އިސްލާމްދީނުގައި ވިޔަފާރިއަކީ ހުއްދަކުރައްވާފައިވާ ކަމެކެވެ. އަދި އެކަމަށް ހިތްވަރުވެސް ދެއްވާފައިވާ ކަމެކެވެ. ނަމަވެސް، އެ ވިޔަފާރި ކުރަންވާނީ ތެދުވެރިކަމާއި އިންސާފުވެރިކަމާ އެކުގައެވެ. މިއަދު އަޅުގަނޑުމެންގެ މުޖުތަމަޢުގައި ފެންނަމުންދާ ވަރަށް ނުރައްކާތެރި އާދައަކަށް މި ލިޔުމުގައި އަލިއަޅުވާލާނަމެވެ. އެއީ ނުގަންނަ މުދަލަށް ބިލުކުރުމެވެ.

ނުގަންނަ މުދަލަށް ބިލުކުރުމަކީ ވިޔަފާރީގެ ދުނިޔޭގައި ވަރަށް ބޮޑަށް ފެތުރެމުންދާ ނޭދެވޭ އާދައެކެވެ. މިކަމުގެ ސަބަބުން ގިނަ ފަހަރު ކަސްޓަމަރުންނަށް އޮޅުވާލެވި، އެމީހުންގެ ފައިސާ ނަހަމަ ގޮތުގައި ނެގެމުންދެއެވެ. މިއީ އިސްލާމްދީނުގައި ވަރަށް ބޮޑަށް މަނާކުރައްވާފައިވާ ކަމެކެވެ.

ﷲ ތަޢާލާ ކީރިތި ޤުރުއާނުގައި ވަޙީކުރައްވާފައިވެއެވެ: "އޭ އީމާންވެއްޖެ މީސްތަކުންނޭވެ! ތިޔަބައިމީހުންގެ މެދުގައި ބާޠިލު ގޮތުގައި ތިޔަބައިމީހުންގެ މުދާތައް ނުކައިހަދާށެވެ!" (އަންނިސާ: 29) މި އާޔަތުން އެނގިގެންދަނީ އެހެން މީހުންގެ މުދާ ނަހަމަ ގޮތުގައި ކެއުމަކީ ހަރާމްކަމެއްކަމެވެ.

ނުގަންނަ މުދަލަށް ބިލުކުރުމުގެ ނަތީޖާއަކަށް ވަނީ ހަރާމް ފައިސާ ކެއުމެވެ. މިއީ ވަރަށް ނުރައްކާތެރި ކަމެކެވެ. ސަބަބަކީ ހަރާމް ގޮތުގައި ހޯދާ ފައިސާއިން ކާ ކޮންމެ އެއްޗަކުން ގައިގާ ޖަހާ މަހާއި، އެ ފައިސާއިން ހޯދައިގެން ލާ އަންނައުނާއި މި ހުރިހާ އެއްޗަކީ ނަރަކައިގާވާ އެއްޗެހިކަމަށް ޢިލްމުވެރިން ވިދާޅުވެއެވެ.

އަޅުގަނޑުމެންގެ މުޖުތަމަޢުގައި މިފަދަ ޢަމަލުތައް އިތުރުވަމުންދާ ސަބަބުތަކުގެ ތެރޭގައި ދީނީ ހޭލުންތެރިކަން ކުޑަވުމާއި، ދުނިޔެއަށް ދެވޭ އަހައްމިއްޔަތުކަން ބޮޑުވުން ހިމެނެއެވެ. އަޅުގަނޑުމެން ކޮންމެ މީހަކުވެސް ވިސްނަންޖެހޭނީ އާޚިރަތް ދުވަހު އަޅުގަނޑުމެންގެ ކޮންމެ ޢަމަލަކަށް ޖަވާބުދާރީވާން ޖެހޭނެކަމެވެ. ފާހަގަ ކޮށްލެވޭ އަނެއް ކަމަކީ މި ހުރިހާ ކަމެއް އިނގިހުރެ، ފަސްވަގުތު ނަމާދުކޮށް، ކޮންމެ އަހަރަކު އުމްރާއަށް ގޮސް، ދެއަހަރުން އެއް އަހަރު ހައްޖަށްދާ މުއްސަނދި ވިޔަފާރިވެރިޔާވެސް މި ވިޔާނުދާ އަމަލު ކުރުމުގައި ދެމިހުންނަ ކަމެވެ. މި ހިސާބުން ދީނީ ހޭލުންތެރިކަން ނެތީއޭ ބުނެވިދާނެ ހެއްޔެވެ؟ ނުވަތަ އަބޫޖަހުލާއި އަބޫލަހަބު ފަދައިން ޖާހިލުކަން ބޮޑީ ބާވައެވެ!

ނުގަންނަ މުދަލަށް ބިލުކުރުން ހުއްޓުވުމަށްޓަކައި އަޅުގަނޑުމެން އެންމެން ގުޅިގެން މަސައްކަތްކުރަންޖެހެއެވެ. ވިޔަފާރިވެރިން އިޚްލާޞްތެރިކަމާއެކު މަސައްކަތްކުރަންޖެހެއެވެ. ކަސްޓަމަރުން ވެސް ބިލުތައް ރަނގަޅަށް ޗެކްކުރަންވާނެއެވެ. އަދި ސަރުކާރުންވެސް މިކަމާ ގުޅޭ ޤާނޫނުތައް ހަރުދަނާކޮށް، އެ ޤާނޫނުތައް ތަންފީޒުކުރަންވާނެއެވެ.

ނުގަންނަ މުދަލަށް ބިލުކުރުމަކީ އިސްލާމްދީނުގައި ހަރާމްކުރައްވާފައިވާ ކަމެކެވެ. މިކަމުގެ ސަބަބުން ލިބޭ ފައިސާއަކީ ހަރާމް ފައިސާކަން ތަކުރާރުކޮށް ހަނދުމަކޮށްދެމެވެ. އޭ ލޮބުވެތި މުސްލިމު ދިވެހި ވިޔަފާރިވެރިންނޭވެ! މަކަރަކީ ނޭނގި ހެދޭ އެއްޗެއް ނޫނެވެ! އޮޅިގެން ކަމެއް ވެދާނެއެވެ! އަބަދުމެ އާދަވެ ތަކުރާރުވާނަމަ، އެއަށް އޮޅުމޭ ކިޔަން އުނދަގުލެވެ! ދެން އެއަށް މި ކިޔެނީ މަކަރު ހެދުމެވެ! މާތް ﷲ އަޅަމެން އެންމެންނަށް ހެޔޮވިސްނުން ދެއްވާށި! އާމީން!