ޖީލުތަކެއްގެ ވާހަކަ މިފަހަކުން ވައިގައިހިފަމުން ދިޔައެވެ. ބަލައިލި ކޮންމެ ދިމާލެއްގައިވެސް އޮންނަނީ ނިސްބަތްވާ ޖީލެއްގެ ކޮންމެވެސް ސިފައެއް ބުނެދީފައެވެ. ސޯޝަލް މީޑިއާގެ އެކި ގޮވެތިތަކުގައި ދައުރުވީ ޖީލުތަކާއި ގުޅޭ ޕޯސްޓެވެ. އޭގެ ތެރެއިން އެއް ޖީލަކީ ބަތްކައްކާ ކުޅުމުގެ ތެރެއިން އުޅެ ބޮޑުވި ޖީލެވެ. އެއީ އަދި އަދަށް ދާންދެންވެސް ހަނދާނުން ނުފިލާނެ ޞަފްޙާތަކެކެވެ. 

އެ ދުވަސްވަރުގައި، ފޯނާއި ޓެބްލެޓާއި އެކި ވަސީލަތްތައް މާބޮޑަށް ތަޢާރަފްވަމުންނެއް ނުދެއެވެ. 'ގެޖެޓް' ތަކުގެ ބާރު އެހާ ގަދައެއް ނޫނެވެ. އެ ވަސީލަތްތަކުގެ ދުނިޔެ އެހާމެ ކުރިއެއް ނާރައެވެ. ބާޒާރަށް ތަޢާރަފްވެފައި ހުރި ތަކެތިވެސް ގަނެ، ބޭނުން ކުރަނީ ބެލެނިވެރިންނެވެ. ބޮޑެތި މީހުންނެވެ. އޭގެ ބޭނުންކުރުމުގެ ފުރުޞަތު ކުޑަކުދިންނަަކަށް ނުދެއެވެ. ކުޑަކުދިން ކުޅެ އުޅެނީ އަމިއްލަ އެހެން ދުނިޔެއެއްގައެވެ. މަގުމަތީގައި ބޯޅަ ކުޅުމުގައެވެ. ވާރޭވެހޭ ދުވަހަކު ފެންގަނޑަށް އެރި، ކަރުދާހުން ނުވަތަ ފުޅިމަދުން ބޯޓު ހަދައިން ފެންގަނޑުގައި ބޯޓު ދުއްވާ އަދި ވާރެޔާ ތެމުމުގައެވެ. ގޭދޮށުގައި ނުވަތަ އަތިރިމަތީގައި ބަތްކައްކާ ކުޅުމުގައެވެ. މަންމަމެން ބޭނުންކޮށް ބާކީވެފައި ހުންނަ ތަށިތަށްޓާއި ތެލިތައް ހިފައިގެންނެވެ. ނާށިތަކާއި ހޮވައިގެން ގެންގުޅޭ ސަމުސާ ހިފައިގެންނެވެ. ވެއްޔަކީ ލޮނުކަމަށް ސިފަކޮށްގެންނެވެ. ބިންމަތީ ވަޅު ކޮނެގެން އަމިއްލަ އަށް އުނދުންވެސް ހަދާނެއެވެ. ގަސްގަހުގެ ކުދި އޮފިކޮޅުތައް ދަރުކަމުގައި ހަދައިގެންނެވެ. ގެޔަކުން އުނދުނެއް ބާކީވެގެން އެއްލައިލިއްޔާ ނުވަތަ ކުދިންނަށް ދިނިއްޔާ ދެން އެ ނިމުނީއެވެ. އޭރަށް ކެއްކުމުގެ ފެންވަރުވެސް މަތިވީއެވެ. އޭރަށް ކުޅިވަރަށްވެސް ބޮޑު ކުރިއެރުމެއް ލިބުނީއެވެ. އެކި ޒާތްޒާތުގެ ފަތްތަކާއި މާމެލާމެލި ބޭނުންކޮށްގެން އައު ކެއުންތައް ވުޖޫދަށް ތަޢާރަފް ކުރާނެއެވެ. ގަސްގަހުގައި އަޅާ ތަކެތިން 'ރެސިޕީ' ތައްޔާރު ކުރާނެއެވެ. ގޮބަޅިއާއި މަގޫގަހުގެ މަގޫ ފަދަ ތަކެތި ބޭނުންކޮށްގެންނެވެ. ގަސްދޮށަށް ވެރިފައި ހުންނަަ ކުދި ޖަނބުރޯލާއި ޅަ ފޭރުފަދަ ތަކެތިވެސް ބޭނުންކޮށްގެންނެވެ. މީގެއިތުރުން، ވެލިން ގުޅަ ހަދައި، އެކި ބައްޓަމުގެ ކޭކުތައް އަޅާނެއެވެ. ޚާއްސަކޮށް އަތިރިމަތީގެ ރާޅު ޖަހާ ހިސާބުގައި ހުންނަ ތެތް ވެލިންނެވެ. އަމިއްލަ އަށް ކައްކާ ތަކެއްޗަށް އަމިއްލައަށް ނަން ހަދާނެއެވެ. 

މިއަދުގެ ޖީލުތަކަށް މިއީ ފަހަރެއްގައި އައު ކަންކަމެވެ. އެކުދިން ހޭނިފައިވަނީ ފޯނާއި ޓެބްލެޓަށެވެ. ޅަ އުމުރުގައި އެކުދިންގެ އަތަށް ދެވޭ ފޯނަށް އެކުދިން ނުހަނު ފަރިތައެވެ. އެކުދިންގެ މުޅި ދުނިޔެ އެނބުރެނީ އެ ވަސީލަތްތަކުގެ ތެރޭގައި ކަހަލައެވެ. އެކުދިން ވަނީ އެންމެ ކުޑައިރުން ފެށިގެންވެސް އެކި ކަހަލަ ގޭމުތަކުގެ ގައިދީންނަށް ވެފައެވެ. ފޯނާއި ޓެބްލެޓުގެ ބޭރުން ކުދިންނާ ބައްދަލުވެ، ވަށައިގެންވާ މާހައުލުގައި ކުޅިވަރުތައް ކުޅުންފަދަ ކަންކަމަށް އެ ކުދިން އެހާ ރައްޓެއްސެއް ނޫނެވެ. ބަތްކައްކާ ކުޅުންފަދަ ކަންކަމަށް އެކުދިން ބީރައްޓެސެވެ. އެކަމުގައި ހުންނަ މަޖަލާއި، ތަފަާތު ތަޖުރިބާ އެ ކުދިންނަށް ފަހުމުވެފައި ނެތޭ ބުނުމަކުން ދޮގަކަށް ނުވާނެއެވެ. ލޮލަށް ގެއްލުން ލިބުން ފަދަ ކަންކަމުން ސަލާމަތްވެ، އެކުވެރިންނާ ދިމާވެ، ހީ ސަމާސާކޮށް، އެ ހޭދަ ކުރެވޭ ވަގުތުން ލިބޭ އުފަލާއި ހިތްހަމަޖެހުން އެ ކުދިންނަށް ތަސައްވަރު ކުރެވޭނެހެން ހިޔެއް ނުވެއެވެ. އާނއެކެވެ. މިއަދުގެ ޖީލަށް ބަތްކައްކާ ކުޅެން ނޭނގިދާނެއެވެ. މި ކަންކަން ތަޖުރިބާ ކުރީ، ކުރީގެ ޖީލުތަކެވެ. އެއީ އެ ޖީލެވެ. އެއީ ބަތްކައްކާ ކުޅުނު ޖީލެވެ.