަންތައްތައް މަނާނުކޮށް ހަނު ހުރުމީ އޭގެ ސަބަބުން މާދަމާ ތިބާ އެކަންކަމާ ހިތާމަ ކުރަން ޖެހިދާނެ ކަމެކެވެ. ފަހަރުގައި ތިބާއާއި ސީދާ އޭގެ މަސްލަހަތު ބައްދަލު ނުކުރިއެއް ކަމަކު، ނުސީދާކޮށްވެސް ތިބާއާއި އެކަމުގެ މަސްލަހަތު ބައްދަލު ކުރާނެއެވެ. 

ދަންނަންތޯއެވެ! ބަޔަކު ކުރާ ފާފަތަކެއްގެ ސަބަބުން އެކަމުގެ ކޯފާ އަންނަނީ އެންމެންގެ މައްޗަށް އާއްމުވެ ޝާމިލުވާ ގޮތެއްގެ މަތިންނެވެ. އަދި ދަންނަންތޯއެވެ! އިސްލާމް ދީނުގައި ކިފާޔަތުގެ ފަރުޟުތަކެެއްވާކަން ތިބާ ނުދަންނަމު ހެއްޔެވެ! އަދި ކިއެއް ދީނުގައި އަންގަވާފައި ވަނީ ނުބައިކަންތައްތައް މަނާކޮށް، ހެޔޮކަންކަމަށް އަމުރުކުރާ މީހަކު ކަމުގައި އިންސާނާ ވުމަށެވެ! މި ސަބަބުތައް މިހެން ހުރި އިރު، ތިބާގެ މުޖުތަމައުގައި ހިނގާ ނޭދެވޭ ކަންކަން، ނުފެންނަ ކަމަށް ހަދައިގެން އުޅެން ހެޔޮވާނެ ހެއްޔެވެ؟ އިސްލާމްދީނުގެ އުސޫލަކީ އެއީއެއް ނޫނެވެ. އަދި ކިއެއް ދިރިއުޅުމުގެ ވައްޓަފާޅިއެއްގެ ގޮތުންވެސް އެއީ އުޅުމެއް ނޫނެވެ.

އުފާވެރި އަމާން މުޖުތަމައަކަށް ތިބާގެ މުޖުތަމައު ހެދޭނީ މިފަދަ ކަންކަމުގައި ޖަމާއަތުގެ މަސްލަހަތު އިސްކޮށްގެންނެވެ. ޖަމާއީ ވިސްނުމަކުން ވިސްނައިގެންނެވެ. އެންމެންގެ އެއްބާރުލުންވެސް ލިބިގެންނެވެ.