ފިޠުރަތުގެ ސާފުކަންމަތީ ދުނިޔެއަށް ނޭވާލާ ތުއްތު ފުރާނަތައް ތަރުބިއްޔަތު ކުރުމަކީ މައިންބަފައިންގެ މައްޗަށް އޮތް ވާޖިބެކެވެ. މައިންބަފައިންގެ ބޮލުގައި އެޅިފައިވާ ބޮޑު ޒިންމާއެކެވެ. ކޮނޑުގައި އޮންނަ ބުރަ މަސްއޫލިއްޔަތެކެވެ. މައިންބަފައިންނަކީ ދަރިން ދުނިޔެއަށް އުފަންވުމަށް މެދުވެރިވާ ސަބަބެވެ. ދަރިފުޅު މުސްލިމަކަށްވެސް، މަޖޫސީއަކަށް ނުވަތަ ނަޞާރާއަކަށް ހަދަނީވެސް މައިންބަފައިންނެވެ. ދަރިންނަށް ރަނގަޅު ގޮތް ބުނެދީ ހެޔޮމަގު ދައްކަން ޖެހޭ ފަރާތަކީ ކުއްޖާގެ މައިންބަފައިންނެވެ. މަންމައާއި ބައްޕައެވެ. ނުވަތަ ބެލެނިވެރިޔާއެވެ. 

ޤަބޫލު ކުރަމެވެ. މައިންބަފައިންގެ މައްޗަށް ދަރިން ތަރުބިއްޔަތު ކުރުމުގެ ޒިންމާ ވާޖިބުވެގެންވެއެވެ. އެއީ އެކަމަކާ މެދު ސުވާލު ވެވޭނެ ކަމެކެވެ. ރަނގަޅު ތަރުބިއްޔަތެއް ނުދީ، ދަރިން އުޅޭނެހާ ގޮތަކަށް އުޅެން ދޫކޮށްލުމުން ކުށްވެރިވާނީ މައިންބަފައިންނެވެ. މައިންބަފައިންގެ ވާޖިބު އަދާ ނުކުރުމުގެ ސަބަބުން ކުއްޖާ އަޅާ ކަތި ފިޔަވަޅުތަކާއި އިޚްތިޔާރު ކުރާ ކަތި ރާސްތާތަކަށް ޒިންމާ ވާންޖެހޭނެ ބަޔަކީ މައިންބަފައިންނެވެ. އެކަމުގެ ސަބަބުން މައިންބަފައިންގެ މަޤާމުގައި ތިބޭ މީހުންނަށް، އެހެން މީހުން އިނގިލި ދިއްކުރާނެއެވެ. މަލާމާތާއި ފުރައްސާރަވެސް ކުރާނެއެވެ. ނަމަވެސް މައިންބަފައިންގެ އިހުމާލެއް ވޭތޯ ނުވަތަ ނުވޭތޯ ބެލުމެއް ނެތި، ކުއްޖާގެ ފަރާތުން ފެންނަ ކޮންމެ ނޭދެވޭ ސިފައަކަށް އަބަދު މައިންބަފައިން ކުށްވެރި ކުރަނީ ކީއްވެ ހެއްޔެވެ؟ ޙާލަތު ނޭނގުނަސް މައިންބަފައިން ކުށްވެރި ކުރަން ފަސޭހައީއެވެ. ހުރިހާ އިލްޒާމެއް މައިންބަފައިންގެ ބޮލުގައި އަޅަން ބޮޑު ކަމަކަށް ނުވަނީއެވެ. ނަމަވެސް ދަރިޔަކު ތަރުބިއްޔަތުކުރުމަށް މަންމައަކާއި ބައްޕައެއް ކުރާ މަސައްކަތާއި، އުފުލާ ބުރަތަކާ މެދު އެންމެ ފަހަރަކުވެސް ވިސްނާލިން ހެއްޔެވެ؟ މައިންބަފައިން ކިތަންމެ ރަނގަޅު ތަރުބިއްޔަތެއް ދިނަސް ގޯސް މަގު އިޙްތިޔާރު ކުރާ ކިތަންމެ ކުދިންނެއް އުޅެއެވެ. 

