ކޮލެޖުތަކުގައި އެކިއެކި ކޯސްތަށް ހަދަމުން އަންނަ އެތަކެއް ދަރިވަރުންނެއް އެބަ އުޅެއެވެ. އެ ކޯސްތަކުގެ ތެރެއިން ކިޔަވާ މާއްދާތަކުން އެސައިމެންޓުތައް ހަދަން ޖެހެއެވެ. އެސައިމެންޓުތައް އެންމެ ފަހު ވަގުތަށް ބެހެއްޓުމަކީ ވަރަށް ގިނަ ކުދިންގެ އާދައެކެވެ. ދެން ފެންނާނީ އެ އެސައިމެންޓެއްގެ ސަބަބުން ނިދި ނަގާލާ، މީހާގެ ސިކުނޑި ސުމަކަށް ދަންދެން އެ މަސައްކަތުގައި އަވަދިނެތި އުޅޭތަނެވެ. އެފަދަ ކަންކަމުން ދުރުވުމަށްޓަކައި، އެސައިމެންޓުތައް ފަސްކުރެވޭ ސަބަބުތައް ދެނެގަނެ، އެ ކަންކަމަށް އިސްލާޙު ގެނައުން މުހިންމެވެ. 

އެސައިމެންޓުތައް އެންމެ ފަހުވަގުތައް ބެހެއްޓޭ ސަބަބުތައް ތެރޭގައި ފޫހިވުމާއި، މަސައްކަތްކުރާ ހިތް ނުވުމާއެކު، ޝައުގުވެރިކަން އަތުލާ ކަންކަމަށް ބޭކާރު ވަގުތުތައް ހުސްކުރެވުން ހިމެނެއެވެ. ކިޔަވާ ހިތް ނުވާ މާއްދާއަކުން ދޭ އެސައިމެންޓެއް ހަދަން ވީމާ ފޫހިވަނީއެވެ. އެމާއްދާދެކެ ވެފައިވާ ފޫހީގެ އަސަރު، އެސައިމެންޓަށްވެސް ކުރަނީއެވެ. އެކަން ކުރާނެ އެއްވެސް ޝައުގެއް ނެތުމުގެ ނަތީޖާއެއް ގޮތުން، އެސައިމެންޓުތައް އެންމެ ފަހުވަގުތާ ޖެހެންދެން ބެހެއްޓެނީއެވެ. މީގެ އިތުރުން، އެސައިމެންޓު އުނދަގޫވުމާއި، ކިޔަވައި ނުދޭ ސުރުޚީއެއްގެ ދަށުން އެސައިމެންޓު ސުވާލު އައުންފަދަ ކަންކަމުގެ ސަބަބުން އެ އެސައިމެންޓެއް ހަދާ ހިތް ނުވުމުންވެސް، އެސައިމެންޓް ހެދުމުގައި ކުރިޔާލާ މަޝްއޫލުވެގެން ނޫޅެވެނީއެވެ. ހަމަމިއާއެކު، ދުވަހީ ދިރިއުޅުމުގައި ހިމެނޭ 'ޑިސްޓްރެކްޝަން'ތަކުގެ ސަބަބުންވެސް އެސައިމްނެޓުތައް ކުރިޔަލާ ފެށުމަށް ހުރަސް އެޅެއެވެ. އެކި ކަހަލަ ގޭމްތަކާއި، ފިލްމާއި ސީރީޒްތަކުގެ އިތުރުން، ސޯޝަލް މީޑިއާގެ އަވާގައިޖެހި، ގިނަ ވަގުތުތަކެއް އެކަމަށް ހުސްކުރެވެނީއެވެ. އިންސްޓަގްރާމް ރީލްސްތަކާއި ޓިކްޓޮކް ވީޑިއޯތައް ބެލުމުގައެވެ. ފޭސްބުކްގައި 'މީމްތައް' ޝެއަރ ކުރުމާއި ސްނެޕްޗެޓްގެ ސްނެޕްތައް ބެލުމުގައެވެ. ފިލްމުތަކާއި ޑްރާމާ ސިލްސިލާތައް ބެލުމުގައެވެ. މިފަދަ ކިތަށްމެ ސަބަބަކާހުރެ އެސައިމެންޓުތައް ލަސްކުރެވެއެވެ. އެންމެ ފަހު ވަގުތައް ބެހެއްޓެއެވެ.

