މައިންބަފައިންނަކީ އަޅުގަނޑުމެން ދުނިޔެއަށް އައުމުގެ ސަބަބުކަމުގައިވާ ދެ ފަރާތެވެ. އެމީހުންނަކީ އަޅުގަނޑުމެންގެ ފުރަތަމަ މުދައްރިސުންނެވެ. އަޅުގަނޑުމެންގެ ރައްކާތެރި ކަމާއި ހިމާޔަތުގެ ފުރަތަމަ ފަރުދާއެވެ. އެހެންނަމަވެސް، މިއަދުގެ މުޖުތަމަޢުގައި މައިންބަފައިންނަށް އިޙްތިރާމް ނުކޮށް، އިހާނެތިކޮށް ކަންތައް ކުރާ ދަރިން އުޅޭކަން ފާހަގަކުރެވެއެވެ. މިއީ ވަރަށް ހިތާމަހުރި ކަމެކެވެ.

ބައެއް ދަރިން މައިންބަފައިންނަށް އަޑުގަދަކޮށް ވާހަކަދައްކައި، އެމީހުންގެ ހިތްތަކަށް ރިހުން ގެނުވައެވެ. އަދި ބައެއް ދަރިން މައިންބަފައިންގެ މުދަލުން ވައްކަންކޮށް، އެމީހުންގެ އަމާނާތްތެރިކަމާއި އިތުބާރު ގެއްލުވާލައެވެ. މިފަދަ ޢަމަލުތަކަކީ އިސްލާމްދީނުގައި ވަރަށް ބޮޑަށް މަނާކުރެވިފައިވާ ކަންތައްތަކެވެ.

އަޅުގަނޑުމެން ވިސްނާލަން ޖެހޭ ކަމަކީ، މައިންބަފައިންނަށް އެފަދަ ހާލެއް ޖައްސާފައި އަޅުގަނޑުމެންނަށް އުފަލުގައި އުޅެވޭނެ ހެއްޔެވެ؟ އަޅުގަނޑުމެންގެ އުފާވެރިކަމާއި ހިތްހަމަޖެހުން ވަނީ މައިންބަފައިންގެ ރުހުމާއި ދުޢާއާ ގުޅިފައެވެ. މަޔަކު އޭނާގެ ދަރިއަށް ކޮށްދޭ ދުޢާ އަކީ އިޖާބަ ކުރެއްވުން އަވަސް ދުޢާ އެކެވެ. އެއީ ހެޔޮ އަދި ބަދު ދުޢާއެއް ކަމުގައި ވިޔަސް މެއެވެ. އެހެންކަމުން، އަޅުގަނޑުމެންގެ ހުރިހާ އުފަލެއްގެ މަރުކަޒަކީ މައިންބަފައިންކަމުގައި ހަދަން ޖެހެއެވެ.

މައިންބަފައިންނަށް އިޙްތިރާމްކޮށް، އެމީހުންނަށް ހެޔޮކޮށް ހިތުމަކީ އަޅުގަނޑުމެންގެ މައްޗަށް ވާޖިބުވެގެންވާ ކަމެކެވެ. އެމީހުންގެ ހިތްތަކަށް އުފާވެރިކަން ގެނެސްދިނުމަކީ އަޅުގަނޑުމެންގެ ޒިންމާއެކެވެ. އެމީހުންގެ ރުހުމުގައި ﷲ ގެ ރުހިވޮޑިގަތުން ވާކަން ހަނދާން ބަހައްޓަންވާނެއެވެ. އަޅުގަނޑުމެންގެ ދުނިޔެއާއި އާޚިރަތުގެ ކާމިޔާބު ވަނީ މައިންބަފައިންނަށް ކުރާ ހެޔޮ އަމަލުތަކާ ގުޅިފައެވެ. އެހެންކަމުން މައިންބަފައިން ހިތުގައި ޖައްސާފައި، ތިމާ އަށް މޮޅުގޮތެއް ވާން ނޭދޭށެވެ!