ބަރާބަރަށް ނަމާދު ޤާއިމް ކުރުމަށް މައިންބަފައިން ބާރު އަޅައެވެ. އަތުގައި ހިފައިގެން މިސްކިތަށް ގެންގޮސްދެއެވެ. ބައްޕަނަމަ މިސްކިތުން އަންނާނީވެސް ކުއްޖާ ގޮވައިންނެވެ. މަންމަނަމަ، ޖަމާޢަތް ނިމުމުން މިސްކިތް ދޮށަށް ފިރިހެން ދަރިފުޅު ބަލައިދެއެވެ. އަންހެން ދަރިފުޅާއެކު މަންމަ ގޭގައި ނަމާދު ކުރެއެވެ. ޤުރުއާން ކިޔެވުމަށް ބާރު އަޅައެވެ. މީހުންނާ ޒުވާބު ނުކުރުމަށާއި ޖަދަލު ނުކުރުމަށް ނަސޭޙަތްދެއެވެ. ތިމާއަށްވުރެ ބޮޑެތި މީހުންނަށް އިޙްތިރާމް ކުރުމަށް ދަސްކޮށްދެއެވެ. ދޮގު ހެދުމުން ދުރުވެ، ކޮންމެ ޙާލަތެއްގައިވެސް ތެދުވެރިވުމަށް ހާނުވައެވެ. އައުރަ ނިވާކޮށް، އިސްލާމީ ފޭރާމުން ޒީނަތްތެރިވުމަށް އިރުޝާދުދެއެވެ. އިސްލާމްދީނުގައި ޙަރާމް ކުރައްވާފައިވާ ފާފަތަކުން ދުރުވުމަށް އަބަދުވެ ހަނދާންކޮށްދެއެވެ. ގޯސް ޢަމަލުތަކުން ނުކުންނާނެ ނޭދެވޭ އަސަރުތައް ބުނެދެއެވެ. ހަމައެކަނި ދުލުން ބުނެގެން ފުއްދާލަނީއެއް ނޫނެވެ. އެ ބުނެދޭ ގޮތަށް ޢަމަލުތައް ކުރަމުން ނަމޫނާވެސް ދައްކައިދެއެވެ. ނަމަވެސް އަމިއްލައަށް ކަންކަން ކުރުމުގެ ޤާބިލުކަން ލިބި، އަމިއްލައަށް ހެޔޮ ނުބައި ވަކިވާ ހިސާބަށް ދިއުމުން ކުދިންގެ ޢަމަލުތައް ބައްޓަން ކުރަނީ އެ ކުއްޖަކު ބޭނުންވާ ގޮތަށެވެ. މައިންބަފައިން ކިތަންމެ ރަނގަޅު ތަރުބިއްޔަތެއް ދިންކަމުގައި ވިޔަސް، ކުއްޖާ ކަންތައް ކުރަނީ އެ ކުއްޖަކަށް ފެންނަ ގޮތަކަށެވެ. އެއްމަންމައަކާއި ބައްޕައެއްގެ ދެދަރިންނަށް އެއްތަރުބިއްޔަތެއް ދިނަސް، ދެ ދަރިންގެ ޢަމަލުތަކާއި އަޚްލާޤު ހާސްބައި ތަފާތުވާ މަންޒަރު ފެންނަން އެބަހުއްޓެވެ. އެއްދަރިފުޅުގެ އަޚްލާޤު ރަނގަޅުވެފައި ދެވަނަ ދަރިފުޅުގެ އުޅުން ގޯސްވެފައިވާ ޙާލަތްތައް ފެންނަކަމީ ހަޤީޤަތެކެވެ. ސަބަބަކީ ކޮބާ ހެއްޔެވެ؟ އެއްދަރިފުޅު އިޙްތިޔާރުކުރީ މައިންބަފައިންގެ ތަރުބިއްޔަތުގައި ހިފައި، ދެއްކި ރަނގަޅު މަގުން ހިނގައި، ހެޔޮ ގޮަތުގައި ދިރިއުޅުން ބައްޓަން ކުރުމަށެވެ. އޭގެ ބަދަލުގައި އަނެއް ދަރިފުޅު އިޙްތިޔާރުކުރީ މައިންބަފައިން ދިން ތަރުބިއްޔަތު ބޮލާލާ ޖެހުމަށެވެ. ދަސްކޮށްދިން ރަނގަޅު ސިފަތަކާއި ޢަމަލުތަކުގައި ކޮޅުފައިން ޖެހުމަށެވެ. ދިން ހެޔޮ ނަސޭޙަތްތަކަށް ބީރު ކަންފަތެއް ދިނުމަށެވެ.  

މައިންބަފައިންގެ އިހުމާލުން ކިތަންމެ ދަރިންނެއްގެ ދިރިއުޅުން ހަލާކުވެފައި އެބަހުއްޓެވެ. ތަރުބިއްޔަތު ދިނުމުގައި ފަރުވާ ކުޑަކުރުމުގެ ސަބަބުން ގޯސް އަޚްލާޤެއް އަށަގަނެފައިވާ ކުދިން މަދެއް ނޫންކަންވެސް ޤަބޫލު ކުރަމެވެ. ނަމަވެސް ކޮންމެ ކުއްޖެއްގެ ކޮންމެ ކުށަކަށް ޒިންމާދާރު ވާންޖެހޭ ބަޔަކީ މައިންބަފައިންނެއް ނޫނެވެ. އަބަދު މައިންބަފައިން ކުށްވެރިކޮށްގެން ނުވާނެއެވެ. އެންމެ ފުރިހަމަ ނަމޫނާ ދައްކަމުން ރިވެތި ތަރުބިއްޔަތެއް ދިނަސް އެކަން ބަލައިގަތުމަކީ ކުއްޖާގެ ޒިންމާއެކެވެ. އެކަން ބިނާވަނީ ކުއްޖާ އަމިއްލައަށް އިޙްތިޔާރުކުރާ ގޮތެއްގެ މައްޗަށެވެ. ކޮންމެ ކަމަކަށް މައިންބަފައިން ކުށްވެރި ކުރުމުގެ ކުރިން ހަނދާންކުރާށެވެ. މައިންބަފައިންނަށް ދެއްކޭނީ ނަމޫނާއެވެ. މައިންބަފައިންނަށް ދެވޭނީ ތަރުބިއްޔަތެވެ. އެއަށް ޢަމަލު ކުރުމަކީ ކުއްޖާގެ އަމިއްލަ ޒިންމާއެކެވެ.