އެސްފީނާއާއި ހަސަދައަކީ މީހުންގެ އުފާވެރި ދިރިއުޅުމަށާއި އެ މީހުންނަށް ލިބިފައިވާ ނިޢުމަތްތަކަށް ވިހަލަމުން އަންނަ ހަރުފައެކެވެ. އެސްފިނާއާއި ހަސަދައިގެ ސަބަބުން ވިރާނާވެ ހަލާކުވެފައިވަނީ ކިތަށް ދިރިއުޅުން ހެއްޔެވެ؟ ބިލާހަކަށް ވެފައިވަނީ ކިތަށް ހުވަފެން ކަމެއްވެސް ނޭނގެއެވެ. އެހެންކަމުން މި ޒަހަރުން ފުރިފައިވާ ހަރުފަތަކަށް ސަމާލުވާން ޖެހެއެވެ. އެއިން ރައްކާތެރިވުމަށް ކުރެވެން ހުރި ހުރިހާކަމެއް ކުރަން ޖެހެއެވެ. 

މީހުންގެ އެސްފީނާ އާއި ޝިކާރައަކަށް ތިމާ މީހާ ވެދާނެކަން ދަންނަން ޖެހެއެވެ. އެކި މީހުންގެ ހިތުގައި ހަސަދައިގެ އަލިފާން ރޯވަނީ އެކި ކަންކަމަށެވެ. އެސްފީނާ ޖެހޭ ކިތަށްމެ ކަމެއްވެއެވެ. އެއީ ތިމާއަށް ލިބިފައިވާ އާއިލީ ލޯބިކަމުގައި ވެދާނެއެވެ. ދަރިންކަމުގައި ވެދާނެއެވެ. ތަޢުލީމީ ގޮތުން ލިބޭ ކާމިޔާބީއަށް ވެދާނެއެވެ. ވަޒީފާއިން ލިބިފައިވާ ކުރިއެރުމަށްވެސް ވެދާނެއެވެ. ބޭރުފުށުން ލިބިފައިވާ ރީތިކަމަށް ވެދާނެއެވެ. ލިބިފައިވާ ކެރިފޯރުންތެރިކަމާއި މުއްސަނދިކަމަށްވެސް ވެދާނެއެވެ. މީގެ އިތުރުން މީހުންގެ އެސްފީނާއާއި ހަސަދަ ތިބާއަށް ރައްދުވާ ސަބަބަކަށް ތިބާގެ އުފާވެރި ޒަވާޖީ ޙަޔާތްވެސް ވެދާނެއެވެ. ހަމައެހެންމެ، އެހެން މީހުންގެ ފަރާތުން ތިބާއަށް ލޮއެއްބާއި އަޅާލުން ލިބޭތީ ހަސަދަވެރިވާ މީހުން ތިބެދާނެއެވެ. ކިތަށްމެ ގާތް މީހެއްގެ ހިތުގައިވެސް ހަސަދަވެރިކަމެއް އޮވެދާނެކަމަށް ޤަބޫލުކުރަން ޖެހެއެވެ. މީހެއްގެ ހިތުގައި އޮންނަ އެއްޗެއް ނޭނގޭނެތާއެވެ.

