ހޮލިވުޑްގެ މަޝްހޫރު ތަރި ޓޮމް ކްރޫސް އަދި ނިކޯލް ކިޑްމަންގެ ދަރިފުޅު ބެލާ ކިޑްމަން ކްރޫސް، ލަންޑަނުގައި އަމިއްލަ އާޓް ގެލެރީއެއް ހުޅުވުމަށް ނިންމައިފިއެވެ. މި ގެލެރީގައި އޭނާގެ އަމިއްލަ ޑިޖިޓަލް އާޓްވޯކްތަކާއި އެހެނިހެން ކުރެހުންތައް ބެހެއްޓުމަށް ވަނީ ހަމަޖެހިފައެވެ.

ބެލާގެ އާޓް ގެލެރީ ހުޅުވުމަށް ހަމަޖެހިފައިވަނީ ލަންޑަނުގެ އިސްޓް އެންޑް ސަރަހައްދުގައެވެ. މި ގެލެރީގައި އޭނާގެ އުފެއްދުންތެރި މަސައްކަތްތަކުގެ އިތުރުން، އެހެން ހިޔާލީ އާޓިސްޓުންގެ މަސައްކަތްތަކަށްވެސް ޖާގަ ދިނުމަށް ވަނީ ރޭވިފައެވެ.

އޭނާގެ ފިރިމީހާ މެކްސް ޕާކަރ އާއެކު ލަންޑަނުގައި ދިރިއުޅެމުންދާ ބެލާ، ފާއިތުވި އަހަރުތަކުގައި އޭނާގެ އާޓްވޯކްތައް އިންސްޓަގްރާމްގައި ޝެއަރކޮށް، އޮންލައިންކޮށް ވިއްކަމުން އައި ނަމަވެސް، މިއީ އޭނާގެ ފުރަތަމަ ފިޒިކަލް ގެލެރީ އެވެ.

ގެލެރީ ހުޅުވުމުގެ ރަސްމިއްޔާތު އަންނަ މަހު ބޭއްވުމަށް ވަނީ ހަމަޖެހިފައެވެ. ނަމަވެސް މި ރަސްމިއްޔާތަކީ ޕްރައިވެޓް އިވެންޓެއްގެ ގޮތުގައި ބޭއްވުމަށް ވަނީ ނިންމާފައެވެ.