މި ކަންކަމުން ދުރުވެ، ކުރިޔާލާ އެސައިމެންޓުތައް ހެދުމަކީ ކުއްޖާގެ ނަފްސާނީ ދުޅަހެޔޮކަމަށްވެސް ރަނގަޅު އަސަރުތަކެއް ކުރާނެ ކަމެކެވެ. އެގޮތުން ކުރިޔާލާ އެސައިމެންޓު ސުވާލު ދެނެގަނެ، އެކަމަށް ބޭނުންވާ މަޢުލޫމާތު އެއްކޮށް، ދިރާސާތައް ކުރެވޭނެއެވެ. އޭރުން އެންމެ ފަހުވަގުތުގައި އެކަމާ ބޯގޮށްވާކަށް ނުޖެހޭނެއެވެ. މީގެ އިތުރުން، މަސައްކަތްތައް ކުރުކޮށްގެން، ކޮންމެ މަސައްކަތަކަށް ވަކި ވަގުތެއް ކަނޑައަޅާ، އަމިއްލަޔަށް އެ ވަގުތެއްގެ ކުރިން އެ މަސައްކަތްތައް ނިންމަން ފަރުވާ ބެހެއްޓޭނެއެވެ. އެކި ދުވަސްތަކަށް އެކި މަސައްކަތްތައް ބަހާލައިން، މަސައްކަތްތައް ލުއިކޮށްލައިން ކުރިޔަށް ގެންދިއުމުން ބޮޑު ބުރައަކަށް ނުވެ، އެސައިމެންޓުތައް ނިންމުމަށް ފަސޭހަވާނެއެވެ. ހަމައެހެންމެ، މީހާގެ ޝައުގުވެރިކަން ދަމައިގަންނަ ކަންކަމުން ދުރުވުން މުހިންމެވެ. އޭގެ ތެރޭގައި، ސޯޝަލް މީޑިއާގެ ގޮވެތިން ނުކުމެ، ބޭކާރު ވަގުތުތައް ސޯޝަލް މީޑިއާގައި ހޭދަކުރުމުން ދުރުވެވޭނެއެވެ. ގޭމުތަށް ކުޅުމަށާއި ސީރީޒްތައް ބެލުމަށް ހޭދަކުރާ ވަގުތުތައް މަދު ކުރެވޭނެއެވެ. އެޕްލިކޭޝަންތައް ބޭނުން ކުރުމަށްވެސް ވަކި ވަގުތެއް ކަނޑައަޅާ، އެ ވަގުތެއް ހަމަވުމުން އެ ކަންކަމުން އެއްކިބާވުމަކީ އާދައަކަށް ހެދޭނެއެވެ. އެސައިމެންޓަށް އިސްކަންދީގެން އެކަން ކުރުވޭނީ 'ޑިސްޓްރެކްޝަން'ތަކާއި ދުރުވެގެންނެވެ.

ނަފްސާނީގޮތުން ދުޅަހެޔޮކަންމަތީ ހުރުމަށް މި ކަންކަމަށް ސަމާލުވުން މުހިންމެވެ. ފަހުވަގުތައް އެސައިމެންޓުތައް ފުނިޖައްސާފައި ބެހެއްޓުމުން މީހާ ހާސްވެ، ކަންބޮޑުވުމުގެ އިތުރުން ބިރު ގަނެ، ހަދާނެ ގޮތް ހުސްވުމުން، މަސައްކަތް ކުރިޔަަކަށް ގެންދިއުމަށް އުނދަގޫވާނެއެވެ. ސިކުނޑި ސުމަކަށް ދަންދެން ވިސްނާ ފިކުރު ކުރުމުން އިތުރަށް މީހާ ބަލިވެ، ދުޅަހެޔޮ ސިއްޙަތެއްގައި ހުރުމަށް ހުރަސްއެޅެއެވެ. އެހެންކަމުން އެސައިމެންޓުތައް އެންމެ ފަހުވަގުތަށް ނުބަހައްޓާ، ކުރިޔާލާ އެކަމައިގެން މަޝްއޫލުވާން ޖެހެއެވެ. ރޯވުމުގެ ކުރިން މަސައްކަތް ފަށަން ޖެހެއެވެ. ރޯވީމާ ދެން ނިއްވަން އުޅުމުން މިހާ އެކީ އަނދާ އަޅިއަށް ވެދާނެއެވެ.