އެސްފީނާއަކީ ކޮންމެ ފަހަރަކު މީހަކު ގަސްތުގައި ކުރާކަމަކަށް ނުވެދާނެއެވެ. އިޚްތިޔާރަކާ ނުލާ ހިތަށް އެރުވޭ އެއްޗަކުންވެސް އެސްފީނާ ޖެހިދާނެއެވެ. ނުބައި ނިޔަތެއް ނެތްނަމަވެސް މެއެވެ. އެހެންކަމުން އަހަރުމެން ވިސްނަންވީ އެސްފީނާއާއި ހަސަދައިން ސަލާމަތްވުމަށް ކުރެވެން ހުރި ކަންކަން ކުރުމަށެވެ. ލިބޭ ކާމިޔާބީތަކާއި ނިޢުމަތްތައް އެންމެނަށް ދައްކާ، އިސްތިހާރު ކުރާކަށް ނުޖެހެއެވެ. ތިމާއަށް ލިބޭ އެ ކާމިޔާބީއާއި ނިޢުމަތަށް ހަސަދަވެރިވާނީ ކާކު ކަމެއް ނޭނގޭ ނޫން ހެއްޔެވެ؟ އާނއެކެވެ. ހަސަދަވެރިވާކަށް ނުޖެހެއެވެ. ނަމަވެސް އެފަދަ ކަންކަމުން އަމިއްލަ ނަފުސާއި ދިރިއުޅުން ސަލާމަތް ކުރުމަށް ކުރެވޭނެ ކަންތައްކޮށް، އަމިއްލަ ނަފުސު ރައްކާތެރިކުރުން މާ ބުއްދިވެރިއެވެ. ކޮންމެ ކާމިޔާބީއަކާއި ހުރިހާ އުސްއަލިތަކެއް ސޯޝަލް މީޑޔާގައި ހިއްސާ ކުރުމުން ދުރުހެލިވުމަކީ ރައްކާތެރިގޮތެވެ. މީގެއިތުރުން، ކަމެއްވުމުގެ ކުރިން، މީހުން ގާތު އެ ވާހަކަ ދެއްކުމުންވެސް އެއްކިބާވެވިދާނެއެވެ. ހަމަމިއާއެކު، ހެނދުނާއި ހަވީރުގެ ޒިކުރުތަކަށް ފަރުވާތެރިވެ، މީހުންގެ އެސްފީނާއާއި ހަސަދައިން ރައްކާތެރި ކޮށްދެއްވުން އެދި، މާތް ﷲގެ ހަޟްރަތުގައި ދުޢާ ކުރުން ގިނަ ކުރަން ޖެހެއެވެ. އާޔަތުލް ކުރުސިއާއި އިޙްލާސް، ފަލަޤް އަދި ނާސި ސޫރަތް ކިޔެވުން އިތުރުކުރަން ޖެހެއެވެ. ތިބާގެ ގެޔަކީ، އެ ގެއެއްގައި ނަމާދު ޤާއިމް ކުރެވޭ އަދި ޤުރުއާނުގެ މޫރިތި އާޔަތްތައް ކިޔެވޭ ގެޔަކަށް ހަދަން ޖެހެއެވެ.

އަހަރުމެން ކޮންމެ މީހަކީވެސް އަނެކުންގެ އުފަލާއި ނިޢުމަތްތަކަށް ހަސަދަވެރިވުމުން އެއްކިބާވެފައިވާ މީހަަކަށް ވާންޖެހެއެވެ. އަހަރުމެންގެ ފަރާތުން އެހެން މީހަކަށް އެސްފީނާއާއި ބަދު ދުޢާ ޖެހުނަދީގެން ނުވާނެއެވެ. އެފަދަ ކޮންމެ ކަމަކުން ދުރުހެލިވެ ރައްކާތެރިވުމަށް މަސައްކަތް ކުރަންވާނެއެވެ. އެހެން މީހުންގެ ދިރިއުޅުމަށް ހަސަދަވެރިވުމުން އަނދާ އަޅިއަށްވާނީ ހަމަ ޚުދު އަހަރުމެންނެވެ. މީހުންނަށް ލިބިފައިވާ ނިޢުމަތްތަކަށް ހަސަދަވެރިވުމުން އަހަރުމެންނަށް ލިބިފައިވާ އެތައް ހާސް ނިޢުމަތަކަށް ވެވޭނީ ޣާފިލެވެ. އެހެންކަމުން، އެހެން މީހުންނަށް ލިބޭ ނިޢުމަތްތަކަށް އުފާކޮށް، އަހަރުމެންނަށް ލިބިފައިވާ ނިޢުމަތްތަކަށް ޝުކުރުވެރިވުން ގިނަ ކުރަންވާނެއެވެ. މިންވަރަށް އީމާންވާން މަސައްކަތް ކުރަންވާނެއެވެ. އެކި މީހުންނަށް ދެއްވާނީ އެކި ނިޢުމަތްތަކެވެ. އެކަން ވާނީ އަހަރުމެން އެންމެންވެސް ޤަބޫލު ކުރާށެވެ.